VOV4.Êđê - Khădah hmăi mơ̆ng klei ruă Covid 19 ƀiădah 11 êpul hnơ̆ng čuăn bruă duh mkra – ala ƀuôn ti čar Dak Nông dưi mâo lehanăn êgao hnơ̆ng kčah mtrŭn. Klei anei dưi hưn ti Anôk bi kƀĭn ksiêm wĭt hdră mă bruă thŭn 2021, jao hdră kčah, klei đăo tĭng lehanăn pŏk ngă bruă hlăm thŭn 2022, mâo Anôk bruă sang čư̆ êa čar mkŏ mjing tlam hruê 16/12. Hluê si klei hưn mơ̆ng Anôk bruă sang čư̆ êa čar Dak Nông, hlăm thŭn 2021, hnơ̆ng đĭ kyar GDP mơ̆ng alŭ wăl mâo 8,63% dôk tal 7/63 čar, ƀuôn prŏng hlăm kluôm ala, hnư hrui wĭt kah knar grăp čô mâo 52,1 êklăk prăk/čô/thŭn.

Hnơ̆ng hrui wĭt ngăn prăk knŭk kna mâo êbeh 3.100 êklai prăk, êgao klei đăo tĭng mơ̆ng alŭ wăl kčah jao. Ênoh hdră kčah prăk duh bi liê knŭk kna thŭn 2021 mơ̆ng čar mâo giăm 2.117 êklai prăk, ênoh mkăp ngăn prăk truh giăm 98% hdră kčah... Kơ hdră kčah mđĭ kyar bruă duh mkra – ala ƀuôn thŭn 2022, Dak Nông tĭng srăng krơ̆ng kjăp hnơ̆ng đĭ kyar GDP mâo 7,5%, hnơ̆ng hrui wĭt ngăn prăk knŭk kna mâo 3 êbâo êklai prăk, ênoh gŏ êsei ƀun hrŏ êbeh 3%, krĭng mnuih ƀuôn sang djuê ƀiă mâo 5% kơ dlông./.

H’Nêč pô mblang