VOV4.Êđê - Truh hruê 19/11, čar Dak Nông tlŏ leh 100% aruăt tal 1 lehanăn hlăm brô 36% aruăt tal 2 vaccine gang mkhư̆ Covid 19 kơ jih jang mnuih mơ̆ng 18 thŭn kơ dlông. Anôk bruă ksiêm dlăng klei ruă tưp čar Dak Nông CDC Dak Nông hưn, kluôm čar mâo hlăm brô 445 êbâo čô mơ̆ng 18 thŭn kơ dlông mâo djăp klei găl dưi tlŏ vaccine gang mkhư̆ Covid 19. Truh hruê 19/11, Dak Nông tŭ mă leh 708.600 hnơ̆ng vaccine dŭm mta mâo Astra Zeneca, Pfizer, Moderna, Vero Cell mơ̆ng Phŭn bruă mdrao mgŭn lehanăn dưi tlŏ leh 587.600 hnơ̆ng, dưi tlŏ leh 100% kơ mnuih mơ̆ng 18 thŭn kơ dlông, 36% ênoh mnuih dưi tlŏ aruăt tal 2.

Êbeh 120 êbâo hnơ̆ng dôk tlŏ ti dŭm alŭ wăl hlăm čar. Hlăm hruê kăm anei, tơdah dưi tŭ mă êbeh 181.000 hnơ̆ng vaccine mơ̆ng Phŭn bruă mdrao mgŭn, tĭng truh jih mlan 11 anei, čar srăng tlŏ vaccine aruăt tal 2 kơ mnuih mơ̆ng 18 thŭn mâo 65% lehanăn srăng tlŏ jih 100% ênoh mnuih hlăm krah mlan 12 kơ anăp./.

H’Nêc pô mblang