VOV4.Êđê -  Aguah mbrue (15/12), ti ƀuôn prŏng Ƀuôn Ama Thuôt, knơ̆ng bruă sang čư̆ êa čar Daklak lehanăn Êpul bruă kiă kriê hlô mnơ̆ng dliê Asi mkŏ mjing leh klei kuôl kă hgŭm bruă kơ klei bi mlih hdră bi hmô hiu čhưn ênguê jĕ giăm hŏng êman. Tui si klei bi tŭ ư hgŭm bruă, čar Daklak srăng bi hrŏ jih hnơ̆ng, anăp truh kơ klei amâo yua êman êgao hnơ̆ng đei hmăi amâo mâo jăk kơ klei hdĭp êman, msĕ si: Đĭ êman đuĕ hiu, dŭm klei bi lông êman luê, êman čưng boh, êman êran, êman ktŭng klei, êman ruê̆ lu mmông hlăm êlan dơ̆ng gudrŏng, amâodah yua êman ƀuôn bi hmô klei nao brao êman dliê, lehanăn mjuăt bi hriăm êman dliê.

Knơ̆ng bruă sang čư̆ êa čar Daklak ăt mjing djăp klei găl kơ êpul bruă răng kriê hlô mnơ̆ng dliê mkŏ mjing keh ti čar djŏ hŏng klei bhiăn knŭk kna, jao kơ knơ̆ng bruă lŏ hma jing anôk đua klam klei bi mguôp hŏng êpul bruă anei, lehanăn hŏng dŭm êpul êya djŏ tuôm hrăm mbĭt hŏng dŭm gŏ êsei rông êman čiăng mkŏ mjing bi leh hdră êlan ngă bruă kơ klei hiu čhưn ênguê hŏng êman, ba mdah hdră anăn êlâo kơ ngă bruă./.

Y-Khem pô mblang