VOV4.Êđê - Êpul kiă kriê bruă myơr êrah čar Daklak hgŭm leh hŏng djăp êpul êya mphŭn dơ̆ng kơ hdra lŏ myơr êrah knăm kjuh hrah thŭn 2022. Bruă anei mâo tŭ mă leh êbeh 220 ênoh êrah doh tal êlâo hlăm hrue 8/1. Tui si Nguyễn Đức Phú - Khua adŭ bruă mtrŭt mjhar klei myơr êrah čar Daklak, ară anei êjai dôk găn hlăm klei ruă tưp Covid 19, snăn klei kƀah êrah jing prŏng êdi hlăm bruă mdrao mgŭn hlăm thŭn, lehanăn hlăm wưng Tết Nguyên Đán kơ anăp.

Tui si hdră, hlăm mlan sa anei, srăng mkŏ mjing truh kơ 6 gưl myơr êrah, năng ai srăng mâo tŭ mă mơ̆ng 2.500 - 3 êbâo ênoh êrah doh. Ênoh êrah doh anăn srăng ba jao kơ anôk ksiêm hriăm kơ êrah gưl dlông hlăm brô 1 êbâo ênoh êrah doh, bi kơ čar srăng djă pioh hlăm brô 2 êbâo ênoh êrah doh pioh dŏng mdrao mnuih ruă hlăm wưng Tết Nguyên đán./.

Y-Khem pô mblang