VOV4.Êđê - Ti čar Dak Lak, klei hdĭp aguah tlam ƀrư̆ lŏ wĭt hŏng mnuih ƀuôn sang ti dŭm krĭng mâo klei ruă tưp hlăk klei ruă Covid-19 dưi ktuê dlăng, klei ruă klă klơ̆ng dưi mkhư̆. Lu mnuih ruă leh wưng mdrao wĭt leh hlăm klei khăp găp djuê leh anăn êpul êya. Klei ruă tưp đru leh kơ grăp čô mnuih bi jĕ giăm hĭn leh anăn mpŭ kơ mnĭt mmông bi đru êđăp ênang.

Leh giăm sa mlan ngă klei bi ktlah sa anôk kyua djŏ Covid 19, Đỗ Van Lực ti ƀuôn Čuôr Dăng A, să Čuôr Dăng, kdriêk Čư̆ Mgar mơak snăk kyuadah gŏ sang êđăp ênang mâo ênŭm hlăm sa boh sang. Lực yăl dliê, Hlăm gưl klei ruă tưp hlăk lŏ đĭ lar ti mlan 11, gŏ sang mâo 5 čô mnuih, snăn truh 4 čô djŏ klei ruă tưp Covid 19. Hlăm anăn, jih dua ung mô̆ nao bi ktlah sơăi ngă kơ klei hdĭp lĕ hlăm klei mtuk mtŭl jih. Dôk rŭng kơ dua čô anak điêt thŭn hriăm hră mơar ăt djŏ kman klei ruă tưp mơh. Klei dôk rŭng răng kơ klei ruă lu leh, lehanăn ăt dôk bi mĭn nanao mơh kơ klei hmăng hmưi suaih pral čiăng pral wĭt hŏng pưk sang: “Phŭn tal êlâo dôk rŭng răng snăk, kyuadah jih jang mnuih bi huĭ sơăi. Leh kơ anăn mâo phung aê mdrao mdrao mgŭn, kčĕ đru mđĭ ai, gĭt mjuăt asei mlei, huă ƀơ̆ng bi jăk, čiăng kơ mâo klei suaih pral hĭn dưi găn klei ruă tưp. Gŏ sang kâo myun jing lŏ suaih sơăi, lehanăn lŏ wĭt hdĭp msĕ si aguah tlam”.

Ăt tuôm jing anôk mâo klei ruă tưp lu ti Daklak, ară anei phung ƀuôn sang ti să Čư̆ Pui, kdriêk Krông Bông lŏ wĭt msĕ si aguah tlam. Y-Bran Niê, ti ƀuôn Khuă, să Čư̆ Pui, bŏ hŏng klei mơak mâo 6/9 čô mnuih jing F0, mâo mdrao hlao leh sơăi. Y-Bran brei thâo: Ăt bi rŭng răng kơ klei suaih pral lehanăn kơ klei hdĭp, êjai jih jang mnuih nao bi ktlah, mdrao mgŭn, snăn dôk bi mĭn kơ bruă pưk hma, klei hrui êmiêt boh mnga, kyuadah kphê hlăk hlăm yan hrui pĕ, êmô kbao hlăm war amâo mâo pô nao wiă rơ̆k. Ăt knang kơ bruă sang čư̆ êa đru, phung ƀuôn sang bi đru čuă êmuh, mâo phung aê mdrao jih ai tiê mdrao mgŭn snăn jih jang mâo klei suaih pral, lehanăn mâo wĭt kơ ƀuôn sang hŏng klei êđăp ênang. Mnơ̆ng pla, mnơ̆ng rông ăt mâo klei đru bi răng ba:“Gŏ sang tuôm hŏng F0 ăt dôk rŭng răng leh mdê pô mdê anôk, amâo mâo thâo bi tuôm, ƀiădah leh truh kơ anăn mâo klei dlăng kriê wiê ênăk djăp ênŭm, mnơ̆ng ƀơ̆ng huă jăk. Mgi dih wĭt bi tuôm hŏng gŏ sang mơak yơh. Kâo amâo mâo lŏ rŭng răng ôh, kyuadah jih jang mnuih hlao leh sơăi, lŏ wĭt suaih msĕ si aguah tlam leh, lehanăn lŏ nao mă bruă leh sơăi”.

Kdriêk krông Bông sa hlăm dŭm alŭ wăl mâo mnuih djŏ lu klei ruă tưp hlăm yang ƀuôn. Siămdah, truh ară anei lu mnuih hlao leh sơăi, wĭt hŏng găp djuê leh sơăi, bi nao ngă bruă knuă. Nguyễn Ngọc Pháp, k’iăng khua knơ̆ng bruă sang čư̆ êa kdriêk krông Bông brei thâo: Ti dŭm boh alŭ alŭ, ƀuôn êlâo dih jing anôk mâo klei ruă tưp, snăn ară anei jih leh amâo lŏ mâo ôh klei bi mtưp hlăm yang ƀuôn. Kdriêk lŏ wĭt yap jing krĭng mtah leh, ƀiădah klei dôk bi răng, brei mâo klei thâo săng mdrơ̆ng hŏng klei ruă tưp ăt dôk nanao: “Êpul khua kiă kriê kdriêk ăt bi klă leh mơh jih ai tiê čuăl krĭng, kwang dar, mdjiê kman, tui duah mnuih jing F1; F2 lehanăn pral ba bi ktlah. Bi hŏng krĭng dôk hlăm klei kwang dar snăn mâo bruă ksiêm dlăng kjăp, mơ̆ng anăn krông Bông pral dưi mkhư̆ leh klei ruă tưp”.

Tui si ênoh yap mơ̆ng Dhar bruă mdrao mgŭn čar Daklak truh kơ hrue 16/12, kluôm čar mâo leh êbeh 9.700 čô mnuih djŏ kman klei ruă tưp Covid 19, hlăm anăn mâo êbeh 7 êbâo čô mnuih mdrao hlao leh. Čar đăo knang klei ruă tưp Covid 19 hlăk ƀrư̆ ƀrư̆ dưi ksiêm dlăng, lehanăn brei mdei leh sa boh sang êa drao jing jai. Lu alŭ wăl hlăm čar, yap hlăm dŭm krĭng jing anôk phŭn mâo klei ruă tưp, phung ƀuôn sang ăt mâo ngă leh jăk, lehanăn dưi lŏ wĭt msĕ si aguah tlam leh sơăi./.