VOV4.Êđê- Thŭn 2022, mbĭt hŏng klei hmăi mŏng ênoh ênil čhĭ mnơ̆ng dhơ̆ng hlăm wăl anôk mnia mblei tar rŏng lăn, klei kpĭ mđĭ ênoh čhĭ hlăm ala čar lŏ mâo wăt hdră kčah mkra mlih ênoh dŭm mta bruă hlăm wăl anôk mnia mblei, dŭm mta mnơ̆ng mâo ênoh duh bi liê, hrui blei đĭ, klei amâo h’ĭt mơ̆ng ênoh čhĭ dŭm mta mnơ̆ng mkra mjing hlăm wăl anôk mnia mblei... klei hâo hưn năng mđing ti Klei bi kƀĭn trông kơ wăl anôk mnia mblei, ênoh ênil ti Việt Nam thŭn 2021 lehanăn klei đăo knăl hlăm thŭn 2022. Thŭn 2022, hdră duh mkra Việt Nam mâo klei đăo knăl srăng lŏ krŭ wĭt lehanăn đĭ kyar pral, klei prăk trŭn ênoh hlăm thŭn 2022 amâo lu ôh. Hluê anăn, hdră đăo knăk êlâo hĭn, hlăm thŭn 2022, hdră duh mkra tar rŏng lăn mâo đăo knăl đĭ kyar êmưt, hdră duh mkra Việt Nam ăt êmưt mơh, hlăm brô 6 – 6,5% snăn klei prăk luič ênoh hlăm brô 2,8 truh kơ 3,2%. Tơdah klei đăo knăl bruă duh mkra tar rŏng lăn mâo klei bi mlih jăk, đĭ kyar hĭn snăn hdră duh mkra Việt Nam ăt mâo klei đĭ kyar mơh lehanăn tơ ala čar drei dưi ba yua jih klei găl găl mơ̆ng klei kuôl kă bruă mnia mblei êngiê ala čar drei srăng mâo hnơ̆ng đĭ kyar hlăm brô 7 truh kơ 7,5% hlăm thŭn 2022 lehanăn klei prăk luič ênoh srăng mâo mơ̆ng 3,5 truh kơ 3,8%./.

                                                    Pô mblang: H’Nêč Êñuôl