VOV4.Êđê- Lŏ dơ̆ng hlăm klei bi kƀĭn tal 6, tlam mbrue (9/12) Dhar bruă gĭt gai bruă kƀĭn ala mă leh klei blŭ kơ hdră mkŏ mjing klei bhiăn klei kơ ngăn prăk čiăng kñăm lŏ kơrŭ wĭt bruă duh mkra ala ƀuôn. Anei jing bruă yuôm bhăn, lehanăn hlăk mjêč ară anei. Dŭm bruă êlâo dih mâo bruă kƀĭn ala jao klei dưi kơ Dhar bruă gĭt gai Bruă kƀĭn ala ksiêm bi mklă. Tal anei bruă lŏ kơrŭ wĭt bruă duh mkra ala ƀuôn dôk êngao kơ hdră dăp leh hlăm 5 thŭn 2021 – 2025, mâo leh bruă kƀĭn ala bi mklă msĕ si: Hdră mđĭ kyar bruă duh mkra, bruă ngăn prăk knŭk kna, hdră duh bi liê hnơ̆ng man dưn, hdră brei čan prăk, lehanăn hdră nư ti hnơ̆ng man dưn. Êjai klei ruă tưp dôk dleh dlan, čiăng bi mâo yơh ênoh đru kơ bruă kơrŭ wĭt bruă duh mkra. Ênoh anei kñăm hlăm dua thŭn. Hlăm anăn thŭn 2022 ktuh êyuh kơ bruă lŏ bi kơrŭ bruă knuă, bi thŭn 2023 srăng mtrŭt mđĭ bruă duh mkra. Prăk duh bi liê mă mơ̆ng ênoh prăk čan hlăk mâo klei găl dưi tla nư, lehanăn bi tĭng kla mngač mơh kơ hdră duh bi liê./.

Pô mblang: Y-Khem Niê