Mơ̆ng thŭn anei, Knăm mơak Durian Krông Pač srăng dưi mđĭ jing Knăm mơak durian čar Dak Lak. Boh phŭn anei mâo Knơ̆ng bruă sang čư̆ êa čar Dak Lak bi tŭ ư mơ̆ng tur knơ̆ng klah čŭn mơ̆ng Anôk dlăng bruă Đảng čar, leh ksiêm dlăng boh tŭ êdah êdi mơ̆ng dŭm knăm mơak êlâo anăn. Hlue si hdră tă mrâo, Knăm mơak durian čar Dak Lak srăng dưi mkŏ mjing hlue si gru hmô gưl čar, grăp gưl 2 thŭn/blư̆.

Mĭn tĭng, knăm mơak gưl tal êlâo ti hnơ̆ng gưl čar srăng dưi mkŏ mjing hlăm thŭn anei, jing klei bi mguôp plah wah bruă lŏ hma, dhar kreh leh anăn hiu čhưn ênguê. Knăm mơak srăng mâo lu bruă ngă, msĕ si: knăm mơak mnơ̆ng dhơ̆ng lŏ hma, klei bi lông boh kroh jăk, ruê̆ êdeh mnga, kdŏ mmuñ ênhiang djuê ana, hưn mdah hiu čhưn ênguê, mkŏ ba čhĭ mnơ̆ng dhơ̆ng lŏ hma… Hlue si Knơ̆ng bruă dhar kreh, mjuăt asei mlei leh anăn hiu čhưn ênguê čar Dak Lak, čar dôk mkŏ mjing hdră kčah mđĭ kyar klă klơ̆ng kơ Knăm mơak durian, hŏng klei bi mklă jing klei găl hlăm hdră ngă bruă hiu čhưn ênguê gưl 3 thŭn anei, boh nik hlăm gưl Knăm mơak mphŭn mkŏ mjing ala čar 2-9.