Thŭn 2025, bruă hiu čhưn ênguê čar Quảng Ngãi đăo tĭng drông 5,2 êklăk gưl čô tuê. đĭ 38% mkă hŏng thŭn êlâo. Hnư hrui wĭt mơ̆ng bruă hiu čhưn ênguê đăo tĭng mâo 3.700 êklai prăk, prăk tač êngao mâo hlăm brô 22 êklăk USD, đĭ 2,5 blư̆. Boh tŭ dưn brei brei ƀuh ai ktang êdah êdi mơ̆ng bruă hiu čhưn ênguê alŭ wăl, ƀiădah ăt mâo klei čuăn dŭm hdră êlan phŭn čiăng mđĭ kyar hơĭt kjăp hlăm wưng kơ anăp.

Hlăm wưng êgao, dŭm anôk hiu čhưn ênguê ti să Măng Đen iêo jak lu phung tuê, boh nik hlăm dŭm hruê knăm, tết. Ƀiădah ênoh tuê nao ti Măng Đen ăt mâo knhuah jing yan, ka mâo klei hơĭt hlăm jih thŭn.

Hluê si amai Y Trang, pô anôk bruă Sóc’s House să Măng Đen, mđĭ kyar Măng Đen čiăng mdưm klei kriê pioh jing mrô 1, hlăm anăn bruă kriê pioh knhuah gru dhar kreh leh anăn wăl mnơ̆ng hdĭp jing hdră bhiăn phŭn. Anak mnuih dưi bi klă jing mta kñăm mơ̆ng klei đĭ kyar, grăp čô mnuih ƀuôn sang jing phŭn kriê pioh dhar kreh, jing pô bi ala bruă hiu čhưn ênguê. Amai Trang brei thâo:

“Tăp pô ngă pô tĭng klă truh kơnăn. Măng Đên dưi djă pioh klei găl mâo anei. Wăl dliê kmrơ̆ng jing klei siam, êwa angĭn êđăp. Anak mnuih jăk, mhač. Klei đĭ kyar čiăng mâo dŭm hdră duh bi liê prŏng msĕ si tač êdeh phiơr, êlan dơ̆ng pral, anôk mdei msăn amâodah wăl anôk kriê dlăng klei suaih pral, ăt dưi ngă kơ krĭng lăn Măng Đen mdrŏng ktang leh anăn hơĭt kjăp”.

Khădah mâo lu klei găl kơ dliê kmrơ̆ng, yan adiê leh anăn wăl anôk, ƀiădah bruă mkŏ mkra mơ̆ng Măng Đen adôk lu klei kƀah. Dŭm bruă đru kơ bruă hiu čhưn ênguê Măng Đen ka mâo djăp hŏng klei čiăng. Klei čhĭ mnia adôk êdu kƀah, knŏng jing boh mnga leh anăn êa drao, kƀah dŭm mta bruă đru, anôk hlăp lêñ leh anăn kriê dlăng phung tuê hiu čhưn ênguê, boh nik jing dŭm bruă kơ phung mniê. Phạm Văn Thắng, khua Bruă sang čư̆ êa să Măng Đen, čar Quảng Ngãi brei thâo, klei dleh dlan hĭn ară anei ti Măng Đen jing êlan klông:

“Čar Quảng Ngãi mâo leh hdră êlan mkra êlan dơ̆ng mrô 24 hlăm thŭn 2026. Anei ăt jing klei găl jăk kơ bruă hiu čhưn ênguê Măng Đen đĭ kyar. Êngao kơnăn, dŭm hdră bruă prŏng, bruă kñăm hŏng Măng Đen ăt čiăng mâo klei đru mơ̆ng čar. Ară anei, čar mkŏ mjing klei iêo jăk duh bi liê 3 hdră wăl krah. 3 hdă anei mâo hnơ̆ng êbeh 800ha leh anăn ênoh duh bi liê hlăm brô 26.000 êklai prăk. Leh mkŏ mjing 3 anôk anei srăng bi mâo djăp klei čiăng mnia mblei leh anăn dŭm bruă mkăn”.

Ti Măng Đen ăt msĕ mơh dŭm să Yŭ čar Quảng Ngãi, bruă hiu čhưn ênguê knŏng čŏng mkŏ mjing, hnơ̆ng hliê điêt, dŭm anôk mnia mblei, anôk hiu čhưn ênguê lu jing mơ̆ng mnuih ƀuôn sang leh anăn knơ̆ng bruă điêt duh bi liê. Hluê si Võ Trung Mạnh, khua bruă Đảng să Tu Mơ Rông, tơdah amâo mâo djăp ai dưi, dŭm să dleh sơnăk krơ̆ng kơ dŭm anôk hiu čhưn ênguê ară anei, êjai anăn klei găl mđĭ kyar bruă hiu čhưn ênguê nao mbĭt hŏng ana êa drao, dliê leh anăn bruă lŏ hma wăl mnơ̆ng hdĭp mơ̆ng alŭ wăl anei:

“Tu Mơ Rông leh anăn dŭm anôk hiu čhưn ênguê ti čar Kon Tum hđăp ăt msĕ si dŭm anôk čŏng ngă bruă, klei đru mơ̆ng čar jing ƀiă sơnăk. Kyuanăn mñă kơ čar čiăng bi trông êlam hĭn čiăng mtrŭt mđĭ klei duh bi liê, đru kơ duh bi liê mđĭ kyar bruă hiu čhưn ênguê”.

Sa hlăm dŭm klei kpăk prŏng mơ̆ng bruă hiu čhưn ênguê Quảng Ngãi ară anei jing kƀah anôk mdei msăn leh anăn bruă hnơ̆ng jăk, êjai êlan kloong ka hrăm mbĭt, ngă kơ lu phung bi liê amâo mâo jhŏng ngă dŭm hdră prŏng. Čiăng bruă hiu čhưn ênguê đĭ kyar năng hŏng klei găl, čar Quảng Ngãi bi klă mta kñăm bi kluôm hdră êlan, ruh mgaih klei kpăk leh anăn mkŏ mjing boh kdrŭt mơ̆ng nah gŭ. Hlăm anăn čar knăm mâo dŭm hdră êlan, klei mđĭ mđĭ kyar bruă hiu čhưn ênguê êpul êya nao mbĭt hŏng kriê pioh dhar kreh leh anăn ba yua dŭm dưn dŭm anôk siam. Phạm Thị Trung, khua knơ̆ng bruă dhar kreh, mjuăt asei mlei leh anăn hiu čhưn ênguê čar Quảng Ngãi brei thâo:

“Hlăm hdră anăp anei srăng ba mdah hdră êlan mđĭ kyar bruă hiu čhưn ênguê hơĭt kjăp mơ̆ng čar Quảng Ngãi leh bi mŭt mbĭt. Klei anei lŏ čuê kơ hdră mtrŭn mơ̆ng dua čar Kon Tum hđăp leh anăn Quảng Ngãi hđăp hlăm wưng êgao, mbĭt anăn bi klă, mkra mlih leh anăn bi mbŏ đa đa hdră tă prŏng mơ̆ng Êpi;l khua bruă Đảng čar Quảng Ngãi kơ mđĭ kyar bruă hiu čhưn ênguê hlăm wưng kơ anăp”.

Čar Quảng Ngãi bi klă, ngă klei bi mguôp kjăp plah wah alŭ wăl Ngŏ leh anăn Yŭ, mđĭ kyar bruă hiu čhưn ênguê nao mbĭt hŏng dliê, wăl mnơ̆ng hdĭp, bruă hiu čhưn ênguê êpul êya, hluê anăn ƀrư̆ ƀrư̆ ba bruă hiu čhưn ênguê jing bruă duh mkra phŭn./.