Krah mlan 1 mrâo êgao, Knơ̆ng bruă sang čư̆ êa ƀuôn hgŭm Ea Kao, čar Dak Lak mkŏ mjing hdră livestream  hŏng akŏ “Ƀuôn Tơng Jŭ, Ea Kao alum kkuh”, mđung ti mmông anăn mtam hlăm hla pŏk web ala ƀuôn msĕ si Facebook, Zalo OA, TikTok. Hlăm êbeh sa mmông, wăl jăk siam, wăl hdĭp mda dhar kreh leh anăn klei hdĭp mda mă bruă, mkra mjing mnuih Êđê dưi hưn mthâo hŏng lu phung dôk dlăng.

Hlue si Trần Công Hữu, K’iăng Khua Knơ̆ng bruă sang čư̆ êa ƀuôn hgŭm Ea Kao, hdră ngă anei amâo djŏ knŏng bi klă klơ̆ng Hdră mtrŭn 57 ôh ƀiădah lŏ mjing knhuang bi mlih hlăm klei mĭn hưn mdah leh anăn ba čhĭ mnơ̆ng dhơ̆ng alŭ wăl.

 “Hdră live stream atăt gai êpul hgŭm bruă pơ̆k mñăm Tơng Bông leh anăn dŭm anôk bruă duh mkra ti alŭ wăl ƀuôn hgŭm mđĭ kyar bruă duh mkra mrô hlăm wưng kơ anăp. Hdră amâo djŏ knŏng hưn mthâo ênoh yuôm djuê ana ôh, wăl hdĭp mda, mă bruă mkra mjing mnuih Êđê ôh ƀiădah lŏ đru mđĭ ba čhĭ mnơ̆ng dhơ̆ng alŭ wăl, mguôp hŏng mđĭ kyar bruă duh mkra hŏng răng kriê knhuah dhar kreh. Mơ̆ng hdră live stream anei, hmei čang hmăng ba klei ƀuh jĕ giăm, jăk mơak leh anăn mgei ai tiê”.

Hŏng mnơ̆ng dhơ̆ng mkra hŏng kngan, hdră livestream lŏ hưn mthâo mnơ̆ng dhơ̆ng djuê ana leh anăn gru hmô hiu čhưn ênguê ƀuôn Tơ̆ng Jŭ. Hŏng gru hmô anei, hiu čhưn ênguê srăng dưi hiu dlăng ƀuôn sang, ksiêm dlăng bruă djuê ana, lông ƀơ̆ng mnơ̆ng ƀơ̆ng, hiu dlăng klei hdĭp mda hŏng mnuih ƀuôn sang.

H Yam B.Krông, khua êpul hiu čhưn ênguê êpul êya ƀuôn Tơng Jŭ, ƀuôn hgŭm Ea Kao, čar Dak Lak brei thâo:

 “Hgŭm hlăm klei hiu čhưn ênguê mnuih ƀuôn sang dưi ngă lu bruă, si tô hmô pla djham, rông mnơ̆ng, pla mjing, dŭm mta mnơ̆ng dhơ̆ng mnuih ƀuôn sang ngă dưi ba čhĭ ti anôk pô hdĭp mda, anăn jing klei năng mơak. Kyua anăn tơdah hiu čhưn ênguê đĭ kyar ti alŭ wăl ƀuôn hgŭm Ea Kao snăn kâo pô hŏng mnuih ƀuôn sang mơak snăk, čiăng mâo hdră mkra mđĭ klei hdĭp mda pô ƀrư̆ jăk hĭn. Êngao anăn anăn ăt jing hrăm mbĭt kriê pioh dhar kreh alŭ wăl.”

 Hŏng dŭm gru hmô ti nah gŭ, bi mlih mrô hlăm bruă dhar kreh dôk mâo čar Dak Lak pŏk ngă hrăm  mbĭt. Ti Sang kriê pioh Dak Lak, K’iăng Khua Anôk bruă Trần Quang Năm, brei thâo, bruă ba yua kdrăp mrô mđĭ lar leh tŭ dưn hlăm bruă hiu duah, mbha mta leh anăn ruah mnơ̆ng dhơ̆ng duh kơ klei rang mdah. Mbĭt anăn đru mđĭ hnơ̆ng jăk duh kơ tue hiu čhưn dlăng.

 “Sang kriê pioh yua leh mrô kơ mnơ̆ng dhơ̆ng, klei bhiăn, klei ngă yang, knăm mơak djuê ana ti čar. Yua kdrăp mrâo AR, VR čiăng mâo klei dlăng, klei hgŭm tue hiu čhưn hŏng ênoh yuôm dhar kreh djuê ana čar Dak Lak”.

Truh ară anei, ênoh mrô duh kơ klei čŏng mdah dưi mkŏ mjing ti 3 anôk kriê pioh hƀuê ênuk ala čar ti čar Dak Lak, mâo Sang mnă Ƀuôn Ama Thuôt, Sang mtao Bảo Đại leh anăn Sang Yang Lạc Giao. Kdrăp mrâo hâo hưn ăt mâo yua msĕ si kdrăp phŭn hlăm klei hưn mdah dhar kreh mguôp hŏng hiu čhưn ênguê. Boh phŭn hâo hưn mâo bi lu jơr hlăm tur knơ̆ng mrô, đru pŏk mlar klei dưi truh hŏng mnuih ƀuôn sang. Trần Hồng Tiến, Khua Knơ̆ng bruă Dhar kreh, mjuăt asei mlei leh anăn hiu čhưn ênguê čar Dak Lak, brei thâo:

 “Hmei mkŏ mjing leh lu adŭ hriăm mjuăt, yua kdrăp mrâo kơ knuă druh hlăm kluôm dhar bruă ăt msĕ mơh kơ phung knuă druh adŭ bruă dhar kreh ala ƀuôn mơ̆ng dŭm să, ƀuôn hgŭm. Bi hgŭm hŏng dŭm anôk bruă duh mkra kdrăp mrô, mkŏ mjing hdră kčah, pŏk ngă dŭm boh phŭn djŏ tuôm kơ bruă mlih mrô mơ̆ng dhar bruă, msĕ si yua kdrăp mrô hlăm bruă mnơ̆ng kriê pioh, hiu čhưn ênguê, mjuăt asei mlei ăt msĕ mơh hlăm bruă ngă dhar kreh”.

Bi mlih mrô dôk mjing thiăm wăl kơ dhar kreh êdah klă hĭn hlăm klei hdĭp mdma grăp hruê ti Dak Lak. Mơ̆ng anăn đru lar bra ênoh yuôm dhar kreh, pŏk mlar klei găl mđĭ kyar duh bơ̆ng kơ mnuih ƀuôn sang leh anăn tă hdră êlan nao kjăp kơ hiu čhưn ênguê alŭ wăl hlăm wưng mrâo.