Hdră mtrŭn mrô 80-NQ/TW mơ̆ng Phŭn bruă kđi čar gưl 13 kơ mđĭ kyar dhar kreh Việt Nam dưi ba mdah êlâo kơ klei kƀĭn prŏng Đảng tal 14 bi êdah klei gĭt prŏng mơ̆ng Đảng hlăm bruă ruh mgaih klei kpăk kơ klei kiă kriê, ai dưi, mđĭ lar ktang dhar kreh, mkŏ mjing boh kdrŭt mrâo, mtrŭt mđĭ klei đĭ kyar pral, hơĭt kjăp mơ̆ng lăn čar hlăm wưng mrâo.

Hdră mtrŭn mñă ktang bruă klam dhar kreh msĕ si tur knơ̆ng čiăng mkŏ mjing dhar kreh mrâo mrang, jiă kma knhuah gru djuê ana hlăm ênuk mrâo. Hdră mtrŭn bi klă mnơ̆ng kriê pioh dhar kreh êdah klă leh anăn amâo mâo êdah klă msĕ si sa hlăm dŭm ngăn dŏ dhar krei čiăng dưi ba yua tŭ dưn hơĭt kjăp. Hlăm hdră mtrŭn anei, bruă răng mgang leh anăn bi lar dhar kreh amâo djŏ knŏng jing bruă klam răng mgang knhuah gru ƀiădah bi dưi kƀĭn hlăm sa hdră êlan mđĭ kyar kluôm dhuôm, hơĭt kjăp bi mguôp hŏng bruă sang hră mơar, êpul êya, bruă duh mkra, boh nik jing wưng ñŭ kma tar rŏng lăn leh anăn bi mlih mrô.

Dŭm djuê ana Bru – Vân Kiều, Chứt hdĭp mơ̆ng đưm ti čar Quảng Bình êlâo dih, ară anei jing čar Quảng Trị. Anôk anei mâo knhuah dhar kreh nao mbĭt hŏng čư̆ dliê Trường Sơn, hnoh êa, hnoh krông leh anăn êpul êya. Bruă kriê pioh dhar kreh amâodưi bi ktlah hŏn bruă kriê pioh knhuah gru ƀuôn sang, răng mgang dliê, hnoh êa leh anăn hdră duh ƀơ̆ng knhuah gru. Klei mĭn mơ̆ng hdră mtrŭn mrô 80 NQ/TW mơ̆ng phŭn bruă kđi čar bi klă bruă răng mgang dhar kreh hlăm klei mjĕ giăm bi kna hŏng čư̆ dliê leh anăn đĭ kyar hơĭt kjăp.

Pô mbruă Đinh Văn Chờ, djuê ana Chứt ti ƀuôn Hoá Lương, să Kim Điền, čar Quảng Trị lač, ai tiê mơ̆ng hdră mtrŭn anei jing mă anak mnuih jing mta kñăm, hlăm anăn êpul êya jing phŭng mkŏ mjing leh anăn răng mgang dhar kreh. Đinh Văn Chờ lač:

“Dhar kreh jing sa tur knơ̆ng klei mĭn, ai tiê mtrŭt mđĭ klei đĭ kyar mơ̆ng yang ƀuôn. Mâo Đảng leh anăn Knŭk kna uêñ mĭn, mnuih Chứt hmei hơ̆k mơak êdi, mâo boh tŭ dưn yuôm bhăn dưi bi lar, kriê pioh boh tŭ dhar kreh mnuih Chứt. Mơ̆ng alŭ wăl truh kơ gưl dlông si srăng ngă uêñ mĭn kơ mnơ̆ng kriê pioh mnuih djuê ƀiă ti anăp klei luč ram, čiăng mâo hdră êlan găl guôp, mâo knhuah lŏ čuê, mtô kơ ênuk êdei čiăng lŏ mđĭ kyar mnơ̆ng kriê pioh”.

Wĭt dlăng ti Dak Lak, hlăm hdră êlan răng mgang leh anăn bi lar dhar kreh amâo mâo êdah klă ala čar ti alŭ wăl čar wưng thŭn 2023 - 2025 ba mdah leh dŭm bruă klam, hdră êlan čiăng răng mgang, lŏ čuê leh anăn bi lar dŭm boh tŭ dhar kreh mơ̆ng mnuih Êđê gưl ala čar msĕ si Khan mơ̆ng mnuih Êđê, klei duê leh anăn mơak thŭn jŏk mơ̆ng mnuih Mnông. Klă klơ̆ng msĕ si pŏk dŭm adŭ hriăm kơ dhar kreh amâo mâo êdah klă, mkŏ mjing dŭm hdră êlan kriê pioh, bi lar dhar kreh nao mbĭt hŏng bruă klam mđĭ kyar bruă duh mkra ala ƀuôn ti alŭ wăl, mkŏ mjing dŭm mta bruă bi hmô kơ bi lar dhar kreh amâo mâo êdah klă ala čar nao mbĭt hŏng mđĭ kyar bruă hiu čhưn ênguê êpul êya, bi lar bruă klam pô mnơ̆ng kriê pioh, mkpŏ mjing dŭm hdră rang mdah, knăm mơak, hlăm dŭm mta bruă hiu čhưn ênguê…Boh tŭ dưn, mơ̆ng dŭm hdră êlan djŏ guôp anei đru leh kơ mnuih ƀuôn sang dưi dưn leh anăn bi lar knhuah dhar kreh alŭ wăl. H’Ring Mlô, mnuih Êđê, ti ƀuôn M’găm, să M’drăk, čar Dak lak brei thâo, kyua mâo Đảng leh anăn Knŭk kna, mnuih ƀuôn sang amâo djŏ knŏng dưi tlaih ƀun, ƀiădah lŏ mâo klei găl kriê pioh, bi lar dhar kreh:

“Sang kâo ti anăp êlan, mâo sang Êđê. Kâo čiăng čhĭ mnia mnơ̆ng huă ƀơ̆ng, mnơ̆ng ƀơ̆ng Êđê pô msĕ si kpiê čeh bi mguôp hŏng klei tông čing čiăng kriê pioh knhuah dhar kreh djuê ana pô. Sang kâo mâo lŏ, mâo hma, kâo ăt pla lu mta ana ƀơ̆ng boh…”

Dŭm klei mĭn mrâo hlăm hră mơar Klei kƀĭn prŏng tal 14 mơ̆ng Đảng jing kriê pioh dhar kreh hlăm hdră êlan mđĭ kyar ktang, kluôm dhuôm dhar kreh leh anăn anak mnuih Việt Nam. Mđĭ kyar dhar kreh leh anăn anak mnuih Việt Nam hluê si ai tiê klei kƀĭn kluôm tal 14 mơ̆ng Đảng srăng jing hdră êlan hrăm mbĭt, bi mguôp bi kna plah wah knhuah gru dhar kreh leh anăn kpưn đĭ kơ mrâo mrang.

Hră mơar klei kƀĭn kluôm tal 14 mơ̆ng Đảng ăt bi klă 12 hdră tă prŏng, 6 bruă klam kñăm leh anăn 2 hdră êlan kdlưn hĭn. Hdră ngă bruă bi klă dŭm bruă klam dưi ngă mtam. Hlăm anăn, hdră tă dhar kreh leh anăn anak mnuih jing tur knơ̆ng ai tiê mơ̆ng yang ƀuôn, ai ktang mơ̆ng lam, ai dưi leh anăn boh kdrŭt đĭ kyar lăn čar. Mai Xuân Thành, k’iăng khua knơ̆ng bruă dhar kreh, mjuăt asei mlei leh anăn hiu čhưn ênguê čar Quảng Trị brei thâo, boh sĭt ti alŭ wăl  čư̆ čhiăng, kriê pioh dhar kreh mnuih djuê ƀiă knŏng hơĭt êjai nao mbĭt hŏng hdră duh ƀơ̆ng hơĭt kjăp kơ mnuih ƀuôn sang.

“Mâo dŭm hdră mtrŭn kơ hdră êlan đru kơ phung thâo mbruă hlăm bruă kriê pioh, mtô leh anăn bi lar dhar kreh hlăm alŭ wăl. Čiăng đru mđĭ hnơ̆ng klei hdĭp ai tiê kơ phung thâo mbruă khăp hĭn, mbĭt hŏng Knŭk kna kriê pioh dŭm boh tŭ dhar kreh. Ngă jăk dŭm klei čuăn mơ̆ng hdră bhiăn mnơ̆ng kriê pioh, rơ̆ng kơ dŭm alŭ wăl kriê pioh, bi lar dhar kreh amâo mâo êdah klă hluê djŏ klei čuăn mơ̆ng hdră bhiăn mnơ̆ng kriê pioh dhar kreh”