Hlăm wăl kdrăm kơah ênai čing kwang, phung mniê Êđê êdu êun čhuang nao ti djiêo čeh kpiê, jăk siam hlăm ênhiang kdŏ iêô mnăm kpiê djuê ana. Grăp knhuang jơ̆ng čhuang, kngan êdu êun msĕ si klei iêô jak yuôm bhăn mơĭt kơ phung yang leh anăn tuê ênguê. Klei kdŏ iêô mnăm kpiê čeh khăng mâo hlăm knăm huă êsei mrâo, knăm ngă yang tŭ akŏ pin êa, knăm ngă yang asei, klei bi kuôl leh anăn knăm mơak djuê ana ti ƀuôn sang. Anôk kdŏ jing sang krum dlông hơuhg mđao, tač knăm mơak kdrăm kơah amâodah ti djiêô čeh kpiê, anôk mkŏ anak mnuih hŏng êpul êya leh anăn phŭn agha dhar kreh Êđê.

Khua mduôn Y Kŭt Niê (Aê Nang), ƀuôn Prao, să Mdrak, čar Dak Lak brei thâo:

 “Hlue si klei bhiăn anak Êđê, kdŏ iêô mnăm kpiê čeh jing klei kdŏ hlăm gưl ƀuôn sang mâo knăm mơak, mâo čeh kpiê, amâo dưi kdŏ ôh tơdah gŏ sang mâo mnuih djiê. Phung đưm lač anăn jing anôk bi kƀĭn phung êkei êdam mniê êra, djăp ƀuôn êlan hrăm mbĭt.”

 Klei kdŏ iêô mnăm kpiê čeh anak Êđê bi êdah hŏng klei kdŏ êdu êun, hŏng knhuang jơ̆ng čhuang jŭm dar čeh kpiê. Kngan êdu êun hlăm klei iêô jak, kkuh drông hŏng mpŭ. Wăt tơdah amâo bi êdah lu đei ti êngao ôh, ƀiădah klei kdŏ jiă kma klei bhiăn leh anăn klei bi knăl, bi êdah klei mpŭ hŏng yang leh anăn phung tue ênguê. Hlai mbĭt hŏng klei kdŏ jing ênai kwang kdrăm kơah čing Êđê, hŏng ênhiang čing êmưt, bi mdrăng, mjing wăl yuôm bhăn hơuh mđao, jiă kma knhuah dhar kreh djuê ana.

 Pô mbruă Y Klôt Buôn Yă (Aê Thảo), ƀuôn Hra Ea Ning, să Dray Bhăng, čar Dak Lak brei thâo, klei kdŏ iêô mnăm kpiê čeh anak Êđê bi êdah jăk siam kơ klei khăp kơ tuê, leh anăn jing klei mkŏ phung ƀuôn sang, mbĭt anăn lač kơ klei hdĭp mngăt ai tiê jăk siam êpul êya. Mơ̆ng klei kdŏ, mnuih Êđê bi êdah klei đăo knang, klei hdơr knga leh anăn klei čang hmăng kơ klei hdĭp jăk mơak, trei mđao.

 “ Leh klei ngă yang tuh akŏ pin êa, klei ngă yang asei mâo klei kdŏ iêô mnăm kpiê čeh hŏng klei čang hmăng mnuih ƀuôn sang bŏ hŏng klei mơak mñai leh anăn trei mđao. Anăn jing klei iêô jak phung yang čư̆, yang êa, aduôn aê atâo atiêt hmư̆ ênai čing, klei kdŏ srăng wĭt hơ̆k mơak hŏng mnuih ƀuôn sang pô.”

Pô mbruă Y Klôt Buôn Yă lŏ brei thâo, phung kdŏ srăng hơô kdrăp djuê ana Êđê. Hlue si klei bhiăn đưm, êlâo kơ mnăm kpiê čeh, êa tuh hlăm čeh kpiê djăt mơ̆ng pin êa ƀuôn hŏng boh giêt krô, amâo mă ôh mơ̆ng êa mkăn, kyua anăn jing êa yuôm bhăn.

“Tơdah ngă yang hŏng 3 čeh kpiê snăn  3 čô kdŏ, 7 čeh kpiê snăn mâo 7 čô kdŏ. Ênoh mnuih kdŏ khăng mâo mơ̆ng 5 čô kơ dlông leh anăn hlue si mrô klah, amâo hlue si mrô kruôp ôh. Hlăk đưm, êlâo kơ mnăm kpiê čeh, êa tuh hlăm čeh kpiê brei djăt mơ̆ng pin êa hŏng boh giêt krô, amâo mă ôh mơ̆ng êa mkăn.”

 Kdŏ iêô mnăm kpiê čeh amâo djŏ jing klei bhiăn ôh, ƀiădah lŏ jing sa klei kdŏ jăk siam, anôk ênhiang mmuñ,klei kdŏ leh anăn mngăt ai tiê hlai mbĭt jing sa. Grăp knhuang jơ̆ng, kngan dai bi knar hŏng klei mpŭ, bi êdah klei bi mguôp anak mnuih hŏng čư̆, dliê êa, yang leh anăn êpul êya. Ti krah ênhiang čing kwang leh anăn asăp kƀông tlao siă suôr mơ̆ng ƀuôn sang, phung tue srăng ƀuh klei mđao, klei mơak drông tue leh anăn klei yuôm bhăn hlăm grăp mnĭt mnông dhar kreh mơ̆ng Lăn Dap Kngư./.