Djam Pông jing mta djam djiê ênưih ƀuh, kreh čăt ktuê hnoh êa, tŭ êyui kyâo msah. Mnuih Bahnar pĕ djam anei kluôm thŭn. Djam kreh pĕ aguah êjai dôk mâo êa nguôm, mâo mnâo msăm leh anăn êđăp. Jăk hĭn jing knăt mda, hla mtah. Djam leh pĕ dưi rao doh, lui thu. Y Giang ti ƀuôn Plei Tơngia, ƀuôn hgŭm Đăk Cấm, čar Quảng Ngãi mtô kơ klei tŭk djam Pông

 “Djam pông pĕ ưm, adôk êa nguôm kơ adôk mâo mnâo msăm, mnâo mmih. Kpung ăt tlê lik, guôn êa ktơ̆ng leh anăn tuh kpŭng ƀrư̆ ƀrư̆, kwă bi nik kơ êa êngeh, djam ƀơ̆ng jăk.”  

Kpŭng kreh tŭk djam jing kpŭn braih amâodah kpŭng ktơr. Êjai tŭk, drŏng gŏ êa djam bi ktơ̆ng leh anăn ttuh kpŭng ƀrư̆ ƀrư̆, kwă bi lik amâo brei ñu klŏ. Leh anăn kơh mplĕ hla djam pông, dưi lŏ dưm wăt kan êa, abao amâodah ƀiă kđeh čĭm, djam pông tŭk hŏng kpŭng đuč ăt lu hĭn.

Klei mdê mơ̆ng djam pông jing mnâo mnañ man dưn, ênưih ƀơ̆ng. Aduôn Y Lat ti ƀuôn Plei Tơngia, ƀuôn hgŭm Đăk Cấm, čar Quảng Ngãi brei thâo:

 “Djam kpŭng hla pông jing mnơ̆ng ƀơ̆ng mơ̆ng đưm mơ̆ng mnui Bahnar. Knŏng mâo mă hla pông leh anăn kpŭng đuč jing mâo mnơ̆ng jăk leh. Tơdah mâo ƀiă kđeh čĭm amâodah kan tŭk mbĭt srăng jăk hĭn. Tŭk djam kpŭng anei srăng ƀrư̆ ƀrư̆, amâo mâo ruăt ôh, kwă bi lĭk kơ jăk.”

 Hlăm klei hdĭp êpul êya, djam kpŭng djam pông kreh mâo hlăm klei huă ƀơ̆ng hlăm gŏ sang leh sa hruê nao hmao, amâodah hlăm dŭm mmông huă ƀơ̆ng ƀuôn. Gŏ djam kreh dưm ti krah sang, grăp čô bi ƀơ̆ng mbĭt, bi yăl dliê. Djam ƀơ̆ng amâo djŏ knŏng rông ba asei mlei, ƀiădah lŏ bi mguôp grăp čô hlăm gŏ sang leh anăn yang ƀuôn.

Ară anei, khădah klei hdĭp mnuih Bahnar mâo lu klei bi mlih, lu mta mnơ̆ng ƀơ̆ng mrâo, ƀiădah kpŭng hla pông ăt dưi djă pioh hlăm dhar kreh./.