Klei ƀhur knga jing sa hlăm dŭm klei bhiăn mơ̆ng mnuih ƀuôn sang djăp djuê ana ti Lăn Dap Kngư. Anei jing klei kruak knăl kơ klei bi mlih  hlăm klei hdĭp, čiăng mơ̆ng anăn, găp djuê, lehanăn ƀuôn sang tŭ drông sa čô mnuih mrâo hlăm ƀuôn sang. Nai prĭn Bùi Ngọc Quang, K’iăng khua anôk bruă kriê pioh ksiêm hriam ngăn drăp djuê ana Việt Nam, brei thâo: 

Pătdah jih djuê ana ti Lăn Dap Kngư mkŏ mjing knăm ƀhur knga. Leh hđeh mrâo kkiêng, arăng mâo klei mĭn tơdah ka truh sa thŭn hđeh ka thâo blŭ, yap jing msĕ si sa čô mnuih ka dôk hŏng ƀuôn sang ôh, snăn bi mkŏ mjing kơ hđeh sa klei bhiăn tŭ jum dhar kreh mơ̆ng ƀuôn sang. Ti Lăn dap kngư grăp čô mnuih, gŏ sang, găp djuê lehanăn ƀuôn sang jing dôk hlăm klei thâo bi mguôp mbĭt. Kyuanăn knăm ƀhur knga mkŏ mjing kơ sa čô hđeh mrâo kkiêng ƀiădah bruă anei jing mkŏ mjing hŏng jih jang mnuih thâo.

Ngă klei ƀhuê knga, leh amĭ mrâo kkiêng, gŏ sang kčưm mprăp dŭm mta mnơ̆ng kơ klei ngă yang, msĕ si: ŭn mnŭ kpiê êsei, tơdah gŏ sang thâo mâo dưi čuh êmô kbao anôk ngă yang kă hlăm sang, anôk ngă yang mkra hŏng alê. Đinh Ply, Khua êpul djuê ana Bahnar ti ƀuôn dhar kreh hiu čhưn ênguê dŭm djuê ana Việt Nam, brei thâo:

Anôk ngă yang mkra điêt, ênưih ƀuh lehanăn ênưih hdơr. Ngă yang iêo yang adiê, lehanăn atâo atiêt hriê čhưn hŏng gŏ sang.

 KhiTơdah jih jang mnơ̆ng ngă yang djăp ênŭm leh, snăn pô sang iêo pô riu yang nao ngă yang. Tui hlue mdê bi djuê ana, pô riu yang nao ngă yang amâodah amĭ ama hđeh anăn mtam ngă yang. Knăm ƀhur knga kreh mkŏ mjing hlăm tlam, ƀiădah mơ̆ng aguah leh, jih jang mnuih hlăm găp djuê mâo jak iêo hriê bi huă ƀơ̆ng yang hrue dơ̆ng. leh huă ƀơ̆ng truh yơh kơ mmông riu yang. Klei ƀhur knga kreh mkŏ mjing anăn jing ƀhur knga tĭng kơ hnuă êlâo lehanăn knga tĭng kơ điâo êdei. Pô riu yang srăng yua sa ƀĕ đĭng đrao dlông hlăm brô 30 cm kriêt hĕ bi jăk dua akŏ đĭng. Leh kơ anăn ap ti knga hđeh ƀhur yơh dj’djĕ mbĭt hŏng dŭm klei kwưh čiăng kơ hđeh mâo klei suaih pral klei jăk jĭn.

Pô riu yang yơh mâo klei hơêč hmưi tal êlâo kơ hđeh điêt anăn, leh kơ anăn truh mơ̆ng grăp čô msĕ si amĭ ama hđeh, găp djuê, lehanăn ƀuôn sang nao bi hơêč hmưi kơ hđeh. Dah anak mniê bi thâo gui djuh, duh êa, thâo mñam kpin ao, čang hmăng jing sa čô kƀăt mniê wiê mtih; bi tơdah anak êkei, jing sa čô mnuih thâo đăm gua lua mnah, thâo djă kju đao thâo răng kriê ƀuôn sang. Nai prĭn Bùi Ngọc Quang, K’iăng khua anôk bruă ksiêm hriăm kơ ngăn drăp djuê ana Việt Nam, lŏ brei thâo:

Mnuih Lăn dap kngư ruah hrue wăn êđăp ênang mkŏ mjing klei ƀhur knga kơ hđeh. Pô mkŏ mjing knăm ƀhur knga hưn mthâo, hrue anei gŏ sang mkŏ mjing mbĭt hŏng ƀuôn sang ngă klei ƀhur knga kơ hđeh mrâo kkiêng . Pô mkŏ mjing klei ƀhur knga jing mnuih blŭ tal elâo, leh kơ anăn jing amĭ ama hđeh, lehanăn jih jang mnuih riêng gah mâo klei blŭ. Grăp čô mnuih bi mguôp ƀiă klei blŭ yap hđeh mrâo kkiêng anăn jing mnuih hlăm ƀuôn sang pô leh, lehanăn mâo klei hơêč hmưi kơ hđeh anăn djăp mta klei jăk, ƀuăn mjuăt mgô mtô bi hriăm hđeh anăn jing mnuih tŭ dưn kơ ƀuôn sang.

  Leh dŭm klei bi hơêč hmưi kơ hđeh pô mkŏ mjing knăm ƀhur knga tak ti kƀuê hđeh lehanăn ti adhei hđeh. Anăn jing klei bi knăl kơ klei bi ruĕ klei ƀhur knga, mơ̆ng anăn jih jang mnuih nao hlăm klei čhưn mơak mnăm kpiê êsei. Phung mâo klei jak iêo nao hlăm knăm ƀhur knga dưi djă ba ya mta mnơ̆ng pô mâo mguôp mbĭt hŏng gŏ sang mkŏ mjing knăm ƀhur knga.

Tui si klei bhiăn mnuih hlăm čư̆ čhiăng lăn dap kngư anak mnuih mâo klei thâo săng kbiă hriê mơ̆ng ƀăng knga. Grăp čô mnuih leh mrâo kkiêng bi ngă sơăi klei ƀhur knga, kñăm čiăng jing mnuih thâo săng mgi dih. Hlăm brô sa hrue kăm leh ƀhur knga, amĭ hđeh nao kơ sang riêng gah čiăng tŭ mă mnơ̆ng mơ̆ng mnuih riêng gah mđup brei kơ hđeh điêt, msĕ si wăng điêt, añŭ, amâodah sa kpăt kpaih, bŭl mrai… amâo mâo mđing kơ klei tŭ dưn ôh, ƀiădah jing dŏ bi hmô, pioh hmăng hmưi kơ hđeh anăn mâo nanao klei suaih pral, mgi dih mâo klei hdĭp êđăp ênang trei mđao./.