Tui si knơ̆ng bruă dhar kreh, mjuăt asei mlei lehanăn hiu čhưn ênguê čar  Lâm Đồng, ênoh jih jang phung tue hiu čhưn lehanăn đih đăm hlăm wưng anei truh hlăm brô 650.000 gưl čô mnuih, hlăm anăn tue mơ̆ng ala tač êngao hlăm brô  30.000 gưl čô mnuih, ênoh mâo ba wĭt mơ̆ng bruă hiu čhưn ênguê hlăm brô 1.200 êklai prăk. Hnơ̆ng mâo dưn yua adŭ jưh dôk kah knar mơ̆ng 70–80%, hjăn hlăm dŭm boh sang jưh djăp mơ̆ng 3–5 mtŭ jing mơ̆ng 85–90%.

Čiăng dưi duh kơ phung tue hŏng klei jăk, čar Lâm Đồng mâo hlue ngă leh djăp hdră mă bruă hŏng klei jăk, rơ̆ng kơ klei êđăp ênang, klei êđăp ênang êlan klông, bi mdoh wăl hdĭp mda lehanăn klei doh êƀăt mnơ̆ng ƀơ̆ng. Dŭm anôk ngă bruă hiu čhưn ênguê hlue ngă kjăp bruă djŏ ênoh, amâo mâo klei duah kpĭ ênoh, mjing bruă hiu čhưn ênguê jing anôk kreh dhar, mâo klei thâo khăp.

Đà Lạt lŏ dơ̆ng jing anôk truh mâo lu gŏ sang hrŏng ruah. Lê Văn Trọng, tue hriê mơ̆ng čar Daklak lač:

“Ƀuh klei thâo khăp hŏng tue, dơ̆ng mơ̆ng anôk huă ƀơ̆ng, anôk đih mdei, lehanăn dŭm lăn mnga êa siam mâo hưn mdah bŏ hŏng klei jăk. Leh truh hlăm war mnga anei kâo ƀuh klei bi mlih siam êdi mơ̆ng čar Lâm Đồng mrâo, klei bi mlih jăk mơ̆ng lăn čar čhuang hlăm thŭn 2026”.

Êjai anăn, alŭ wăl nah ngŏ čar Lâm Đồng ăt mâo tŭ jum sa ênoh tue lu mơh.  Nguyễn Thành Công, tue hriê mơ̆ng ɃP. HCM lač:

“Kâo ruah hriê čhưn kơ Phan Thiết lehanăn Mũi Né. Kâo nao čhưn leh ti Suối Tiên, Lâu Đài rượu vang, đĭ êdeh jeep, waih sup… lehanăn mâo mmông mdei msăn. Gưl hiu čhưn akŏ thŭn anei kâo khăp đuĕ hiu dlăng lăn mnga êa siam”.

Wưng anei, lu bruă dhar kreh – hlăp mbul mâo mkŏ mjing msĕ si Countdown – kkuh mơak thŭn bhang mrâo 2026 ti Đà Lạt, Mũi Né lehanăn alŭ nah yŭ Lâm Đồng; hŏng lu bruă kdŏ muiñ, knăm mơak ti dŭm alŭ wăl anôk hiu čhưn ênguê. Boh nik, Lâm Đồng mkŏ mjing kkuh drông gưl phiơr tal êlâo hlăm thŭn 2026, drông 200 čô tue, đru hưn mthâo anôk truh jăk siam êđăp ênang lehanăn bŏ hŏng klei thâo khăp.

Kyua mâo prăp êmiêt bŏ hŏng klei jăk, bruă hiu čhưn ênguê Lâm Đồng ƀri wưng akŏ thŭn bhang mrâo 2026 dưi djăp leh bruă mprăp kơ klei hiu čhưn ênguê, mdei msăn mơ̆ng phung tue. Mơ̆ng klei mphŭn kčưm anei, Lâm Đồng djăp leh ênoh čoh čuăn drông êbeh 25 êklăk gưl čô tue hlăm hlăm thŭn 2026, bi klă klei găl kơ bruă hiu čhưn ênguê jăk mrô sa kluôm ala./.