Hlăm ai êwa adiê êăt mdê hjăn, dap kngư Măng Đen jăk siam leh anăn mtah mda ti krah dap kngư liă lia. Yan adiê êđăp, bi êdah êa mil mtah mda mnga anh đào čuh blang, mjing wăl knăm mơak hơuh mđao, bŏ hŏng jăk siam mơ̆ng hruê akŏ thŭn mrâo.

Măng Đen mơ̆ng sui dưi bi msĕ sa “wăl jăk siam mtah”, anôk lăn adiê bi tuôm, ai êwa mơ̆ng dliê kmrơ̆ng hlai mbĭt hŏng ai hdĭp êđăp ênang. Thŭn 2025, Măng Đen lŏ dơ̆ng bi mklă kơhưm jing sa hlăm dŭm anôk truh jăk siam mơ̆ng Việt Nam tơdah drông giăm 2 êklăk gưl tue, hlăm ênoh hlăm brô 5 êklăk gưn tue nao Quảng Ngãi, đru mguôp yuôm bhăn hlăm ênoh hrui wĭt hiu čhưn ênguê êbeh 3.700 êklai prăk mơ̆ng kluôm čar.

 Hlăm knăm mphŭn pŏk Hruê kăm dhar kreh  - hiu čhưn ênguê Măng Đen 2026,  Y Ngọc, K’iăng  Khua Knơ̆ng bruă Sang čư̆ êa čar Quảng Ngãi, brei thâo, čar ƀuăn rơ̆ng bi leh, mkra mđĭ wăl bi liê hiu čhưn ênguê; yua tŭ dưn klei găl, klei gĭr mkŏ mjing Măng Đen jing anôk truh hiu čhưn wăl hdĭp mda, mdei msăn gưl dlông, mđĭ kyar kjăp, năng hŏng klei jing sa anôk jăk siam mơ̆ng krĭng wăl leh anăn lu ala čar:

“Măng Đen hruê anei amâo djŏ knŏng jing anôk truh hliê ôh ƀiădah jing anôk mkŏ, bi klin hlăm wăl bi hgŭm Dliê - êa ksĭ mơ̆ng čar Quảng Ngãi mrâo. Mkŏ klei êăt mơ̆ng dap kngư Măng Đen hŏng adiê angĭn jiă kma mơ̆ng plao ksĭ Lý Sơn, Mỹ Khê; mkŏ wăl dhar kreh čing čhar đưm đă hŏng mnơ̆ng kriê pioh dhar kreh Sa Huỳnh”.

 Hdră kdŏ mmuñ dưi mkŏ mjing jăk siam, kah mbha jing 3 hdră “Anôk lăn adiê bi tuôm”, “Klei jăk siam dap kngư” leh anăn “Hdơr kơ krĭng jăk siam”. Dŭm klei kdŏ mmuñ jăk siam msĕ si: Klei yăl dliê kơ Măng Đen, êa mil mnga đào Măng Đen, klei mmuñ kơ Măng Đen, mlam mơak čing čhar, dra, pu dap kngư… lŏ kơrŭ wĭt klei jăk siam čư̆ dliê êa,  dhar kreh leh anăn anak mnuih Măng Đen, ba kơ phung tue hiu čhưn sa klei mgei ai tiê jiă kma dap kngư.

Dương Tấn Nhựt, mnuih ƀuôn sang wăl Lý Sơn, čar Quảng Ngãi nao hiu čhưn ênguê ti Măng Đen, brei thâo:

“Gưl mdei knăm mơak, Tết hlăm thŭn mrâo, kâo ƀuh hdră kdŏ mmuñ jăk snăk. Mơ̆ng anăn lar bra, đru mđĭ dhar kreh, hiu čhưn ênguê čar Quảng Ngãi. Quảng Ngãi leh anăn Kon Tum mrâo bi mŭt, kyua anăn mnuih ƀuôn sang ăt mâo klei găl ksiêm hriăm, mjĕ êrô dhar kreh plah wah dua krĭng Ngŏ leh anăn Yŭ čar Quảng Ngãi”.

 Hruê kăm Dhar kreh - hiu čhưn ênguê Măng Đen 2026 hŏng lu bruă ngă lu jơr msĕ si: Knăm mơak kpŭng mđung hŏng êwa, hdră kdŏ mmuñ “Măng Đen hruê mrâo”, knăm mơak mnơ̆ng dhơ̆ng OCOP, klei rang mdah mnơ̆ng dhơ̆ng lŏ hma leh anăn êa drao, dŭm bruă mjuăt asei mlei - lông čhưn dlăng leh anăn tour hiu čhưn hlăm wăl dliê kmrơ̆ng, ba kơ tue hiu čhưn klei jăk siam, amâo dưi wơr ôh hlăm krĭng lăn dap kngư Măng Đen./.