Jing sa djuê ana hdĭp sui leh hlăm duôr čư̆ prŏng lăn dap kngư, hdĭp jĕ giăm hŏng lăn ala dliê kmrơ̆ng, mnuih Bahnar hdĭp mbĭt hŏng dliê, hdĭp mơ̆ng dliê. Lehanăn mâo klei bi lač, djiê jing ka jih ôh. Mbĭt hŏng klei dôk hdĭp ară anei, lŏ mâo sa klei hdĭp mđrĭng mbĭt anăn, anăn jing klei hdĭp mơ̆ng mnuih leh djiê, mơ̆ng yan adiê. Kyua klei mĭn msĕ snăn, mnuih Bahnar mâo leh sa knăm mdê hŏng arăng, anăn jing knăm lui msat jing klei bi ktlah mnuih leh djiê, wĭt nao hlăm klei hdĭp yang atâo. Kyua klei mĭn anăn, knăm lui msat amâo mâo klei lŏ bi čŏk hia ôh, ƀiădah mnuih ƀuôn sang hlăm ƀuôn bi tông čing, huă mnăm, kưt muiñ mơak mñai msĕ si sa klei huă mnăm bi ktlah knhal tuič hŏng sa čô mnuih. Lehanăn sa mta klei amâo mâo dưi kƀah ôh hlăm knăm lui msat anăn jing mkra mjing rup krah hlăm wăl sang msat. Jih jang bruă ngă anăn jing bi êdah ai tiê klei khăp mnuih dôk hdĭp hŏng mnuih leh djiê. Pô ngă bruă krah mkra rup Đinh Tiến Hải, jing pô pioh leh lu hrue mmông ksiêm duah kơ dhar kreh lăn dap kngư, brei thâo:

"Tơdah leh mâo sa čô mnuih djiê, snăn diñu bi lač anăn jing ka djŏ klei djiê ôh, ƀiădah đuĕ nao hlăm klei mdei. Tui si klei mĭn êlâo dih, jih jang ngăn dŏ mâo hlăm sang mơ̆ng mnuih Bahnar, ya dŏ mâo jing bi mbha yơh hŏng mnuih leh djiê sa kdrêč, ƀiădah jih jang mnơng anăn mkra hĕ jing mdê mơh, msĕ si čăm bi hluh hĕ, amâodah bi ƀet ƀot hĕ. Truh knăm lui msat, arăng bi lač mnuih leh djiê srăng đuĕ kbưi lă lar yơh hŏng mnuih hdĭp, snăn mnuih dôk hdĭp kah yơh jih ai tiê klei khăp pô mâo hŏng mnuih djiê, snăn yơh bi mkra rup sang msat. Jih jang rup anăn dưi mdơ̆ng hlăm wăl kƀŭt msat mnuih djiê, rup anăn srăng bi ala kơ mnuih dôk hdĭp tui hlue mnuih djiê nao hlăm klei hdĭp yun dih. Snăn knăm lui msat leh ruĕ jih jang rup krah anăn dôk tinăn”.

Čiăng mâo ngă rup krah, mnuih hlăm gŏ sang lehanăn găp djuê bi djă kgă jông nao hlăm dliê druôm kyâo, krah mkra rup. Diñu ruah ana kyâo mâo boh prŏng truh 30 cm kơ dlông pioh krah mkra. Knŏng hŏng kgŭ, dhŏng kŭt, dhŏng klŏk, jông, mnhat mnuih thâo mbruă bi krah mkra jing rup tui si pô čiăng tui si klei mĭn mdê mdê čiăng lač kơ klei hdĭp. Mơ̆ng anăn mơh mnuih krah mkra rup sa čô čŏng bi krah mă tui si klei pô bi mĭn leh, dưi mjing mtam rup krah mdê mdê bi êdah kơ klei hdĭp mdê mdê.

Jih jang rup krah hlăm sang msat tăp năng mâo rup čĭm, rup hlô, amâodah rup mnơ̆ng mnuă yua aguah tlam. Ƀiădah lu êdi kreh ƀuh jing mâo rup mnuih dôk dơ̆ng, rup mnuih dôk gŭ, rup mnuih dôk bi kmiêk, dlăng msĕ si dôk hdĭp, grăp boh rup mnuih mâo knhuah ƀô̆ mta mdê mdê. Lu êdi kreh ƀuh hlăm sang msat anăn jing rup mnuih dôk gŭ kmiêk hĕ kơŭt, pŭ hĕ kang, dlăng ƀô̆ mta dôk ênguôt ală dôk dlăng pha anôk taih kbưi adih. Mâo klei bi lač, rup krah anei jing bi ala kơ mnuih hlăm găp djuê, gŏ sang hrue mlam dôk hlăm msat bi yăl dliê , blŭ hrăm mbĭt. Lehanăn lŏ mâo mơh lu mta rup, mnuih dôk tông čing, hgơr, mnuih dôk tăp mdiê, rup sa čô mniê ba tian, rup klei hdĭp ung mô̆. Snăn kơ jih jang rup anăn amâo mâo klei huĭ hyưt ôh, ƀiădah msĕ si bi hdơr kơ klei hdĭp, čiăng lač kơ klei hdĭp djiê ka jih ôh, knŏng lŏ nao hlăm sa klei hdĭp mkăn. Jih jang nao hlăm sa mta klei dôk ka thâo săng, klei dôk êpa mhao, jing kdlưn hĭn kơ klei khăp anak mnuih, lă lar anăp srăng lŏ bi tuôm hlăm anak mnuih. Pô kač rup Đinh Tiến Hải, lač:

 Cphung thâo krah mkra ară anei, dưi ngă lu mta rup siam, ƀiădah ciăng dưi mâo rup krah ti sang msat, snăn amâo mâo djŏ ôh jih jang mnuih thâo hĕ sơăi. Kyuadah rup krah sang msat anăn amâo mâo djŏ knŏng jing rup krah mkra mă mơ̆ng kyâo đuič ôh, ƀiădah tinei ñu jiă kma hlue hŏng ai tiê mnuih krah mjing. Ñu krah mjing tinăn jih ai tiê klei mĭn diñu kñăm bi êdah hlăm rup anăn sơăi, mjing rup anăn jing dŭm mta rup čiăng lač djŏ kơ klei hdĭp aguah tlam”.

Phung thâo krah mkra rup mơ̆ng djuê ana pô ñu nao djŏ hŏng klei hdĭp aguah tlam mlam hrue, jih jang rup anăn čŏng bi êdah djŏ hŏng ai tiê pô mkra. Êjai dlăng kơ rup sang msat, tinăn drei dưi thâo săng sa kdrêč kơ knhuah gru dhar kreh krĭng lăn anăn nao mđrĭng hŏng knhuah bhiăn mâo mă hjăn krĭng anăn. Mnuih djiê hlăk ênuk dôk hdĭp, si knhuah dôk dơ̆ng ƀơ̆ng huă, ya mta bruă ngă, knuih kniêng si jing… snăn ƀuh sa kdrêč hlăm rup krah sang msat ñu. Lương Thanh Sơn,  Khua kiă kriê sang dăp pioh djuê ana čar Daklak, brei thâo:

"Jih dưr lehanăn dhŭng lăn dap kngư, arăng bi mpŭ kơ bruă mkra rup krah hlăm sang msat. Arăng bi krah mjing hŏng jih ai tiê, ƀhĭ klĭ, ngă mkra yơh ya dŏ jing jăk siam hĭn kơ mnuih leh djiê. Ƀiădah ăt mâo mơh anôk mde hĕ, nah dưr lăn dap kngư, lu jing krah mjign rup mnuih, ƀiădah krĭng nah dhŭng lăn dap kngư, mnư̆ sang msat tinăn mkra lu rup krah mnơ̆ng rông, jing mnơ̆ng jĕ giăm hĭn hŏng anak mnuih".

Dŭm mta rup krah ti sang msat mnuih Bahnar klă sĭt jing rup lač djŏ kơ klei hdĭp, mâo mkra hŏng klei mbruă, klei thâo bi msiam lač djŏ kơ knhuah hdĭp mnuih djuê ƀiă. Rup krah sang msat mnuih djuê ana Bahnar đru bi kriê pioh leh sa knhuah gru dhar kreh jăk siam ti Việt Nam.