Hlăm ai êwa mčhĭt mơuăt mơ̆ng ênhiang mmuñ lehanăn kdrăp tông ayŭ jiă knhuah djuê ana Lao, mnuih ƀuôn sang lehanăn phung tuê hiu čhưn ênguê dưi nao dlăng klei tông čing čhar, mdah brô̆ T’rưng, ayŭ ki, ênhiang mmuñ Lăm vông êdu ê’un, mdah kdrăp čŭt hơô pơ̆k mñam djuê ana đưm hŏng akŏ Êa mil krĭng dap kngư. Dŭm ênhiang kdŏ mmuñ msĕ si Mnga siam Chăm Pa, Sao Ken Fai, Sa La Vắn, I Kơng Đươn Đao… jak iêu lu phung tue hiu čhưn kdŏ mbĭt hŏng phung êkei êdam, mniê êra Lao.

Mbĭt hŏng anăn, jing knăm sač êa mâo boh tŭ yuôm čiăng hưn jih leh yan bhang, akâo kơ adiê jăk êa hlĭm hjan, djăp mta ra mnơ̆ng čăt jing. Anei ăt jing sa klei bhiăn čiăng bi êdah klei hơêč hmưi mơ̆ng mnuih Lao, lui jih klei amâo jăk, amâo mbhă lehanăn tŭ drông dŭm klei jăk siam, yâo mơak hlăm thŭn mrâo.

Truh ti Dak Lak hiu čhưn ênguê hlăm wưng knăm mơak anei, Đỗ Hoàng Việt, ti čar  Phú Yên brei thâo:

“Hruê anei kâo bi kngăr êdi dưi tui ksiêm kơ sa knăm mơak sač êa mơ̆ng mnuih Lao hdĭp ti krĭng Ƀuôn Đon mơ̆ng Dak Lak. Kâo ƀuh krĭng lăn Dak Lak siam êdi, anei jing sa hlăm dŭm anôk jak iêu lu tuê hiu čhưn ênguê, boh nik phung tuê mơ̆ng krĭng  ktuê hang ksĭ mơ̆ng Phú Yên, Bình Định”.

Knăm mơak sač êa lehanăn tui ksiêm kơ dhar kreh Lao jing sa hlăm dŭm hdră dhar kreh dưi mkŏ mjing ti Dak Lak ƀri wưng bi hdơr 50 thŭn hruê hluh lir lăn čar. Aduôn Nguyễn Lê Thanh Thảo, mnuih hgŭm hlăm êpul mkŏ mjing brei thâo:

“Hmei ruah dŭm hdră hlăp čhưn mơak hlak, jăk êdi čiăng hưn mthâo truh kơ mnuih Dak Lak lehanăn phung tuê hiu čhưn ênguê. Anei ăt jing sa hlăm dŭm hdră mâo mnuih ƀuôn sang lehanăn tuê hiu čhưn ênguê dưi nao hlăp čhưn mbĭt, amâo djŏ knŏng nao dlăng ƀiădah dưi hrăm mbĭt hlăm jih jang hdră msĕ snăn, mơ̆ng anăn mjing klei jăk jĭn êdi, mjing klei bi mklă jăk siam kơ pŏk rup hiu čhưn ênguê ti Dak Lak.

Lu hdră tui ksiêm dhar kreh dưi mkŏ mjing ti ƀuôn prŏng Ƀuôn Ama Thuôt lehanăn dŭm kdriêk ti Dak Lak. Dhar kreh djuê ana Thái, djuê ana Lao mâo mnuih ƀuôn sang hưn mthâo truh kơ phung tuê hiu čhưn ênguê hluê hŏng dŭm mta mnơ̆ng ƀơ̆ng, ênhiang mmuñ, ênhiang kdŏ lehanăn klei hlăp lêñ. Hdră rang mdah dŭm mta mnơ̆ng OCOP; tour Rafting waih mran găn drai, tour đĭ êdeh hiu dlăng dliê găn drai êa; Hruê mơak mđung kpŭng hŏng êwa ăt mâo dŭm krĭng hiu čhưn mkŏ mjing hŏng hnơ̆ng prŏng.

Ti Dak Lak thŭn anei lŏ mâo lu mta mrâo hlăm hdră bi mjĕ mjuk dhar kreh, kdŏ mmuñ hŏng čar Mondulkiri (Campuchia) lehanăn hdră mjĕ mjuk kdŏ mmuñ Dak Lak – Phú Yên mguôp hŏng klei hưn mdah kơ kan ngừ êa ksĭ, jak iêu lu mnuih ƀuôn sang lehanăn tuê hiu čhưn ênguê nao dlăng. Đỗ Hoàng Việt, ti čar Phú Yên brei thâo:

“Ti anăp, 2 alŭ wăl mâo klei bi mŭt mbĭt kyua anăn kâo ăt čiăng hriê tui ksiêm mơh. Kâo hriê leh ti Ƀuôn Ama Thuôt lu blư̆ ƀiădah gưl anei kâo ƀuh krĭng lăn anei mâo lu klei bi mlih, bi mlih siam êdi ƀiădah ăt jĕ giăm mơh”./.