
Leh wĭt hiu mdah ti ala čar Australia, pô mbruă Rơ Châm Tih (ƀuôn Jut 1, să Ia Dêr, kdriêk Ia Grai) lŏ gut gut hŏng đĭng đrao, đĭgn m’ô mkra mjing kdrăp pĕ tông. Hŏng kiê kngan mbruă ñu, dŭm mta mnơ̆ng dlăng jing hơăi mang, ƀiădah jing leh čing pah Klŏng Put, kŏk T’rưng, Kơni, Ting Ning... Êbeh kơ 30 thŭn siă suôr hŏng čing čhar hŏng kdrăp pĕ tông djuê ana pô, Rơ Châm Tih amâo mâo djŏ knŏng jing mnuih thâo ba yua mnơ̆ng anăn, ƀiădah ñu lŏ jing mnuih kriê pioh lehanăn hiu hưn mdah hŏng lu anak mnuih tar rŏng lăn thâo kơ ênhiang mñê mơ̆ng kdrăp pĕ tông djuê ana pô, đuĕ nao truh kơ ala čar Angle, Mi, Dhŭng Korea, Finland, lao, Campuchia... Knư̆ đuĕ hiu kbưi, knư̆ ñu ƀuh kdrăp pĕ tông djuê ana Jarai mâo klei mde edi hŏng arăng tač êngao:
“Kdrăp pĕ tông djuê ana pô mâo klei mdê êdi, arăng dê amâo mâo ôh. Mơ̆ng đĭng đrao, čŏng pô duah bi mĭn lehanăn mkra, hŏng klei êmăt mơ̆ng knga dôk mđing mgăl ênai mñê, pô kriêt mkra, tui si aêa duôn pô đưm mtô bi hriăm drei lŏ tui ngă, amâo mâo masin yua, hlŏng truh kơ klei hlăp, klei drei mdah jing mdê êdi ênhiang djuê ana pô si drei mâo leh drei mdah dŏ anăn yơh”.

Lŏ čuê bruă mơ̆ng amiêt khua awa mduôn, phung hđeh mda asei mnuih Jrai hrue dôk gĭr bi kriê pioh hŏng dhar kreh djuê ana. Siu Ting Ning – 15 thŭn, ti ƀuôn Jut 1, să Ia Dêr, kdriêk Ia Grai, gơ̆ mâo amĭ ama bi anăn hŏng kdrăp pĕ tông jing đĭng Ting Ning. Mơ̆ng điêt ama ñu dôk kriê pioh djă yua kdrăp pĕ tông dhar kreh pô, hiu mdah klei tông čing čhar ti sang Roong hlăm dŭm knăm mơak djuê ana.Ară anei Siu Ting Ning mbĭt hŏng mah jiăng jhŏng mkŏ mjing êpul tông čing hđeh, mdah kơ tue hiu čhưn, lehanăn hiu mdah ti dŭm sang huă ƀơ̆ng hlăm ƀuôn prŏng Pleiku lehanăn dŭm knăm mơak, hdră bi mguôp dhar kreh hŏng čar mkăn. Ti anôk nao, Ting Ning ăt hnêč hưn mthâo kơ dhar kreh djuê ana pô, hŏng dŭm ênai čing hlŏng truh kơ dŭm kdrăp pĕ tông mkăn:
“Êpul tông čing hmei jing hđeh kkiêng mơ̆ng thŭn 2008 - 2011. Mâo mniê 7 čô, êkei 5 čô. Êpul mâo nao mdah giăm anei hĭn ti wăl tač Đại đoàn kết (Pleiku), hlăm kdriêk; kbưi truh Quảng Ngãi, Quảng Trị. Pô hưn mdah kơ knhuah gru kdrăp pĕ tông djuê ana pô, lehanăn ktrâo kơ arăng hlăm klei čĭng tông. Kâo ƀuh mơak snăk kơ knhuah gru dhar kreh djuê ana pô. Kâo čang hmăng klei anei srăng dưi kriê pioh nanao kơ êdei anăp”.

Kriê pioh lehanăn mđĭ bi lar knhuah gru dhar kreh pô jing bruă phŭn hlăm čar Gia Lai, hlăm anăn mâo kdriêk knông lăn Ia Grai jing sa anôk bi hmô. Lê Thị Phương Loan, Khua anôk bruă dhar kreh hâo hưn kdriêk Ia Grai brei thâo, alŭ wăl mâo leh hdră mă bruă truh hŏng dŭm să lŏ kơrŭ wĭt knhuah gru dhar kreh aê aduôn đưm, msĕ si mdơ̆ng sang roong, mkra wĭt pin êa, mkŏ mjing dŭm knăm mơak ti gưl kdriêk hlăm grăp thŭn. Hŏng lu hdrtă mâo mkŏ mjing leh, Ia Grai jing sa anôk bi hmô rŭ mjing wăl hiu čhưn ênguê dhar kreh jăk siam hlăm krĭng knông lăn čar:
“Hjăn kdriêk Ia Grai, mơ̆ng thŭn 2000 mâo leh dŭm hdră mtrŭn bi kriê pioh, bi lar knhuah gru dhar kreh mđrĭng kơ bruă mkŏ mjing klei hiu čhưn ênguê. Djŏ hŏng klei aê aduôn pô tuôm lač leh, kreh kruiñ duh ƀơ̆ng snăn kơh mâo mnơ̆ng ƀơ̆ng huă, kdriêk đru leh kơ dŭm să mkŏ mjing dŭm knăm mơak, mkŏ mjing bi lông mran čông, kưt muiñ tông čing čhar bi lar jih jang dhar kreh anăn hŏng tue hiu čhưn. Bi mnuih ƀuôn sang, ƀuh kơ pô mâo klei đru čung ba snăn digơ̆ gĭr hĭn”.

Čiăng kriê pioh lehanăn mđĭ bi lar knhuah gru dhar kreh čing čhar lăn dap kngư truh hŏng kluôm ala, knơ̆ng bruă sang čư̆ êa čar Gia Lai hlăk mâo lu hdră mđrăm mbĭt msĕ si ba čing čhar mtô hlăm sang hră, ngă bruă mrô sơăi hŏng jih jang bruă dhar kreh, đru kơ mnuih mbruă, lŏ kơrŭ bruă mơ̆ng đưm… Grăp thŭn, čar mkŏ mjing lu bruă prŏng msĕ si hrue kăm dhar kreh – hiu čhưn ênguê, hrue mơak dhar kreh djăp djuê ana, klei bi lông čing čhar kluôm čar… Jih jang jing hlue hŏng dhar kreh alŭ wăl, mjing knơ̆ng, pioh lŏ kởŭ wĭt, mpŭ mni. Nguyễn Quang Tuệ- Khua adŭ bruă dhar kreh, mjuăt asei mlei lehanăn hiu čhưn ênguê čar Gia Lai brei thâo:
“Čar Gia Lai mđing kơ jih jang djăp alŭ wal yang ƀuôn hlăm čả Gia Lai dưi hưn mdah kơ knhuah gru dhar kreh pô mâo leh mơ̆ng đưm hŏng tue hiu čhưn ênguê, lehanăn hŏng phung mđing kơ dhar kreh mnuih ƀuôn sang, mđĭ hĭn ai tiê klei khăp, čiăng kơ jih jang bi đru kriê pioh, dhar kreh mơ̆ng aê ama pô đưm”.
Yan mnga, jing yan huă mnăm ti lăn dap kngư, ară anei ênai čing čhar lehanăn Ting Ning, Klŏng Put kwang. Asăp ênai mơ̆ng mphŭn dô lŏ dơ̆ng kwang hlăm ƀuôn sang, hlăk dôk lŏ bi kriê pioh. Lehanăn ti anăn, ktur nanao dŭm ai tiê djă pioh anăn jing pô lŏ bi lả hưn mdah hŏng mah jiăng thâo kơ klei guh mngač dhar kreh, mkŏ knhuah gru aê ama pô mơ̆ng đưm hlŏng kơ êdei anăp./.
Viết bình luận