Hlăm anăn, Knăm mơak knhuah gru kphê tar rŏng lăn mơ̆ng hrue 18/12 - 2/1/2026, hŏưng bruă kñăm lông dlăng dŭm knhuah gru kphê tar rŏng lăn, alŭ wăl rang mdah – klei lông mnăm kphê, mnơ̆ng ƀơ̆ng huă, lehanăn dŭm klei kưt muiñ, msĕ si mlam kdŏ muiñ kphê – ƀuôn prŏng čư̆ čhiăng, knhuah siam Dhŭng amrĭk, Noel lehanăn mơak thŭn mrâo 2026. Nguyễn Văn Lộc – Khua knơ̆ng bruă dhar kreh, mjuăt asei mlei, lehanăn hiu čhưn ênguê čar Lâm Đồng lač, kphê amâo mâo djŏ jing mnơ̆ng kơ bruă duh mkra phŭn, ƀiădah lŏ jing klei bi knăl kơ dhar kreh, kơ knhuah gru hdĭp, djŏ tuôm hŏng hƀuê ênuk, klei hdĭp dhar kreh mơ̆ng lu ala čar. Hŏng êbeh 100 thŭn đĭ jing, Lâm Đồng bi klă leh bruă klam yuôm bhăn mơ̆ng klei tŭ dưn kphê Việt Nam, mđrĭng hŏng klei duh mkra pla mjing ti hnơ̆ng tŭ, mkra mjing kjăp, knhêč lehanăn hiu čhưn ênguê kphê.

 “Mơ̆ng dŭm bruă lông ngă, klei rang mdah, klei mjĕ mjuk dhar kreh, lehanăn klei bi kƀĭn lu ala čar, knăm mơak srăng mjing sa anôk bruă dưi pŏk mlar, anôk kphê Việt Nam dưi mdưm hlăm hdră êlan mbĭt kphê tar rŏng lăn. Hlăm wưng tinăp, čar Lâm Đồng čang hmăng knăm mơak srăng jing bruă mkŏ mjing jêñ jêñ mâo klei hing ang, jiă knhuah mơ̆ng Lâm Đồng, jing anôk bi kčah kơ phung khăp kơ kphê hlăm tar rŏng lăn.”

Hlăm knăm mơak anăn srăng mâo klei bi kƀĭn kphê tar rŏng lăn, dŭm bruă ruĕ hlăm êlan klông, lehanăn hưn mdah klei bi hgŭm Kphê Việt Nam – Tar rŏng lăn, iêo jak lu mnuih ƀuôn sang lehanăn tue, pŏk klei găl bi hgŭm ala tač êngao, mtrŭt klei đĭ kyar kjăp bruă kphê lehanăn hiu čhưn ênguê, dhar kreh Đà Lạt – Lâm Đồng.

Hlăm adiê êăt mơ̆ng Đà Lạt, alŭ wăl jŭm ênao Xuân Hương kdrăm k’ah hŏng knăm ruĕ hlăm êlan klông, sa bruă ngă êdah êdi hlăm knăm čing čhar Ngŏ dhŭng Asi thŭn 2025. Krah anôk jăk siam mơ̆ng ênao êa, dliê hngô, lehanăn mnga bi mdah klei siam hlăm êwa čing kwang bŏ čư̆ čhiăng, nao mbĭt hŏng knhuang čhuang mơ̆ng dŭm êtuh čô mnuih hriê mơ̆ng dŭm boh čar: Daklak, Gia Lai, Quảng Ngãi, Phú Thọ lehanăn čar Lâm Đồng. Grăp êpul, grăp djuê ana ba hriê hŏng knăm mơak sa knhuah siam dhar kreh pô, mâo mjing leh sa pŏk rup siam bŏ hŏng dhar kreh čing čhar Việt Nam lehanăn alŭ wăl Ngŏ Dhŭng Asi. Nao hlăm knăm mơak, pô mbruă Trần Ngọc Dũng, djuê ana Thái, hrie mơ̆ng čar Phú Thọ, lač:

 “Hŏng kâo krĭng lăn mnga Đà Lạt ñi bi kčŭt hlăm ai tiê êdi. Jăk êdi, êwa êđăp siam, anak mnuih thâo khăp. Mâo bi tuôm hŏng lu djuê ana mdê mdê, wat djuê ana mơ̆ng ala tač êngao ba hriê dhar kreh hjăn mơ̆ng diñu. Ai tiê anak mnuih mmông anăn amâo mâo čiăng lŏ kbiă đuĕ ôh mơ̆ng anôk anăn.”

Amâo mâo djŏ knŏng jing knăm mơak mơ̆ng dŭm djuê ana Việt Nam, knăm ruĕ hlăm êlan klông lŏ mâo klei mjĕ mjuk hŏng dhar kreh ala tač êngao. Pô mbruă Thong Souphoni, hriê mơ̆ng ƀuôn prŏng phŭn Viêng Chăn, ala čar Lào brei thâo, nao hlăm knăm mơak čing čhar Ngŏ Dhŭng Asi thŭn 2025 mơ̆ng čar Lâm Đồng mkŏ mjing, êpul phung mbruă hriê mơ̆ng lăn čar mâo lu êman ba hriê dŭm ênai čing čhar, hŏng lu knhuah siam hjăn pô mơh lehanăn Đà Lạt- Lâm Đồng ăt mđưm leh hlăm ai tiê phung mbruă mơ̆ng ala tač êngao dŭm klei mđĭ ai:

 “Phung mdah mơ̆ng Lào hrue anei ƀar m’iêng ao Lào, čhiăm Lào siam snăk. Ti Lâm Đồng lu anôk hiu čhưn siam, adiê êđăp. Mâo lu mta mnga. Mnuih ƀuôn sang hdĭp êđăp ênang, lehanăn mâo lu mnơ̆ng ƀơ̆ng jăk”.

Hlăm knăm mơak čing čhar Ngŏ Dhŭng Asi thŭn 2025, knăm ruĕ hlăm êlan klông mâo mkŏ mjing jŭm ênao Xuân Hương- Đà Lạt amâo mâo jing wưng pioh kơ klei mdah, ƀiădah lŏ jing kdrông mkŏ dŭm êpul êya djuê ana, dŭm ala čar hlăm alŭ wăl hlăm dhar kreh čing čhar  – knhuah gru yuôm bhăn mơ̆ng anak mnuih. Dŭm êwa čing kwang krah ƀuôn prŏng Đà Lạt hlăk dôk bi lar kơ klei thâo bi mguôp, thâo mpŭ, lehanăn bi kriê pioh knhuah gru dhar kreh mơ̆ng đưm hlăm klei hdĭp ênuk ară anei./.