Tui si hdră,  9 boh sang roong dhar kreh mâo mdơ̆ng hŏng ênoh jih jang êbeh 20 êklai prăk. Grăp boh sang prŏng 130m², dlông 17m. Dŭm boh sang roong anăn dưi mdơ̆ng djŏ hŏng knhuah klei jing sang roong đưm, djŏ guôp hŏng dhar kreh mnuih djuê ƀiă ti knông lăn Gia Lai lehanăn Quảng Ngãi. Tĭng, jih jang 9 boh sang roong anei srăng bi leh lehanăn ba yua hlăm mlan 9/2026.

Blŭ hrăm ti anôk mphŭn rŭ mdơ̆ng, Thượng tướng Trương Thiên Tô, Khua knơ̆ng kiă kriê bruă kđi čar lĭng kahan yang ƀuôn Việt Nam  brei thâo:  bruă rŭ mdơ̆ng sang roong dhar kreh ti dŭm boh ƀuôn hgŭm knông lăn Lăn Dap kngư bi êdah klei Đảng, Knŭk kna lehanăn lĭng kahan mđing uêñ kơ mnuih ƀuôn sang, kñăm bi kjăp klei thâo bi mguôp prŏng jih jang mnuih ƀuôn sang, mkŏ mjing ai ktang hlăm mnuih ƀuôn sang, mđrĭng hŏng bruă čuăn răng mgang kjăp bruă kđi čar, răng mgang klei êđăp ênang hlăm alŭ wăl. Thượng tướng Trương Thiên Tô mtă:

“Hlăm wưng tinăp, čang hmăng kơ dŭm anôk bruă, êpul êya, alŭ wăl mâo klei bi mguôp kjăp, mđing ngă djăp mta bruă bi leh djŏ hdră kčah, dưn yua jih klei tŭ dưn mơ̆ng sang dhar kreh ƀuôn, mkŏ mjing bi djŏ hdră êlan, rơ̆ng hŏng klei kjăp, anăn jing klei tal êlâo, lehanăn klei êđăp ênang sĭt, amâo mâo bi tiŏ êran hơăi muang mang, luič hĕ klei kjăp.”

Hlăm klei hdĭp dhar kreh Lăn dap kngư, sang roong jing leh anôk bi mguôp hlăm yang ƀuôn, anôk mkŏ mjing djăp mta knăm djuê ana, anôk bi kƀĭn, lehanăn hlue ngă dŭm klei bhiăn ƀuôn sang pô. Ƀiădah ti lu ƀuôn hgŭm hlăm knông lăn, ară anei lu sang rông hlăk dơ̆ng jhat rai, amâodah ka dưi lŏ duh bi liê rŭ mdơ̆ng ôh. Bruă êpul lĭng kahan rŭ mdơ̆ng 9 sang roong dhar kreh srăng mjing djăp klei găl čiăng kơ mnuih ƀuôn sang ti knông lăn dưr lăn dap kngư mâo anôk bi mguôp, mkŏ mjing dŭm knăm djuê ana pô, hŏng anôk kjăp lehanăn jăk. Bi ala kơ bruă  Đảng; knơ̆ng kiă kriê kahan Binh đoàn 15, Thiếu tướng Hoàng Văn Sỹ- Khua knơ̆ng kiă kriê Binh đoàn lač.

“Anei amâo mâo djŏ knŏng jing anôk rŭ mdơ̆ng kơ ƀuôn sang mâo anôk bi mguôp đuič ôh, ƀiădah lŏ bi êdah bruă đua klam mơ̆ng lĭng kahan mđrăm mbĭt hŏng mnuih ƀuôn sang. Mơ̆ng anăn hyuă kjăp hĭn klei thâo bi mguôp plah wah knuă druh lĭng kahan hŏng mnuih ƀuôn sang djăp djuê ana. Binh đoàn 15 ƀuăn srăng bi mguôp jăk hŏng dŭm êpul êya, djăp gưl bruă Đảng, bruă sang čư̆ êa hlue ngă tŭ jing dŭm bruă čuăn, êlâo hĭn rŭ mdơ̆ng 9 sang rông bi djŏ hŏng knhuah klei jing, lehanăn kjăp tui si hdră mtrŭn.”.