Ea Knir Farm ti alŭ Hòa Thành, ƀuôn hgŭm Ea Knuêč, čar Daklak, kbưi hŏng Ƀuôn Ama Thuôt dŭm pluh km. Anei jing anôk phung hiu čhưn kreh truh, čiăng nao dlăng lehanăn hrăm mbĭt hŏng klei hdĭp hlăm đang hma anei. Hlăm anăn, phung tue khăp êdi hlăm bruă nao pĕ mmao kmrăm, lehanăn lông ƀơ̆ng djam anei riă bur mnŭ. Êban Thái Ân, djuê ana Bahnar, pô Ea Knir Farm, brei thâo: Mmao kmrăm anei yap msĕ si “mmah kô̆” hlăm čư̆ dliê, čŏng čăt hlue yan, ƀâo mngưi, jăk – sa mta mnâo mñan amâo mâo mta mmao mkăn dưi mmâo ôh.

 “Mmao kmrăm jing mnơ̆ng mđup brei mơ̆ng lăn. Hmei amâo mâo bruă lŏ ngă ôh hŏng mmao, knŏng mjing anôk čăt jing čŏng mâo mă. Grăp blư̆ yan mmao truh, phung tue hriê duiñ mmao khăp snăk, kyua mda êjai, lehanăn dọ êjai, mâo mnâo mnañ čư dliê jăk êdi.”

Bur mnŭ mmao kmrăm ti Ea Knir Farm mâo tŭk riă hlue knhuah mơ̆ng mnuih ƀuôn sang tinei: Mâo mnŭ pô rông hlăm wăl farm. Braih riă bur kreh ba yua jing braih hma mâo mnâo ƀâo mngưi, êun.

Klei jăk mơ̆ng bur mmao kmrăm hlăm Ea Knir Farm jăk hĕ amâo mâo djŏ kyua mơ̆ng mnâo mnañ, ƀiădah mơ̆ng bruă tui duah lehanăn tŭk riă bur anei. Ti farm, phung tue nao jih hlăm djăp mta bruă dơ̆ng mơ̆ng nao duiñ mmao, lehanăn nao hlăm bruă tŭk riă bur. Phung tue srăng mâo dŭm klei ktrâo atăt ƀhĭ klĭ, hriăm si hdră duiñ mmao, čiăng kơ mgi dih anôk anei mmao lŏ pluh čăt nanao. Nguyễn Trọng Minh, hrie mơ̆ng ɃP.HCM lač:

 “Anei jing gưl tal êlâo čŏng kâo pô hiu pĕ mmao kmrăm. Êjai buč phŭn mmao, ƀâo leh mnâo ƀâo mngưi mơ̆ng mmao, ƀuh bi kƀŭt mmao đuh bi pluă mbĭt jăk êdi pĕ mmao. Čŏng kngan pô dưm hĕ hlăm êi, mbloh mâo ƀơ̆ng yơh mmao pô hiu pĕ leh jăk êdi yơh. Kâo srăng lŏ hriê kơ anei. Mâo rang angĭn aguah ưm, amâodah hlăm adiê wai băk tlam, dôk ƀơ̆ng bur hlơr ti kngan, lehanăn hmư̆ mnŭ bi krŭk, bi kdjô̆ hlăm war jăk êdi yơh.”

Ăt msĕ hŏng dŭm anôk mdei msăn mkăn, Ea Knir Farm brei phung tue dưi nao hlăm kpur, hmư̆ klei ktrâo atăt kơ hdră riă bur, hdră ruah mnŭ, hră lông djiêl tui si knhuah lăn dap kngư. Amai Hồng Anh, jing tue hrie mơ̆ng Vũng Tàu lač:

 “Kâo khăp êdi dôk ti djiêo kpur, ƀâo mnâo mnŭ mdhư̆ mdhưi mbĭt hŏgn mnâo mmao kmrăm. Dlăng ai êwa êđăp drưm thut hriê, msĕ si dôk hdĭp hlăm sa krĭng ƀuôn sang hĭn amâo mâo djŏ jing anôk hiu čhưn ênguê ôh.”

Bưng bur mmao kmrăm dôk hlơr. Dlăng săp bluh đĭ, mbĭt hŏng mnâo ƀâo mngưi ƀuh jing h’uh mđao êdimơ̆ng mnơ̆ng ƀơ̆ng ti lăn dap kngư anei. Sa čô tue hrie mơ̆ng Đà Nẵng, Nguyễn Thị Yến lač:

 “Kâo tuôm ƀơ̆ng leh mta bur, ƀiădah bur mmao kmrăm tinei, mâo mnâo mnañ mdê mdi: mmih, ƀăt, amâo mâo prăi, bŏ hŏng klei jăk yơh. Mâo lăn mnga êa siam mbĭt hŏng mnơ̆ng ƀơ̆ng jăk, sĭt nik mgi dih srăng lŏ hriê kơ anei.”

Mâo ƀuh dŭm dhar kreh – mnơ̆ng ƀơ̆ng huă jing bur mnŭ mmao kmrăm jing leh anăn knăl mâo mă hjăn mơ̆ng Ea Knir Farm. Anei amâo mâo djŏ knŏng jing mnơ̆ng ƀơ̆ng jăk mbŏ klei tŭ kơ asei mlei đuič ôh, ƀiădah lŏ jing mnơ̆ng ƀơ̆ng klei jăk kơ ai tiê klei mĭn djă ba mngăt êwa mơ̆ng lăn, klei khăp mơ̆ng anak mnuih: Ñu jĕ giăm, klă jăk, h'uh mđao msĕ hŏng ai hdĭp ƀuôn sang./.