VOV4.Êđê - Êbeh 2 thŭn êgao, êpul mă bruă kyua phung hđeh khăp hơiêng ti kdriêk Čư̆ Mgar, čar Dak Lak pŏk ngă leh lu bruă ngă mđing truh kơ phung hđeh ƀun, dleh dlan ti alŭ wăl. Dŭm bruă ngă yuôm bhăn mơ̆ng êpul đru mguôp kriê dlăng, mtô bi hriăm kơ phung hđeh, lŏ dơ̆ng đru kơ phung hđeh gĭr ktưn hriăm jăk hĭn.

Tŭ mă hnư mnơ̆ng đru knhal jih thŭn mâo braih, êa ksâo êmô leh anăn dŭm mta mnơ̆ng yua hriăm hră mơar, Adei H’Yến Niê dôk hriăm adŭ 8B, sang hră gưl 2 Ngô Mây, să Ea Mdroh, kdriêk Čư̆ M’Gar hơ̆k mơak sơnăk kyua hnư mnơ̆ng anei dưi đru kơ amĭ ama mdul ƀiă prăk yua grăp hruê. Adei lŏ mâo thiăm dŭm mta mnơ̆ng yua hlăm klei hriăm hră mơar. Hnư̆ mnơ̆ng anei jing mơ̆ng hdră mkăp “Đru ai êlan kbưi”. Êpul bi mguôp Kyua phung adei khăp hơiêng kdriêk Čư̆ Mgar mđŭp brei grăp mlan hlăm giăm 1 thŭn êgao, đru mđĭ ai adei H’Yến mâo klei gĭr tưn hlăm klei hriăm hră mơar:Hruê mmông êgao, kyua mâo klei đru mơ̆ng hdră đru ai êlan kbưi, mâo phung nai nao mđup brei hnư mnơ̆ng hlăm grăp mlan. Êngao kơ anăn, kâo lŏ dưi nao hgŭm hlăm dŭm adŭ hriăm klei khăp, mâo phung nai lŏ mtô brei mta hriăm toán, văn, klei Angle, dlăng lu hdruôm hră leh anăn klei hlăp lêñ. Kâo ƀuh mâo klei mơak sơnăk leh anăn mâo klei jhŏng hĭn, kâo srăng gĭr ktưn hriăm hră mơar, hmư̆ asăp amĭ ama čiăng phung nai mâo klei hơ̆k mơak mơh.

Đru ai êlan kbưi jing hdră mkăp mơ̆ng êpul bi mguôp Kyua phung adei khăp hơiêng kdriêk Čư̆ Mgar mkŏ mjing mơ̆ng akŏ thŭn 2021. Đru kơ phung hđeh sang hră mnuih djuê ƀiă mâo klei hdĭp dleh dlan hlăm alŭ wăl kdriêk. Hluê anăn, grăp čô hlăm êpul bi mguôp srăng bi mguôp, mtrŭt mjhar phung mâo ai tiê kmah đru kơ sa čô hđeh sang hră mâo klei hdĭp dleh dlan hŏng bruă mkăp brei prăk yua grăp mlan hlăm hruê mmông diñu nao sang hră truh kơ êla diñu bi ruê̆ gưl hriăm. Ênoh prăk đru jing 240 êbâo prăk hlăm sa mlan kơ sang čô hđeh sang hră adŭ điêt leh anăn gưl sa, 290 êbâo prăk kơ hđeh sang hră gưl 2. Hlăm thŭn 2021, êpul bi mguôp đru leh kơ 103 čô hđeh, hŏng ênoh prăk giăm 150 êklăk prăk.

Êpul bi mguôp ăt lŏ mâo lu hdră mkăp mkăn đru kơ hđeh sang hră mnuih djuê ƀiă msĕ si: Adŭ hriăm klei khăp amâo mă prăk kơ hđeh sang hră, mđup brei bê mjeh mkŏ mjing klei duh ƀơ̆ng kơ hđeh sang hră knap mñai, bi hriăm luê êa kơ hđeh, rŭ mdơ̆ng sang adôk klei khăp mđup brei huôm hdruôm hră ciăng mđĭ hĭn klei thâo kơ diñu.

Boh nik, hlăm gưl bluh đĭ klei ruă tưp Covid-19 tal 4 anei, êpul bi mguôp mâo lu bruă ngă đru kơ phung hđeh sang hră msĕ si mđup brei hdruôm hră amâodah đĭng blŭ đru kơ diñu hriăm online. Adei H’Mĭt knul, hđeh sang hră adŭ 8B, sang hră gưl 2 Ngô Mây, să Ea Mdroh, kdriêk Čư̆ Mgar, tŭ mă đĭng blŭ thâo mĭn leh anăn sim 4G mơ̆ng hdră anei lač:Hlăm hruê mmông êgao, kâo dưi mâo sa boh đĭng blŭ čiăng hriăm online. Đĭng blŭ anăn đru kơ adei hriăm jăk hĭn. Kâo mâo klei lač jăk êdi kơ phung nai, phung amiêt awa đru leh kơ kâo hriăm jăk hĭn leh anăn êdei anăp kâo hmăng hmưi dưi mâo bruă mă hơĭt čiăng lŏ wĭt đru kơ phung hđeh knap mñai msĕ hŏng kâo ară anei.

Dưi mkŏ mjing mơ̆ng mlan 8 thŭn 2019, êpul bi mguôp Kyua phung adei khăp hơiêng mơ̆ng êpul hgŭm bruă đội kdriêk Čư̆ Mgar jing sa čô nao hgŭm hlăm êpul hgŭm phung čŏng ngă bruă ala čar alŭ wăl krĭng Lăn Dăp Kngư (hlăm anôk bruă čŏng ngă bruă ala čar, êpul bruă hđeh êdam êra gưl dlông). Êpul bi mguôp ară anei mâo 32 čô, grăp čô mâo bruă mdê mdê ƀiădah mâo bruă kñăm jing kriê dlăng, đru kơ phung hđeh sang hră krĭng dleh dlan. Ayŏng Mai Văn Chuyền, sa čô nai ti sang hră gưl 2 Ngô Mây, khua kiă kriê êpul bi mguôp brei thâo: Hlăm klei dleh dlan mơ̆ng phung hđeh anăn tơdah mâo klei bi đru gui mơ̆ng jih jang mnuih, mơ̆ng yang ƀuôn, anăn srăng jing boh kdrŭt brei phung hđeh anăn ƀuh klei yuôm bhăn hlăm klei bi mguôp, bi đru hdơ̆ng pô mơ̆ng jih jang mnuih leh anăn êdei anăp jing klei hriăm knhuah hdĭp kơ diñu leh đĭ kơ prŏng. Hlăm hruê mmông kơ anăp, hŏng hdră êlan leh anăn bruă kñăm ngă bruă msĕ sơnăn, êpul bi mguôp dôk mđĭng kơ dŭm hdră ngă bruă kjăp leh anăn sui, mâo klei hmăi jăk truh kơ phung hđeh leh anăn yang ƀuôn, mkŏ mjing klei uêñ mĭn mơ̆ng grăp čô hlăm klei mtô mjuăt bi hriăm, mđĭ kyar kơ phung hđeh, boh nik jing phung hđeh krĭng taih kbưi, krĭng ƀuôn sang.

Hlăm thŭn 2021, êpul bi mguôp dưi iêo mthưr klei bi mguôp giăm 1 êklai prăk čiăng mkŏ mjing dŭm hdră êlan. Hluê anăn dưi đru kơ dŭm êtuh čô hđeh leh anăn hđeh sang hră dưi mâo klei jăk. Amai Lý Thị Hồng Trị khua kiă kriê êpul čŏng ngă bruă ala čar krĭng Lăn Dăp Kngư lač anei jing sa hlăm dŭm êpul bi mguôp ngă bruă kyua yang ƀuôn êdah êdi ti čar Dak Lak leh anăn mâo lu klei bi mguôp jăk hlăm bruă gang mkhư̆ klei ruă tưp Covid-19, mâo êpul hđeh êdam êra gưl dlông pah mni hlăm thŭn leh êgao. Êpul bi mguôp mơ̆ng Ayŏng Mai Văn Chuyền mâo nanao klei gĭr ktưn hlăm dŭm bruă ngă hlăm yang ƀuôn. Ti nei diñu jing phung nai ƀiădah ngă bruă hur har leh anăn dŭm bruă ngă mơ̆ng diñu mâo boh tŭ dưn yuôm bhăn, đru kơ phung hđeh sang hră. Sitôhmô đru mtô mjuăt kơ phung hđeh sang hră ka jăk thâo, sang ƀun ƀin amâo mâo klei găl nao sang hră mơar. Mkăp brei hdruôm hră hriăm kơ diñu hlăm thŭn hriăm mrâo, ao mđao, ênua bruă mdrao mgŭn. Mđing truh kơ phung hđeh sang hră krĭng taih kbưi dưi gĭr ktưn, găn jih klei dleh dlan.

Mjưh ruê̆ thŭn 2021, grăp čô hlăm êpul bi mguôp Kyua phung adei khăp hơiêng ti kdriêk Čư̆ Mgar lŏ bi kƀĭn, bi trông čiăng mâo hdră êlan ngă bruă hlăm thŭn mrâo. Ăt hŏng bruă kñăm kyua phung hđeh dlen dlan, êpul bi mguôp dưi lŏ mâo lu hdră êlan yuôm bhăn, msĕ si mkăp brei ênua bruă mdrao mgŭn kơ hđeh sang hră dleh dlan, pŏk adŭ mtô mjuăt bi hriăm, klei thâo kơ phung hđeh čiăng lŏ dơ̆ng hrăm mbĭt hŏng phung adei. Kyuanăn, lŏ mâo lu phung hđeh dưi mâo klei đru, lŏ mkăp thiăm boh kdrŭt leh anăn ai dưi lŏ dơ̆ng klei hriăm hră mơar, klei hmăng hmưi, jing mnuih tŭ jăk kơ gŏ sang leh anăn yang ƀuôn.