VOV4.Êđê- Pioh djăp kơ klei phung ƀuôn sang êrô êbat hlăm wưng Tết Nguyên Đán 2022 anăp anei, Knơ̆ng bruă kiă kriê êlan êdeh treng Việt Nam pŏk leh klei čhĭ hră êdeh treng Thống Nhất êlan Hà Nội – Sài Gòn, êlan Đà Nẵng – Sài Gòn. Boh nik, mơ̆ng hrue 4/1/2022 Bruă êlan êdeh treng lŏ dơ̆ng čhĭ hră đĭ êdeh dŭm êpul êdeh alŭ wăl mơ̆ng ƀuôn prŏng Hồ Chí Minh truh kơ Phan Thiết, Nha trang, Quy Nhơn, Quảng Ngãi lehanăn mklăk hŏng anăn. Jih jang dŭm êpul êdeh treng anei ăt ba yua dŭm hdră êlan ênŭm kdrêč, ênŭm toar hŏng ênoh êlưih msĕ si: Bi hrŏ ênoh čhĭ mơ̆ng 10% - 15% amâo mâo tĭn ôh prăk huă ƀơ̆ng hlăm êdeh treng, ti dŭm kdrŭn jưh, phung tue dưi dăp hlăm dŭm anôk dôk guôn, thâodah alŭ wăl dôk guôn hjăn, lehanăn dưi pŏk êlan đuĕ nao hjăn đĭ hlăm êdeh, thâodah trŭn mơ̆ng êdeh... Kñăm rơ̆ng mâo klei êđăp ênang kơ tue đĭ hlăm êdeh treng, dhar bruă êlan êdeh treng lŏ dơ̆ng ngă nanao mơh bruă gang mkhư̆ klei ruă tưp Covid 19, mđĭ hĭn bruă bi mdoh wăl hdĭp mda, mdjiê kman, mâo anôk dăp dưm atŏ êa rao mdjiê kman, ngă klei mkă hnơ̆ng h’uh asei mlei kơ tue leh truh kơ kdrŭn êlâo kơ đĭ hlăm êdeh./.

Pô mblang: Y-Khem Niê