VOV4.Êđê- Leh 3 hrue ngă bruă ksiêm duah, đua klam, hrue mbrue (10/12), Êpul gơ̆ng bruă ƀuôn sang čar Daklak gưl 10, wưng thŭn 2021 – 2026 bi leh hdră mă bruă mơ̆ng gưl tal 3 hŏng lu boh phŭn yuôm bhăn, lehanăn ngă klei bi ruĕ. Mơ̆ng klei bi trông, ksiêm dlăng kluôm, klă mngač jih klei hâo mdah, hră mdah, klei bi kƀĭn bi tŭ ư bi klă truh 30 hdră mtrŭn.

Hlăm anăn mâo lu hdră mtrŭn yuôm bhăn, pioh kơ klei mđĭ kyar bruă duh mkra ala ƀuôn, răng mgang klei êđăp ênang hlăm čar msĕ si: Hdră mtrŭn kơ klei mđĭ kuyar bruă duh mkra, rơ̆ng kjăp bruă lĭng kahan lehanăn kahan ksiêm thŭn 2022, hdră rŭ mdơ̆ng ƀuôn prŏng Ƀuôn Ama Thuôt truh thŭn 2030, lehanăn tă hdră truh kơ thŭn 2045, đru kơ klei mđĭ kyar kluôm čar Daklak wưng thŭn 2021 - 2025. Blŭ bi ruĕ klei bi kƀĭn, Y- Vinh Tơr, khua mkăp bruă Đảng gưl dlông, Khua Êpul Gơ̆ng bruă ƀuôn sang čar Daklak lač, jih jang hdră mtrŭn mâo bi klă jing yuôm pioh ngă tŭ jing bruă mđĭ kyar duh mkra ala ƀuôn hlăm čar thŭn 2022 lehanăn hlăm dŭm thŭn kơ anăp./.

Pô mblang: Y-Khem Niê