VOV4.Êđê- Lŏ dơ̆ng hdră klei bi kƀĭn tal 3, Êpul gơ̆ng kơ mnuih ƀuôn sang čar Dak Lak gưl X, hruê 9/12 phung bi ala ksiêm dlăng klei bi trông dŭm hră hưn mdah djŏ tuôm kơ klei mđĭ kyar bruă duh mkra- ala ƀuôn ti čar thŭn 2022 leh anăn wưng 2020-2025. Dŭm bruă djŏ tuôm kơ klei iêô jak duh bi liê, mjing bruă mă kơ mnuih mă bruă hmaĭ kyua klei ruă Covid-19 mâo lu phung bi ala mđing dlăng. Thŭn 2021, hnơ̆ng đĭ kyar bruă duh mkra čar Dak Lak  mâo 5,1%, mĭn tĭng thŭn 2022 gĭr ktưn mâo 7,27%, hluê si phung bi ala, čiăng dưi ngă hdră kñăm anei hlăm boh klei ruă tưp dôk dleh ktuê dlăng snăn Knơ̆ng bruă sang čư̆ êa čar kƀĭn ruh mgaih dŭm anôk gun kpăk hlăm bruă duh bi liê.

Boh nik dŭm anôk gun kpăk kơ bruă ba yua lăn leh anăn bruă tla hnô ruh mgaih anôk ala. Mbĭt hŏng klei mđing dlăng iêô jak duh bi liê, bruă msir mgaih bruă mă kơ mnuih mă bruă ăt mâo phung bi ala lač. Hluê si klei hưn mdah mơ̆ng Knơ̆ng bruă mnuih mă bruă -kahan êka êkeh - ala ƀuôn čar Dak Lak, hlăm gưl klei ruă Covid-19 bluh mâo tal 4, mâo giăm 140 êbâo čô mnuih mơ̆ng dŭm alŭ wăl čar nah Dhŭng wĭt. Hlăm anăn mâo giăm 24% čô mnuih čiăng dôk ti alŭ wăl ngă bruă leh anăn čang hmăng dưi čan prăk mơ̆ng 20-80 êklăk prăk pioh mđĭ kyar bruă duh mkra. Kyua anăn, phung bi ala mtă kơ čar brei mâo klei bhiăn, hdră êlan đru kơ klei čan prăk mă mnga hdjul mjing klei duh ƀơ̆ng kơ phung mă bruă ti alŭ wăl.

Pô mblang: H’Zawut Ƀuôn Yă