VOV4.Êđê- Aguah 10/12, lŏ dơ̆ng hdră klei bi kƀĭn tal pă, Êpul gơ̆ng mnuih ƀuôn sang čar Gia Lai gưl XII, phung bi ala hưn mdah klei tŭ bi trông hŏng lu mta phŭn yuôm bhăn. Phung bi ala tŭ ư hŏng boh phŭn hưn mdah klei tŭ hluê ngă bruă klam bruă duh mkra- ala ƀuôn, klei gĭt gai mơ̆ng Knơ̆ng bruă sang čư̆ êa čar hlăm thŭn 2021. Phung bi ala brei thâo, wăt tơdah tlă anăp hŏng lu klei dleh dlan, lông dlăng kyua klei ruă Covid-19, khădah, bruă duh mkra ala ƀuôn čar Gia Lai thŭn anei mâo lu klei êdah kdlưn.

Êngao anăn, phung bi ala ăt lač kơ kơ dŭm mta bruă êdu kƀah adôk mâo. Hlăm anăn, bruă mtô bi hriăm online, phung bi ala mđing kơ bruă đru ba čhĭ mnơ̆ng dhơ̆ng lŏ hma kơ mnuih ƀuôn sang hlăm yan klei ruă tưp. Klei êdu kƀah mơ̆ng bruă hriăm online jing knŏng dưi pŏk ngă tŭ dưn ti krĭng găl ênưih, anăn hmaĭ kơ hnơ̆ng hriăm hră hŏng phung hđeh krĭng dleh dlan. Bruă đru kơ mnuih ƀuôn sang, êpul hgŭm bruă ba čhĭ mnơ̆ng dhơ̆ng lŏ hma ăt ka mâo klei tŭ dưn hlăm yan klei ruă tưp, brei ksiêm hriăm klei tŭ dưn.

Pô mblang: H’Zawut Ƀuôn Yă