VOV4.Êđê- Hluê ngă hdră ksiêm dlăng mơ̆ng Phŭn bruă kđi čar lehanăn Anôk dlăng bruă Đảng thŭn 2021, tlam hruê 7/12, ti anôk bruă Knŭk kna, Êpul ksiêm dlăng mơ̆ng Phŭn bruă kđi čar mă leh bruă hŏng Anôk bruă knuă druh Đảng hlăm Knŭk kna kơ boh tŭ kiă kriê, gĭt gai bruă ksiêm hriăm, tui duah, ksiêk kjăp, mtô mblang, bi sĭt lehanăn pŏk hluê ngă Hdră mtrŭn Klei bi kƀĭn phung bi ala kluôm ala tal XIII mơ̆ng Đảng. Phạm Minh Chính, Khua knŭk kna, Phan Đình Trạc, Khua hlăm Anôk bruă Đảng gưl dlông, Khua dhar bruă ksiêm dlăng bruă knuă gưl dlông, Khua êpul ksiêm dlăng mơ̆ng Phŭn bruă kđi čar hrăm mbĭt gĭt gai mmông mă bruă. Ti anôk mă bruă, Phan Đình Trạc brei thâo, Êpul srăng mđing ksiêm dlăng hdră kiă kriê, gĭt gai, ksiêm hriăm, tui duah, ksiêk kjăp, mtô mblang, bi sĭt lehanăn pŏk hluê ngă Hdră mtrŭn Klei bi kƀĭn phung bi ala kluôm ala tal XIII mơ̆ng Đảng. Khua knŭk kna Phạm Minh Chính mñă klă, ksiêm dlăng jing sa hlăm dŭm hdră kiă kriê mơ̆ng Đảng, Knŭk kna, ƀuh anei jing bruă čiăng êdi kñăm hluê ngă tŭ dưn hdră êlan mtrŭn mơ̆ng Đảng, klei kčah mtrŭn mơ̆ng hdră bhiăn, klei gĭt gai mơ̆ng phung khua kiă kriê Đảng, knŭk kna; bruă klam, hdră ngă, klei dưi mâo kčah jao kñăm ba wĭt boh tŭ kdlưn hĭn./.

Pô mblang: H’Nêč Êñuôl