VOV4.Êđê- Leh lu blư̆ mdei êjai kyua klei ruă tưp Covid 19, hrue anei (7/1) Festival mdiê braih Việt Nam tal 5 thŭn 2021 klă klơ̆ng pŏk ti Vĩnh Long mâo Êpul hgŭm phung ngă lŏ hma gưl dlông Việt Nam, Phŭn bruă lŏ hma lehanăn knơ̆ng bruă sang čư̆ êa čar Vĩnh Long hgŭm mkŏ mjing. Festival srăng mâo dŭm hdră djŏ tuôm msĕ si: Bi trông kơ klei kreh knhâo kơ bruă mkŏ mjing lehanăn mđĭ kyar mnơ̆ng djăp ênoh čuăn OCOP, dŭm klei bi lông kơ braih jăk mâo anăn knăl, klei rang mdah dŭm boh tŭ dưn bruă mđĭ kyar klei duh mkra, dhar kreh yang ƀuôn čar Vĩnh Long, krĭng Dap Mnai krông Cửu Long, lehanăn dŭm čar, ƀuôn prŏng kluôm ala. Ti dŭm anôk trông čhai, phung kreh knhâo, phung ngă bruă kiă kriê, lehanăn phung duh mkra bi trông kñăm tui duah hdră ruh mgaih djăp mta klei dleh dlan, klei gun kpăk, ciăng kơ braih mdiê mâo anăn knăl Việt Nam dưi čhĭ mnia jăk hlăm ala čar lehanăn hŏng ala tač êngao./.

Pô mblang: Y-Khem Niê