VOV4.Êđê - Kƀĭn hâo hưn hlăk pŏk ngă, hdră “Jih jang mnuih ƀuôn sang gang mkhư̆ klei ruă Covid-19 leh anăn mŭt kƀiă soh hŏng hdră bhiăn” kñăm mđĭ klei thâo săng, bi mklă bruă đua klam mơ̆ng grăp čô mnuih ƀuôn sang ti anăp klei truh jhat mơ̆ng klei ruă Covid-19, êpul kahan răng mgang knông lăn iêô mkrum ai ktang mnuih ƀuôn sang hgŭm gang mkhư̆ klei ruă tưp leh anăn klei mŭt kbiă soh hŏng hdră bhiăn; đru gang mkhư̆ amâo brei klei ruă tưp lar mơ̆ng êngao mŭt hlăm ala čar leh anăn êpul êya.

Hluê anăn, hdră dưi hluê ngă hŏng lu bruă klă sĭt, djŏ guôp hŏng klei mâo ti alŭ wăl, mguôp hŏng dŭm hdră mtrŭt mjhar ti alŭ wăl, rơ̆ng dŭm klei mtă hlăm hdră gang mkhư̆, mdrơ̆ng hŏng klei ruă Covid 19. Mtô mblang čiăng kơ mnuih ƀuôn sang mâo klei thâo săng djŏ, klă ênŭm kơ klei huĭ hyưt mơ̆ng klei ruă Covid 19; Mkŏ mjing hdră đru kơ yang ƀuôn, hrăm mbĭt hŏng mnuih ƀuôn sang mâo klei hdĭp dleh dlan hmăi mơ̆ng klei ruă Covid 19.

Jing čar mâo êlan knông lăn êbeh 468 km bi knông hŏng ala čar Lao, mâo lu ktuê êlan đ’điêt, bruă ksiêm dlăng knông lăn, gang mkhư̆ klei tlĕ mŭt kbiă soh hŏng hdră bhiăn mâo leh Lĭng kahan răng mgang knông lăn čar Nghệ An hluê ngă mđrăm mbĭt lehanăn tŭ dưn. Hlăm anăn, mđing kơ hdră mtô mblang truh kơ mnuih ƀuôn sang krĭng knông lăn. Đại tá Dương Hồng Hải, K’iăng khua knơ̆ng gĭt gai lĭng kahan răng mgang knông lăn čar Nghệ An brei thâo:Hmei ngă jăk hdră mtô mblang truh kơ grăp čô mnuih ƀuôn sang krĭng knông lăn, gang mkhư̆ klei đru atăt mnuih tlĕ mŭt, kbiă ti krĭng knông lăn mơ̆ng Lao; mkŏ mjing dŭm huôm dưm hră hưn phung ngă soh ti dŭm alŭ wăl ktuê êlan knông lăn, hmei jao kơ K’iăng khua bruă Đảng čar jing knuă druh lĭng kahan răng mgang knông lăn să ngă pô phŭn hlăm hdră mtô mblang, mtrŭt mjhar jih jang mnuih ƀuôn sang nao hgŭm hưn mthâo, hmao ƀuh phung tlĕ mŭt, kbiă ti krĭng knông lăn mơ̆ng alŭ wăl să amâo mâo hră m’ar djŏ si klei kčah mtrŭn.

Hrăm mbĭt hŏng lĭng kahan răng mgang knông lăn, lu mnuih ƀuôn sang ti dŭm să krĭng knông lăn ăt mđĭ klei thâo săng hlăm hdră gang mkhư̆, mdrơ̆ng hŏng klei ruă Covid 19 msĕ si truă čhiăm guôm ƀô̆ ti anôk lu mnuih, bi mdoh, krih êa drao mdjiê kman djiêu gah krĭng wăl hdĭp mda. Boh nik, êpul “ksiêm hgăm” mơ̆ng lĭng kahan răng mgang knông lăn pral thâo klă klei mâo, hưn mthâo dŭm phung tlĕ mŭt, kbiă ti krĭng knông lăn soh hdră bhiăn hlăm alŭ wăl.

Ti anăp klei mâo ƀrư̆ hruê ƀrư̆ dleh dưi ksiêm dlăng mơ̆ng klei ruă Covid 19, lĭng kahan răng mgang knông lăn čar Quảng Bình mkŏ mjing leh 14 anôk ksiêm dlăng ti ktuê êlan đ’điêt ti krĭng knông lăn hŏng ala čar Lao čiăng mkhư̆ mnuih mơ̆ng krĭng mâo klei ruă tưp mŭt hlăm alŭ wăl ala čar drei. Thiếu tá Lê Ngọc Gia, Khua bruă kđi čar Kđông kahan răng mgang knông lăn Làng Ho, knơ̆ng gĭt gai lĭng kahan răng mgang knông lăn čar Quảng Bình brei thâo, hlăm klei găl dleh dlan, lĭng kahan mâo klei đru nanao mơ̆ng mnuih ƀuôn sang ti krĭng knông lăn: Hmei mgei ai tiê êdi, khădah ti krĭng knông lăn mâo êpul êya tŭ đua klam ksiêm dlăng, klei hdĭp dôk dleh dlan ƀiădah mnuih ƀuôn sang ăt đru mguôp mnơ̆ng dhơ̆ng, ai tiê hŏng phung lĭng kahan. Hlăm wưng ti anăp, hmei srăng ngă jăk bruă klam gang mkhư̆ klei ruă Covid 19.

Hŏng hdră êlan “Gang mkhư̆ klei ruă msĕ si bi kdơ̆ng hŏng phung roh”, phung lĭng kahan răng mgang knông lăn čar Quảng Bình bi mlih tuôr gak jih hruê mlam ti dŭm anôk gak răng ti dŭm ktuê êlan đ’điêt hŏng ala čar Lao. Phung lĭng kahan amâo uêñ klei suaĭ êmăn, dleh dlan, pĭt krah dliê kmrơ̆ng, mdei pĭt hlăm jao. Aduôn Hồ Thủy, mnuih djuê ana Vân Kiều ti ƀuôn Eo Bù-Chút Mút, să Lâm Thủy, kdriêk Lệ Thủy, čar Quảng Bình mgei ai tiê lač, ƀuh lĭng kahan dôk pĭt đih hlăm dliê ti krĭng knông lăn dleh dlan kyua anăn mnuih ƀuôn sang lŏ đru, mtrŭt mđĭ ai phung lĭng kahan răng mgang knông lăn bi leh jih bruă klam:

Ƀuh arăng mkăn tlĕ mŭt, găn ti knông lăn hmei srăng hưn kơ lĭng kahan răng mgang knông lăn čiăng diñu thâo klei mâo, pral gang mkhư̆. Hrăm mbĭt hŏng lĭng kahan gang mkhư̆ klei ruă Covid 19 hlăm alŭ wăl pô.

Êpul ksiêm dlăng mnuih ƀuôn sang mŭt hlăm ala čar ti ƀăng jang knông lăn prŏng Cha Lo, čar Quảng Bình brei thâo, čiăng ksiêm dlăng kjăp êpul mnuih găn ti krĭng knông lăn, Knơ̆ng gĭt gai lĭng kahan răng mgang knông lăn čar Quảng Bình mkŏ mjin leh 14 êpul dôk gak răng ti dŭm ktuê êlan đ’điêt hŏng ala čar Lao. Đại tá Trịnh Thanh Bình, Khua knơ̆ng gĭt gai lĭng kahan răng mgang knông lăn čar Quảng Bình brei thâo, mbĭt hŏng bruă ksiêm dlăng, lĭng kahan răng mgang knông lăn čar Quảng Bình kreh mtrŭt mjhar mnuih ƀuôn sang krĭng knông lăn hgŭm kngan gang mkhư̆ klei ruă Covid 19: Dŭm êpul mkŏ mjing hdră ksiêm dlăng kjăp mnuih găn êrô mbĭt anăn mkŏ mjing hdră hiu suang dlăng krĭng knông lăn. Mđrĭng hŏng anăn bi mguôp hdră mtrŭt mjhar, đru čung ba mnuih ƀuôn sang, mđĭ klei thâo săng kơ hdră gang mkhư̆, mbĭt anăn mbha čhiăm guôm ƀô̆ lehanăn hluê ngă hdră bi mdoh alŭ, ƀuôn.

Hlăk mâo lu mnuih krĭng knông lăn hgŭm kngan hŏng êpul djŏ tuôm răng mgang knông lăn êđăp ênang, đru mguôp gang mkhư̆ klei ruă Covid 19, snăn ăt mâo mnuih mčhua hŏng klei dưi, bruă klam mơ̆ng pô, đru kơ phung mâo mnêč jhat. Klă sĭt, drei ăt hdơr giăm anei, mnêč tlĕ atăt 200 čô mŭt hlăm ala čar soh hŏng hdră bhiăn găn krĭng knông lăn Bản Lầu, kdriêk Mường Khương, čar Lào Cai mâo hmao ƀuh, lu mnêč jhat mơ̆ng phung soh dưi bi rai. Klei năng mđing, pô kreh tlĕ atăt mnuih tlĕ mŭt kbiă ti krĭng knông lăn soh hdră bhiăn jing Khua êpul – pô kreh nao hgŭm hiu suang dlăng, ksiêm dlăng lehanăn gang mkhư̆ klei ruă Covid 19 mbĭt hŏng lĭng kahan răng mgang knông lăn.

Kyua anăn, dưi bi mklă snei, tơdah grăp čô mnuih amâo thâo săng klă, djăp ênŭm kơ klei huĭ hyưt mơ̆ng klei ruă Covid 19 hŏng pô lehanăn êpul êya, snăn khădah êpul lĭng kahan răng mgang knông lăn mâo dŭm êbâo čô dưn, mâo dŭm êtuh anôk gak răng dưn ti dŭm ktuê êlan điêt ăt kăn dưi bi rai jih mơh mnêč mơ̆ng phung jhat, êpul tlĕ atăt mŭt, kbiă mnuih găn knông lăn soh hdră bhiăn./.