VOV4.Êđê- “GDP 2021 mâo 2,58% jing klei tŭ jing prŏng; Hdră mtrŭn 128 klă sĭt đru kơrŭ wĭt bruă mkra mjing, mđĭ anôk ba čhĭ, Prăk duh bi liê ala tač êngao đĭ; Bruă čhĭ mnia mđĭ kyar ktang; ênoh mrô ba yua đĭ lu hĭn yap mơ̆ng 2016; Ba čhĭ - blei mơ̆ng ala tač êngao lŏ dơ̆ng jing boh kdrĭt đĭ kyar”… Dŭm klei hâo hưn anei mâo Dhar bruă ksiêm yap, Phŭn bruă Hdră kčah leh anăn Duh bi liê bi mklă hlăm klei bi kƀĭn bi ala kơ dŭm anôk bruă klei mrâo, Hưn mdah ênoh mrô ksiêm yap bruă duh mkra- ala ƀuôn gưl IV leh anăn jih thŭn 2021. Êngao anăn, boh klei duh mkra ala ƀuôn thŭn 2021 mâo dŭm klei hâo hưn năng mđing msĕ si: giăm 160 êbâo anôk bruă duh mkra mŭt leh anăn lŏ mŭt hlăm anôk ba čhĭ - hrŏ mkă hŏng thŭn 2020; prăk mnga đĭ 0.81%. Mâo 2 mta bruă mâo hnơ̆ng đĭ kyar lu jing hiu čhưn ênguê hŏng hnơ̆ng tuê ala tač êngao hriê ti Việt Nam hrŏ truh 96%.

Klei hâo mdah mơ̆ng anôk bruă ksiêm yap brei ƀuh, thŭn 2021, ênoh bi mnia mblei hŏng ala tač êngao kluôm ala êbeh 668 êklai 500 êklăk dolar, hlăm anăn čhĭ mnơ̆ng kơ ala tač êngao mâo truh 336 êklai 350 êklăk dolar, mâo đa đa mnơ̆ng dưi mâo ba wĭt êbeh 1 êklai dolar, truh 93,8% hlăm ênoh bi mnia mblei jih jang, hlăm anăn mâo 8 mta mnơ̆ng mâo čhĭ kơ ala tač êngao êbeh 10 êklai dolar, truh 69,7%. Thŭn 2021, čih pioh klei bi tŭ hdui ênoh bi mnia mblei brei ƀuh klei bi kpleh hlăm brô 4 êklai dolar, kruak knăl thŭn tal 6 leh mtam Việt Nam mâo mnga hĭn hlăm klei bi mnia mblei hŏng ala tač êngao, êjai dôk găn klei ruă tưp prŏng. Boh tŭ dưn mơ̆ng bruă bi mnia mblei hŏng ala tač êngao thŭn 2021 jing leh gru mngač hlăm bruă mđĭ kyar lăn čar./.

Pô mblang: H’Zawut Ƀuôn Yă- Y-Khem Niê