VOV4.Êđê - Thŭn 2021, Gia Lai mâo hnơ̆ng đĭ kyar bruă duh mkra 9,7%, lu êdi ti krĭng Lăn dap kngư, hnơ̆ng maoa hrui wĭt kơ ngăn prăk knŭk kna đĭ, giăm 7.600 êklai prăk. Thŭn 2022, čar gĭr mâo hnơ̆ng đĭ kyar êbeh 8,6%, rơ̆ng dŭm mta kñăm yang ƀuôn lehanăn hdră gang mkhư̆ klei ruă Covid 19. Gĭr mâo hnơ̆ng đĭ kyar bruă duh mkra 8,65%, hnư hrui wĭt kah knar grăp čô êbeh 60,44 êklăk prăk, hnư hrui wĭt ngăn prăk knŭk kna êbeh 5.800 êklai prăk, anei jing hnơ̆ng čuăn phŭn mâo čar Gia Lai mđing truh hlăm thŭn 2022. Hluê anăn, čar lŏ dơ̆ng mđĭ kyar bruă lŏ hma ba yua kdrăp mrâo, bi hgŭm mđĭ boh tŭ yuôm, mđĭ bruă mkra mjing pui kmlă; Mbĭt anăn, mđing ruh mtlaih klei dleh dlan, gun kpăk hlăm bruă duh bi liê, mđĭ mrô bi ktưn OCI, mkra mlih bruă ngă hră m’ar. Mtrŭt mđĭ bruă rŭ mkra anôk bruă nah gŭ mđrao mbĭt, dŭm hdră bruă phŭn, mđĭ kyar ƀuôn prŏng hluê hdră čuăl mkă, mđing truh kơ gru hmô krĭng ƀuôn prŏng mtah, thâo mĭn lehanăn h’ĭt kjăp. Čar Gia Lai ăt bi mklă, gang mkhư̆ klei ruă Covid 19, jing bruă klam phŭn, yuôm bhăn lehanăn mjêč nanao, brei mâo klei bi hgŭm kjăp hŏng bruă klam mđĭ kyar bruă duh mkra – ala ƀuôn mơ̆ng kluôm thŭn 2022 lehanăn hlăm dŭm thŭn ti anăp./.

H’Nêč pô mblang