VOV4.Êđê- Tui si anôk bruă ksiêm yap Gialai, thŭn 2021, hnơ̆ng đĭ kyar bruă duh mkra truh 9,71%; ênoh prăk duh bi liê kơ kluôm yang ƀuôn djăp 70 êbâo êklai prăk, êbeh 2,45 blư̆ mkă hŏng thŭn dih. Boh nik ba wĭt ngăn prăk kơ knŭk kna dĭ, hŏng 7 êbâo 592 êklai prăk, đĭ giăm 167%. Ênoh mâo anei lu jing mơ̆ng 17 mta bruă bi êran pui kmlă hŏng ai angĭn, hŏng ênoh mâo bi êran truh êbeh 1 êbâo 242 Mw, lu bruă rông ŭn hŏng ênoh prŏng, bruă kdrăp mrâo mrang.

Thŭn 2021, ênoh mâo bi mnia mblei hŏng ala tač êngao čar Gialai truh 610 êklăk dolar, đĭ êbeh 5%, hlăm anăn kphê lehanăn boh kroh jing lu hĭn, kyua dưn yua jăk jih jang hdră êlan bi mnia mblei êngiê EVFTA. Kluôm čar lŏ mâo 13 să, lehanăn 2 kdriêk bi leh ênoh čuăn mkŏ mkra krĭng ƀuôn sang mrâo. Boh nik, thŭn leh êgao, Krĭng Kngư Kon Hà Nưng mâo leh UNESCO čih yap jing alŭ wăl kmrơ̆ng hrô dlông rŏng lăn. Klei anei pŏk klei găl prŏng kơ čar iêo jak dŭm hdră êlan răng mgang dliê, dưn yua bruă hiu čhưn ênguê, lehanăn mđĭ kyar bruă duh mkra gŭ êyui kmrơ̆ng./.

Pô mblang: Y-Khem Niê