VOV4.Êđê- Aguah 8/12, klei bi kƀĭn tal 4, Êpul gơ̆ng kơ mnuih ƀuôn sang čar Gia Lai gưl XII (wưng 2021-2026) klă sĭt mphŭn pŏk. Klei bi kƀĭn tal anei kƀĭn ksiêm dlăng dŭm klei hưn mdah kơ klei ksiêm dlăng boh tŭ hluê ngă Hdră mtrŭn mơ̆ng Êpul gơ̆ng kơ mnuih ƀuôn sang čar kơ bruă duh mkra- ala ƀuôn, răng mgang klei êđăp ênang thŭn 2021 leh anăn dŭm bruă klam, hdră msir thŭn 2022. Wăt tơdah klei ruă Covid-19 dleh ktuê dlăng, ƀiădah hlăm thŭn 2021, boh klei hrui mă prăk knŭk kna ti Gia Lai mâo klei êdah kdlưn.

Klă klơ̆ng, ênoh prăk knŭk kna hrui mă ti čar mâo 7.386 êklai prăk, mâo 162 % mkă hŏng klei Gưl dlông kčah, êbeh 83% mkă hŏng wưng anei thŭn 2020. Ênoh mnơ̆ng dhơ̆ng hlăm čar đĭ 9,03%, GDP kah knar grăp čô mnuih mâo 56,31 êklăk prăk. Hlăm thŭn anei, mâo thiăm 17 să djăp hnơ̆ng čuăn krĭng ƀuôn sang mrâo, mđĭ 87 să djăp hnơ̆ng čuăn krĭng ƀuôn sang mrâo. Khădah, hlăm thŭn 2021, čar Gia Lai ăt adôk mâo 4/18 hnơ̆ng kčah amâo djăp hdră kčah.  Hlăm klei bi kƀĭn anei, Êpul gơ̆ng kơ mnuih ƀuôn sang čar Gia Lai ksiêm dlăng, bi trông bi mklă 33 hră čih hdră mtrŭn.

Pô mblang: H’Zawut Ƀuôn Yă