Amai Ksor H'Nhươn (amĭ kkiêng thŭn 1994) ti Bôn Tông Se, să Ia Trôk, kdriêk  Ia Pa, čar Gia Lai brei thâo: Êlâo dih, hŏng 4 sao lăn hma, grăp thŭn yan adiê  găl jăk snăn gŏ sang djăp braih huă. Thŭn 2022, amai H'Nhươn mâo kdriêk mđup brei sa drei êmô ana mđai mmơ̆ng hdră bi hrŏ ƀun kjăp. Kyua klei ktrâo lač mơ̆ng knuă druh lŏ hma să kơ klei pla rơ̆k, rông êmô leh anăn ngă mdiê lŏ, truh ară anei gŏ sang amai mâo leh 4 drei êmô. Amai Ksor H'Nhươn brei thâo:

 “ Gŏ sang kâo hlăm gŏ êsei ƀun, mơ̆ng ênoh đru, leh 2 thŭn gĭr ngă bruă, gŏ sang ăt tlaih ƀun leh. Prăk mkiêt mkriêm snăn gŏ sang mkra sang mrâo, êmô ăt mđai dŭm gưl leh. Leh klei hdĭp ƀrư̆ kjăp gŏ sang srăng lŏ dơ̆ng mđĭ prăk hrui wĭt leh anăn kriê dlăng kơ anak čô hriăm hră mơar”.

 Bi dŭm gŏ êsei ƀun mâo leh êmô msĕ si amai Rlan H'Wanh (amĭ kkiêng thŭn 1988) ti Plơi APa Ơi Hbriu, să Chư Mố, kdriêk Ia Pa thŭn anei hgŭm hlăm adŭ mtô rông mnơ̆ng.  Amai H'Wanh brei thâo, ñu hŏng 20 gŏ êsei hlăm ƀuôn hriăm bi mdoh war êning djŏ hdră, truh kơ klei thâo kral, hnưm msir mgaih dŭm mta klei ruă khăng mâo msĕ si kplač ƀăng êgei êluêh kčuôp leh anăn bi đuh đung hlăm klĭt êmô kbao:

 “Mơ̆ng leh hlue hriăm snăn kâo ăt thâo klei čiêm si ngă tŭ dưn čiăng rơ̆ng djăp mnơ̆ng tŭ jăk kơ mnơ̆ng rông. Hmei ăt hriăm nik kơ klei gang mkhư̆ klei ruă leh anăn tơdah ƀuh êmô mâo klei ruă snăn brei mdrao si ngă čiăng tŭ dưn hĭn. Čiăng gang mkhư̆ klei ruă tưp lar hlăm mơ̆ng rông msĕ si kplač ƀăng êgei êluôč kčuôp, bi đuh hlăm klĭt.  snăn bi doh war êning nanao.”

  Mbĭt hŏng đru hdră duh ƀơ̆ng leh anăn mtô bruă djŏ guôp hŏng klei bhiăn mkra mjing mơ̆ng mnuih ƀuôn sang, dŭm să dleh dlan ti kdriêk Ia Pa ăt dưi bi liê mkra mrâo dŭm êbâo km êlan nao lŏ hma, đru mnuih ƀuôn sang găl ênưih dŭ mdiăng mnơ̆ng dhơ̆ng lŏ hma. Rcom Ngưl, Khua dlăng bruă Đảng hlŏng ngă Khua alŭ Bôn Trôk, să Ia Trôk, kdriêk Ia Pa brei thâo:

 “Mơ̆ng thŭn 2021 truh ară anei mâo knŭk kna mđing mkŏ mjing êlan klông mơak snăk. Êlâo dih êlan klông dleh dlan, yan hjan snăn kdlŭt, anăn bruă dŭ mdiăng mnơ̆ng dhơ̆ng suăi mơh. Mơ̆ng hruê knŭk kna bi liê mkra êlan bê tông mlir alŭ leh anăn êlan nao pưk hma găl ênưih, mnuih ƀuôn sang tinei hơ̆k mơak, dŭ mdiăng mnơ̆ng dhơ̆ng lŏ hma amâo lŏ suăi msĕ êlâo ôh”

Truh knhal jih thŭn 2023, ênoh gŏ êsei ƀun ti čar Gia Lai hrŏ adôk  8,11%, ƀiă hĭn 3% mkă hŏng 2021. Boh nik, ênoh gŏ êsei ƀun hlăm êpul êya mnuih djuê ƀiă hĭn mơ̆ng 25,5% (thŭn 2021) dôk 17% thŭn 2023, êbeh hnơ̆ng kčah bi hrŏ ƀun lu tĭng grăp thŭn. Hjăn kdriêk Ia Pa, thŭn 2023 mâo 2.174 gŏ êsei ƀun, mâo 15,2% ênoh gŏ êsei, hrŏ 4% mkă hŏng thŭn êlâo. Hlăm thŭn, kdriêk iêô mkrum leh 583 êklăk prăk hlăm Keh “Kyua mnuih ƀun” rŭ mdơ̆ng 8 boh sang Bi hgŭm leh anăn mđup brei 1000 hnư mnơ̆ng kơ dŭm gŏ sang dleh dlan. Kdriêk ăt pŏk 11 adŭ lăm lui klei amâo thâo hră kơ 310 čô mnuih leh anăn 10 adŭ mtô bi hriăm mbruă kơ êbeh 500 čô, đru mnuih ƀuôn sang mâo bruă mă. Ksor Suy, Kơiăng Khua Knơ̆ng bruă sang čư̆ êa kdriêk Ia Pa brei thâo hdră kñăm yuôm bhăn mơ̆ng dŭm hdră bi hrŏ ƀun jing đru kơ mnuih ƀuôn sang tlaih ƀun kjăp leh anăn mkhư̆ lŏ wĭt ƀun:

 “Ksiêm dlăng nanao, ktuê dlăng bruă hlue ngă hdră bruă bi hrŏ ƀun ti nah gŭ. Êngao kơ hâo hưn, mđĭ klei thâo săng, mđĭ ai gĭr ktưn tlaih ƀun hŏng mnuih ƀuôn sang, ngă djăp ênŭm leh anăn hmao hdră êlan mơ̆ng đảng leh anăn knŭk kna hŏng gŏ êsei ƀun, giăm ƀun, mđĭ ktang prăk hrui wĭt leh anăn mđĭ hnơ̆ng jăk klei hdĭp mda mnuih ƀun, mkhư̆ klei mnuih ƀuôn sang lŏ wĭt ƀun, đru bi hrŏ ƀun lu tĭng leh anăn kjăp”.

 Dŭm gru hmô duh ƀơ̆ng djŏ guôp hŏng klei bhiăn hdĭp mda alŭ wăl dôk đru kơ mnuih ƀuôn sang djuê ƀiă ti Gia Lai thiăm klei ktưn hưn čiăng tlaih ƀun hơĭt kjăp./.