Tlam 17/4, Anôk gĭt gai hdră msir lăm sang dôk êjai, sang tĭ ƀrôč čar Dak Lak mkŏ mjing leh Klei bi kƀĭn tĭng dlăng hdră msir lăm sang dôk êjai, sang tĭ ƀrôč ti alŭ wăl. Truh kơ ară anei, kluôm čar knŏng mrâo mdơ̆ng lehanăn mkra mđĭ 2.400 boh sang, knŏng mâo êbeh 40% hdră kčah mtrŭn.

Mta phŭn ngă êmưt hdră anei, dưi bi mklă djŏ tuôm klei kơ lăn dôk kơ dŭm gŏ sang dưi dưn hdră anei. Hluê hdră kčah, 7.312 boh sang srăng dưi đru, mâo 5.891 boh sang dưi mdơ̆ng mrâo lehanăn 1.421 boh sang dưi mkra mđĭ, kah mbha 4 êpul mnuih dưi dưn: Mnuih mâo bruă tŭ dưn, gŏ sang ƀun, giăm ƀun hluê si hdră ala čar kñăm; dŭm gŏ sang dôk hlăm hdră mtrŭt mjhar mơ̆ng čar.