Ayŏng Rơ Châm Dun, 30 thŭn ( mnuih Jarai, dôk ti ƀuôn Ngol Rông, să Ia Krêl, kdriêk Đức Cơ) mâo knơ̆ng bruă 74, Bình Đoàn 15 ruah bao mă reh ktăk ksu mơ̆ng akŏ thŭn anei. Ayŏng brei thâo, hŏng prăk mlan 1 êklăk, nu mâo klei hdĭp hơĭt hĭn.

 “ Êlâo kơ hrie mă bruă tinei klei hdĭp gŏ sang kâo dleh dlan, ară anei mâo sang dôk, mâo bruă mă kâo ăt čiăng mâo klei hơĭt, êdei anăp anak čô dưi nao sang hră, kâo lač jăk kơ knơ̆ng bruă đru leh kơ kâo”.

Čiăng ngă jăk bruă klam mđĭ kyar bruă duh mkra nao mbĭt hŏng bi kjăp bruă lĭng kahan, thŭn 2025 leh anăn dŭm thŭn kơ anăp, Binh đoàn 15 čiăng kơ 1.489 čô mă bruă ti čar Gia Lai. Ti kdriêk Knông lăn Đức Cơ, mâo knơ̆ng bruă 74, knơ̆ng bruă 75, hlăm Binh đoàn 15. Hlăm dŭm thŭn êgao dưi mtô leh kơ giăm 2000 čô riêk ktăk ksu jing mnuih djuê ƀiă tinăn. Đại tá Trịnh Hà Tâm- khua knơ̆ng bruă 75 lač kơ bruă mkŏ mjing bruă mă kơ mnuih ƀuôn sang alŭ wăl:

 “Knơ̆ng bruă 75 duah ênŭm mnuih mă bruă, 100% jing phung mă bruă hlăm alŭ wăl. Êjai bi hriăm diñu đru brei jih jang mơ̆ng dhŏng reh čiăng hriăm leh anăn mtô kơ diñu kyua čiăng mâo klei thâo leh anăn răng, kyuanăn êpul phung mtô leh anăn knuă druh djăp kngan ktrâo bruă mbĭt hŏng mmuih mă bruă”.

Đại tá Khuất Bá Cao, khua dlăng bruă Đảng, k’iăng khua gĭt gai Binh đoàn 15 mñă klă, anôk bruă mđing kơ ruah mnuih mă bruă jing mnuih djuê ƀiă mŭt mă bruă, anei jing sa hdră êlan yuôm bhăn mơ̆ng bruă Đảng, knơ̆ng gĭt gai Binh đoàn 15. Hluê anăn đru mđĭ kyar bruă duh mkra, mđĭ hnơ̆ng klei hdĭp mnuih ƀuôn sang, răng mgang klei êđăp ênang yang ƀuôn krĭng knông lăn. Đại tá Khuất Bá Cao mñă klă:

“Giăm 8000 čô mnuih djuê ƀiă mơ̆ng Bình đoàn mâo hmei uêñ mĭn. Hmei gĭt gai dŭm anôk bruă mơ̆ng binh đoàn uêñ mĭn, mđĭ hnơ̆ng jăk, ăt msĕ mơh mđing tal êlâo bruă mă mnuih mă bruă jing mnuih djuê ƀiă čiăng rơ̆ng klei hơĭt hnư hrui wĭt, mđĭ klei hdĭ mnuih ƀuôn sang hŏng lu ai dưi, hdră êlan đru kơ mnuih ƀuôn sang hlăm klei hdĭp, mnơ̆ng yua, hdră mnêč, mjeh, ngăn prăk. Ngă bruă hâp hưn mtrŭt mjhar mnuih ƀuôn sang mă bruă knuă, mă bruă thâo leh anăn mbruă”.

Hlăm 40 thŭn êgao, tu krĭng Dưr Lăn Dap Kngư, Binh đoàn 15 ngă mđrĭng bruă klam bruă duh mkra leh anăn bruă lĭng kahan. Ară anei anôk bruă kriê dlăng êbeh 44.259ha ksu leh anăn giăm 400ha mdiê, boh kroh, mbĭt hŏng 6 sang măi mkra mjing ktăk ksu hŏng hnơ̆ng 55.000 tôn hlăm sa thŭn. Binh đoàn 15 đru mguôp êbeh 2.800 êklai prăk hlăm ngăn prăk knŭk kna, mkŏ mjing bruă mă hơĭt kơ êbeh 16.000 čô mă bruă, hlăm anăn êbeh 60% jing mnuih djuê ƀiă. Klei bi hmô bi mguôp gŏ sang Yuăn hŏng mnuih djuê ƀiă hŏng êbeh 4.200 hlâo gŏ sang, đru hyuă kjăp klei bi mguôp, mđĭ hnơ̆ng klei hdĭp mnuih ƀuôn sang. Mduôn Rơ Châm Chich, ti ƀuôn Beng, să knông lăn Ia Čiă, kdriêk Ea Grai, čar Gia Lai brei thâo, kyua hdră êlan mơ̆ng Binh đoàn 15 duah mnuih mă bruă, klei hdĭp mnuih ƀuôn sang dưi mâo klei mlih sĭt.

 "Binh đoàn 15 mđĭ kyar sa krĭng ksu, kphê ti knông lăn Ia Grai, Čư̆ Prŏng, Đức Cơ, klei hdĭp mnuih ƀuôn sang dưi bi mlih sĭt. Ti să hmei, mnuih mă bruă mơ̆ng knơ̆ng bruă 74 mâo 7 êpul ngă bruă. Knŏng ƀuôn hmei mâo 200 čô Jarai mă bruă. Bik nik knơ̆ng bruă uêñ mĭn dŭm gŏ sang bi mguôp, mtô kơ hdră pla mjing, pla mdiê lŏ. Klei hdĭp mnuih ƀuôn sang ƀuh klă klei mlih”.

Binh đoàn 15 dưi ngă jăk bruă čung ba mnuih ƀuôn sang, đru ngă bruă klam bruă duh mkra lĭng kahan, răng mgang klei êđăp ênang ti alŭ wăl knông lăn dŭm čar Gia Lai, Kon Tum. Binh đoàn 15 mkŏ mjing bruă mă hơĭt kơ 9.000 čô mă bruă mnuih djuê ƀiă, mkŏ mjing êbeh 4.200 hlâo gŏ sang Yuăn hŏng mnuih djuê ƀiă bi mguôp, bi đru mđĭ kyar klei hdĭp mda.

Bruă kriê dlăng klei hdĭp mnuih mă bruă, boh nik jing mnuih djuê ƀiă, amâo djŏ knŏng mdei hlăm hdră êlan mkŏ mjing bruă mă leh anăn mđĭ prăk hrui wĭt, ƀiădah lŏ jing hdră bi mguôp sui plah wah knơ̆ng bruă, bruă sang čư̆ êa leh anăn mnuih ƀuôn sang. Dŭm bruă ngă klă klơ̆ng mơ̆ng Binh đoàn 15 hlăm lu thŭn êgao jing klei bi klă kơ ai tiê bruă klam, kyua yang ƀuôn – kyua klei đĭ kyar hơĭt kjăp mơ̆ng krĭng knông lăn Lăn Dap Kngư.