Hluê anăn, bruă hluê ngă hluê si dŭm hdră mtrŭn mrô 178 leh anăn 67 mơ̆ng knŭk kna, mbĭt hŏng dŭm hdră mơar mtô mơ̆ng Phŭn bruă kiă kriê bruă knuă leh anăn bruă sang čư̆ êa čar. Bruă sang čư̆ êa čar Dak Lak mñă kơ dŭm anôk bruă mtrŭt mđĭ bruă hâo hưn, hyuă kjăp dŭm mta phŭn djŏ tuôm hŏng êpul knuă druh, phung mă bruă knŭk kna leh anăn mnuih mă bruă, kñăm rơ̆ng kơ bruă dưi ngă djŏ hŏng klei čuăn.

Hlăm klei mkŏ dăp mnuih mă bruă, tơdah mâo knuă druh akâo mdei bruă, dŭm anôk bruă čiăng ksiêm dlăng klă čiăng bi klă djŏ pô, amâo mâo brei pô thâo mdei bruă. Hră mơar mñă brei mgaih msir hdră đru čiăng djăp ênŭm klei hưn bi klă, djŏ hŏng hdră êlan leh anăn hră mtrŭt gĭt gai mơ̆ng čar. Truh kơ ară anei, Dak Lak mâo hlăm brô 1.086 čô knuă druh, phung mă bruă knŭk kna akâo mdei bruă êlâo kơ jih thŭn amâodah mdei bruă. Hlăm anăn mâo 806 čô mdei êlâo jih thŭn leh anăn 280 čô mdei bruă. Hlăm ênoh anăn mâo 28 čô knuă druh mơ̆ng gưl kdriêk kơ dlông, 131 čô mă bruă, 714 čô knuă druh gưl să leh anăn 22 čô mă bruă hŏng klei kuôl kă.