Ti ƀuôn prŏng Gia Nghiã, Phŭn bruă kahan ksiêm bi mguôp hŏng bruă sang čư̆ êa čar Dak Nông mbĭt hŏng dŭm anôk bruă đru mkŏ mjing knăm trŭn kơ bruă rŭ mdơ̆ng, lăm lui sang dôk êjai, sang tĭ rưč, mbĭt anăn tŭ mă ngăn prăk leh anăn ba jao sang bi hmô kơ mnuih ƀuôn sang. Amai h’Yơi ( mnuih djuê ana Mnông) ti ƀuôn Ting Wel Đơm, să Dăk Nia, ƀuôn prŏng Gia Nghĩa hơ̆k mơai êjai tŭ mă sang dôk mrâo brei thâo:

“Gŏ sang hơ̆k mơak êjai mŭt dôk sang mrâo. Hlăm sang mâo 6 čô hơ̆k mơak êdi, amâo lŏ hŭi kơ angĭn hjan, ƀruih ƀram hlăm yan bhang. Êlâo dih ka mâo sang dôk hŏng amĭ ama, ară anei amâo lŏ dôk sang mkăn ôh. Lač jăk kơ Đảng leh anăn knŭk kna, bruă kahan ksiêm.”

Sang bi hmô dưi mđup brei kơ gŏ sang amai H’Yơi prŏng hlăm brô 50m2, mtih hŏng ƀrik, čuôr tôl, tur ƀrik mnga. Ênoh rŭ mdơ̆ng sang jing 120 êklăk prăk, hlăm anăn 60 êklăk prăk mơ̆ng ênoh đru mơ̆ng Phŭn bruă kahan ksiêm, 20 êklăk prăk mơ̆ng ngăn prăk alŭ wăl, bi adôk mơ̆ng phung mâo ai tiê kmah leh anăn prăk mơ̆ng gŏ sang.

Trung tướng Phạm Thế Tùng – k’iăng khua phŭn bruă kahan ksiêm brei thâo, phŭn bruă lŏ dơ̆ng iêo mkrum phung mâo ai tiê kman hrăm mbĭt hlăm lui êbeh 4.400 boh sang dôk êjai sang tĭ ƀrôč hlăm lăn čar, hŏng ênoh prăk hlăm brô 280 êklai prăk. Bi hŏng čar Dak Nông, Phŭn bruă iêo mkrum leh 30 êklai prăk čiăng đru rŭ mơ̆ng 500 boh sang kơ gŏ sang ƀun, giăm ƀun leh anăn gŏ sang knŭk kna dlăng ba. Trung tướng Phạm Thế Tùng  bi êdah klei đăo knang dŭm boh sang kjăp anei srăng đru kơ mnuih ƀuôn sang bi hơĭt klei hdĭp.

 “Kâo lač jăk kơ klei bi mguôp kjăp plah wah dŭm knơ̆ng, dhar bruă leh anăn phung đru hrăm mbĭt hŏmg Phŭn bruă kahan ksiêm ngă dŭm hdră êlan yuôm bhăn anei. Kâo đăo knang, hŏng anôk dôk kjăp, bi hơĭt klei hdĭp, dŭm gŏ sang srăng hơĭt ai mă bruă knuă, lŏ dơ̆ng kpưn đĭ hlăm klei hdĭp, hur nao nao hgŭm răng mgang klei êđăp ênang, mkŏ mjing hdră mđĭ kyar bruă duh mkra ala ƀuôn ti alŭ wăl."

Hluê si hdră kčah, čar Dak Nông srăng msir lăn jih jang 1.755 boh sang tĭ ƀrôč, đru kơ gŏ sang ƀun, giăm ƀun, gŏ sang knŭk kna dlăng ba leh anăn gŏ sang mnuih djuê ƀiă ti alŭ wăl čar. Yap truh kơ ară anei, čar bi leh hlăm brô 75% hdră bruă leh anăn bi tĭng bi leh bruă anei êlâo kơ hruê 30/8 thŭn anei.

Sa ai hŏng hdră msir lăm sang dôk êjai, sang ti ƀrôč mơ̆ng knŭk kna mtrŭt mjhar, hlăm wưng êgao Phŭn bruă kahan ksiêm dưi rŭ mdơ̆ng êbeh 26.800 boh sang leh anăn lu sang hră, hŏng ênoh êbeh 1.400 êklai prăk. Knŏng mơ̆ng thŭn 2025 truh kơ ară anei, êpul kahan ksiêm bi mfuoiop leh 362 êklai prăk mơ̆ng prăk mlan čiăng rŭ mdơ̆ng dŭm êbâo boh sang klei khăp mđup brei kơ dŭm gŏ sang ti čar Cao Bằng leh anăn Gia Lai.

Yap truh krah mlan 5, čar Gia Lai dưi mphŭn rŭ mdơ̆ng leh anăn mkra mđĭ hlăm brô 7 êbâo 500 boh sang dôk êjai, sang tĭ ƀrôč, mâo êbeh 90% hdră kčah. Hluê si klei tĭng mkă, truh kơ ară anei, hlăm čar Gia Lai mâo 7 anôk bruă gưl kdriêk bi leh hnơ̆ng čuăn hdră kčah mâo: ƀuôn prŏng Pleiku, wăl krah An Khê, wăl krah Ayun Pa, dŭm kriêk Đăk Pơ, Đức Cơ, Krông Pa leh anăn Phú Thiện. Lu alŭ wăl ka dưi bi leh ƀiădah ăt mâo ênoh sang dôk êjai, sang tĭ ƀrôč dưi msir lăm msĕ si kdriêk Mang Yang mâo 707 boh sang (êbeh 85%) Krông Pa 404 boh sang (73,3%), Chư Pưh 437 boh sang (46,5%),…

Nguyễn Quyết Thắng, Khua bruă sang čư̆ êa să Ia Peng, kdriêk Phú Thiện, čar Gia Lai brei thâo, hŏng boh sĭt ktĭng mnuih djuê ƀiă, mnuih ƀuôn sang mâo klei hmăng hmưi čiăng mkra sang krum knhuah gru, bruă sang čư̆ êa ăt ngă klei găl čiăng mnuih ƀuôn sang dưi mâo sang dôk djŏ guôp hŏng knhuah gru djuê ana pô.

 “Hlăm klei ngă hdră hmei ăt iêo đa đa dŭm gŏ sang wĭt čiăng bi tŭ ư hdră mkŏ mjing, mkra mđĭ sang dôk mâo đa đa gŏ sang mnuih djuê ƀiă hluê si klei čiăng, klei hmăng hmưi čiăng mkra mđĭ leh anăn rŭ mdơ̆ng sang krum knhuah gru. Hluê si tur knơ̆ng anăn hmei mâo hdră tă kơ mnuih ƀuôn sang mkra sang krum djŏ hŏng ênhă, rơ̆ng kơ 3 kjăp leh anăn siam.”

Lu gŏ sang lŏ čan thiăm ngăn prăk čiăng pŏk phai ênhă sang leh anăn mkra mnư̆, tač sang, sang tlô. Kyuanăn, hdră lăm lui sang dôk êjai, sang tĭ rưč ti Gia Lai đru kơ êbeh 4.500 gŏ sang ƀun, giăm ƀun bi hơĭt klei hdĭp, mbĭt anăn mkŏ mjing klei mlih klă sĭt krĭng ƀuôn sang, mđĭ hĭn klei đăo knang mơ̆ng mnuih ƀuôn sang hŏng dŭm hdră êlan bi hơĭt yang ƀuôn mơ̆ng Đảng leh anăn knŭk kna.

Hdră lăm lui sang dôk êjai sang tĭ ƀrôč amâo djŏ knŏng ba wĭt sang dôk kjăp kơ dŭm êbâo gŏ êsei ƀun, ƀiădah lŏ jing klei bi klă kơ ai tiê kyua mnuih ƀuôn sang mơ̆ng êpul kahan ksiêm yang ƀuôn, klei hrăm mbĭt mơ̆ng dŭm gưl bruă, dhar bruă leh anăn yang ƀuôn. Dŭm boh sang mrâo amâo djŏ knŏng đru kơ mnuih ƀuôn sang bi hơĭt klei hdĭp, mđĭ kyar bruă duh mkra, ƀiădah lŏ đru bi mlih boh sĭt krĭng ƀuôn sang, mđĭ hĭn klei đăo knang mơ̆ng mnuih ƀuôn sang hlăm hdră êlan yang ƀuôn mơ̆ng Đảng leh anăn knŭk kna.