Ka Phu Beng jing mnuih djuê ana Ktu, ti să Cà Dy, kdriêk Nam Giang, čar Quảng Nam. Ară anei jing leh gŏ sang mâo hnư hrui wĭt đĭ ƀiădah ñu kăn dưi wơr kơ thŭn mlan dleh dlan, ung mô̆ ñu mă bruă suaĭ êmăn ƀiădah klei hdĭp ăt kƀah êwư.

Hmư̆ klei phung knuă druh să mtrŭt mjhar lehanăn ktrâo lač kơ hdră duh ƀơ̆ng, ñu jhŏng nao čan 50 êklăk prăk mơ̆ng Knơ̆ng prăk đru ba yang ƀuôn čiăng mkra mđĭ lăn, pla ana boh kroh, pla dliê, pŏk mlar hdră rông mnơ̆ng. Ară anei, Ka Phu Beng dưi ruah jing ƀĭng ngă lŏ hma mbruă ti kdriêk.

“Gŏ sang kâo rông 6 drei êmô ana mđai, mlan êgao čhĭ leh 2 drei, 7 êklăk prăk sa drei. Hnư hrui wĭt mâo 80 êklăk prăk/thŭn. Gŏ sang pla ana boh kroh ba čhĭ ăt mâo lu mơh. Dŭm anôk bruă djŏ tuôm kdriêk Nam Giang ktrâo lač leh kơ hdră rông mnơ̆ng, pla mjing. Hnư hrui wĭt mơ̆ng bruă pla dliê, rông mnơ̆ng đru leh kơ dŭm gŏ sang đĭ kyar, tlaih kơ ƀun. Mơ̆ng anăn, gŏ sang dưi mdơ̆ng sang kjăp, dlăng kriê rông ba 3 čô anak hriăm Gưl prŏng.

Kdriêk Nam Giang mâo hlăm brô 80% jing mnuih djuê ƀiă. Ti alŭ wăl kdriêk mâo 200 gru hmô ƀĭng ngă lŏ hma mă bruă duh mkra bi mguôp hdră lŏ hma – dliê kmrơ̆ng, mđĭ kyar bruă duh mkra êpul hluê hdră bi mguôp êpul, bi mlih mnơ̆ng pla, mnơ̆ng rông. Lu gŏ sang mâo hnư hrui wĭt hơĭt mơ̆ng dŭm êklăk truh kơ dŭm êuh êklăk prăk/sa thŭn. Châu Văn Ngọ, Kơiăng khua Anôk bruă sang čư̆ êa kdriêk Nam Giang brei thâo: Mơ̆ng phŭn mkăp prăk đru mơ̆ng Knŭk kna lehanăn čar, êngao duh kơ anôk bruă nah gŭ, kdriêk Nam Giang lŏ đru kơ mnuih ƀuôn sang mkŏ mjing lu gru hmô ngă bruă duh mkra pla mjing djŏ guôp hŏng klei găl mâo mơ̆ng alŭ wăl, đru diñu mđĭ hnư hrui wĭt. Ară anei, ênoh gŏ êsei ƀun ti kdriêk Nam Giang hrŏ dôk 25%. Kah knar grăp thŭn, ênoh gŏ êsei ƀun hrŏ êbeh 8%.

 “Hluê hŏng hdră đru, duh bi liê mơ̆ng Knŭk kna ăt msĕ mơh iêu mtrŭt djăp klei găl mâo, kdriêk Nam Giang dôk pŏk hluê ngă dŭm hdră bruă ti alŭ wăl. Êngao duh kơ anôk bruă nah gŭ mkăp kơ hdră duh mkra lehanăn klei hdĭp, lŏ đru mđĭ kyar bruă pla mjing, đru hdră duh ƀơ̆ng kơ mnuih ƀuôn sang, boh nik dŭm gŏ sang ƀun, giăm ƀun, gŏ sang mrâo kpưn đĭ tlaih kơ ƀun čiăng đru kơ mnuih ƀuôn sang mâo klei găl dưi tlaih kơ ƀun hơĭt kjăp. Hlăm anăn, mđing kơ dŭm gru hmô mđĭ kyar bruă pla mjing hluê hdră bi hgŭm boh tŭ yuôm plah wah anôk bruă duh mkra čiăng hrui bleimnơ̆ng dhơ̆ng. Kyua anăn, đru mguôp leh hlăm hdră bi hrŏ ƀun, mkŏ mkra krĭng ƀuôn sang mrâo.

Dŭm hdră kñăm ala čar, boh nik jing Hdră kñăm ala čar bi hrŏ ƀun hơĭt kjăp đru leh kơ dŭm êbâo gŏ sang mnuih djuê ƀiă, gŏ sang ti krĭng taih kbưi, krĭng čư̆ čhiăng čar Quảng Nam dưi đru kơ hdră duh ƀơ̆ng, mkăp mjeh mnơ̆ng pla, ktrâo lač kơ hdră rông mnơ̆ng, pla mjing, đru diñu pŏk mlar hnơ̆ng ngă bruă. Hồ Quang Bửu, Kơiăng khua Anôk bruă sang čư̆ êa čar Quảng Nam brei thâo:

 “Dŭm hdră kñăm ala čar mơ̆ng Gưl dlông ăt msĕ mơh phŭn mkăp ngăn prăk knŭk kna mơ̆ng čar đru leh kơ mnuih ƀuôn sang djuê ana ƀiă čar Quảng Nam mđĭ lar leh boh tŭ dưn, đru mđĭ kyar bruă duh mkra ala ƀuôn krĭng čư̆ čhiăng. Ară anei, hmei dôk gĭt gai, mđĭ lar dŭm gru hmô jăk, si srăng ngă čiăng kơ lu gŏ sang ăt msĕ mơh êpul êya mnuih ƀuôn sang dôk, boh nik ti krĭng čư̆ čhiăng hdĭp djŏ guôp hŏng hdră mđĭ lar dŭm gru hmô anei. Mơ̆ng anăn, đru mguôp kơ bruă mkra mđĭ hnư hrui wĭt, bi hrŏ ƀun hơĭt kjăp./.