Ti ƀuôn H'Bel, să Ia Kdăm, kdriêk Ia Pa, čar Gia Lai, gŏ sang Kpă H’Mrat (kkiêng thŭn 1974) jing gŏ êsei ƀun sui thŭn lehanăn năng ai dleh snăk tlaih kơ ƀun. Gŏ sang 8 čô ƀiădah amâo mâo lăn pla mjing. Pô mă bruă phŭn hlăm gŏ sang jing ung ñu, duam ruă nanao. Klei ktrŏ hlăm duh mkra lĕ ti mô̆ lehanăn mniê anak khua. H’Mrat brei thâo, khădah mâo lu klei đru mơ̆ng dŭm Hdră bruă mơ̆ng Knŭk kna lehanăn êpul êya, ƀiădah gŏ sang ka thâo ôh hdră čiăng tlaih kơ ƀun.

"Gŏ sang kâo dleh dlan, anak lu lehanăn dôk điêt sơaĭ. Kâo hiu nao mă bruă mưn čiăng mâo prăk kăk. Amâo mâo lăn pla mjing, amâo mâo bruă mă hơĭt kjăp, anak čô ruă duah kăn mâo prăk blei êa drao gŭn, klei hdĭp dleh dlan êdi”.

Tơdah ti să Čư̆ Mô̆ mâo 34 gŏ sang Jarai ƀun msĕ si sang H’Mrat, snăn ti să Pờ Tó, ăt ti kdriêk Ia Pa, klei kƀah lăn pla mjing, ngă kơ klei tlaih ƀun hĭn mơh dleh dlan. Nguyễn Quốc Việt, Khua Anôk bruă sang čư̆ êa să Pờ Tó brei thâo, hlăm 6 alŭ mnuih djuê ƀiă mâo truh 214 gŏ sang ƀun, lu jing amâo djăp lăn pla mjing. Klei anei ngă kơ boh tŭ hdră bi hrŏ ƀun amâo ba wĭt klei tŭ dưn lu ôh.

 “Tlaih ƀun hơĭt kjăp brei hluê ngă hlăm wưng sui amâo dưi ngă hlăm sa, dua hruê ôh. Boh nik, dŭm gŏ sang ti alŭ Bi Giông, Bi Gia, klei kƀah lăn pla mjing dôk mâo lu. Čiăng mđĭ kyar bruă duh mkra, čiăng tlaih kơ ƀun brei mâo lăn ala, hdră mnêč pla mjng. Bi knŏng jưh knang hlăm yan ngă bruă, hiu mă bruă mưn hlăm sa, dua hruê dleh snăk. Ară anei, mnuih ƀuôn sang dleh dlan hlăm djăp mta ra klei. Khădah tuh êyuh jih klei mâo hlăm dŭm hdră ala čar kñăm čiăng đru kơ mnuih ƀuôn sang kơ lăn ala, sang dôk, hdră duh ƀơ̆ng”.

Tĭng truh knhal jih thŭn 2023, kluôm čar Gia Lai mâo êbeh 31.500 gŏ sang ƀun hluê hnơ̆ng čuăn ƀun lu tĭng, hŏng hnơ̆ng 8,11%. Hlăm anăn, gŏ sang ƀun lu jing mnuih djuê ƀiă. Knŏng ti kdriêk Ia Pa mâo êbeh 2.174 gŏ sang ƀun, truh 15,26%. Lu gŏ sang ƀun dleh dưi tlaih ƀun kyua amâo lăn pla mjing.

Hlăm wưng êgao, kdriêk Ia Pa gĭr mtô mblang, mtrŭt mjhar mnuih ƀuôn sang amâo čhĭ lăn pla mjing. Mbĭt anăn, kyua lăn amâo lŏ dôk, kdriêk akâo kơ Anôk bruă sang čư̆ êa čar Gia Lai lŏ sua wĭt lăn mơ̆ng dŭm anôk bruă duh mkra ngă bruă amâo tŭ dưn, leh kơnăn jao kơ alŭ wăl mkăp kơ mnuih ƀuôn sang. Ară anei, hdră msir tal êlâo hĭn jing mđing iêu mthưr klei duh bi liê kñăm mjing boh kdrŭt hlăm hdră mđĭ kyar bruă duh mkra, msir mghaih bruă mă ti alŭ wăl. Ksor Suy, Kơiăng khua Anôk bruă sang čư̆ êa kdriêk Ia Pa, čar Gia Lai, brei thâo:

"Hlăm wưng êgao, kdriêk iêu mthưr phung duh bi liê, boh nik mkra dŭm sang maĭ mkra mjing mnơ̆ng lŏ hma čiăng mjing klei găl hlăm bruă hrui blei mnơ̆ng dhơ̆ng, mjing bruă mă kơ mnuih ƀuôn sang. Mơ̆ng anăn đru mđĭ hnư hrui wĭt, đru tlaih kơ ƀun hơĭt kjăp, tŭ dưn. Čuăl mkă krĭng, wăl tuh tia mkra mjing, mtô mblang kơ mnuih ƀuôn sang hrăm mbĭt hŏng bruă sang čư̆ êa alŭ wăl rơ̆ng kjăp klei êđăp ênang”