Ară anei čar mâo leh êbeh 2.000 boh sang bi leh. Đa đa alŭ wăl msĕ si wăl krah An Khê leh anăn ƀuôn prŏng Pleiku klă klơ̆ng bi leh hdră bruă. Hŏng hnơ̆ng đru 60 êklăk prăk/gŏ êsei mkra mrâo leh anăn 30 êklăk prăk/gŏ êsei mkra mđĭ, dŭm alŭ wăl pral iêô mkrum klei găl tinăn mtam, mđĭ lar bruă klam mnuih ƀuôn sang.

Anôk bruă gĭt gai lĭng kahan čar Gia Lai leh anăn dŭm anôk bruă lĭng kahan ti alŭ wăl đru mguôp giăm 4000 hruê ai mă bruă, đru dŭ mnơ̆ng dhơ̆ng mkra mjing, mdơ̆ng sang leh anăn ktuê dlăng bruă rŭ mdơ̆ng. Khădah snăn, čar Gia Lai ăt tuôm hŏng klei dleh dlan kyua ênoh mnơ̆ng dhơ̆ng mkra mjing đĭ, kƀah mnuih mă bruă leh anăn klei ngă bruă ăt adôk kƀah mơ̆ng gŏ êsei mnuih ƀuôn sang. Knơ̆ng bruă sang čư̆ êa čar mtă kơ dŭm alŭ wăl mđĭ ktang ksiêm dlăng, gĭt gai leh anăn thâo ba yua klei găl čiăng bi leh hdră kčah djŏ hnơ̆ng.