Alŭ Nà Khau, să Đồng Tâm, kdriêk Bình Liêu, Quảng Ninh jing alŭ wăl dleh dlan, klei thâo săng mơ̆ng mnuih ƀuôn sang kơ hdră bhiăn dôk êdu kƀah. Dŭm klei bhiăn hđăp đưm amâo lŏ djŏ guôp. Kyua anăn, hlăm hdră mtô mblang ti dŭm ƀuôn sang krĭng dlông tuôm hŏng lu klei dleh dlan. Hluê si Amai Nguyễn Thị Kim Oanh, knuă druh bruă kriê dlăng hdră bhiăn să Đồng Tâm:

Tal sa jing klei thâo săng mơ̆ng mnuih ƀuôn sang hlăm să êdu kƀah. Tal dua jing mâo mnuih ƀuôn sang amâo thâo klei Yuăn ôh, hdră mtô mblang mơ̆ng phung knuă druh truh ti alŭ, ƀuôn, sang dhar kreh snăn lŏ yua phung khua alŭ, khuă ƀuôn lŏ mblang klei blŭ mnuih djuê ƀiă, mblang jih klei pô mtô anăn kơ mnuih ƀuôn sang snăn kơh diñu thâo klă ko dŭm mta phŭn anăn.

Dŭm thŭn giăm anei, hdră mtô mblang hdră bhiăn kơ mnuih ƀuôn sang mâo nanao bruă Đảng, bruă sang čư̆ êa alŭ wăl să Đồng Tâm mđing dlăng, dlăng anei jing bruă phŭn. Să mkŏ mjing leh êpul mtô mblang hdră bhiăn, bi hgŭm hŏng knuă druh alŭ, ƀuôn ruah hdră mtô mblang djŏ guôp.

Êpul hgŭm mtô mblang, mjuăt bi hriăm hdră bhiăn kdriêk Bình Liêu hluê ngă kjăp hdră êlan mtrŭn mơ̆ng Đảng, hdră bhiăn mơ̆ng Knŭk kna čiăng mkŏ mkra hdră bruă, hdră kčah mtô mblang hdră bhiăn djŏ guôp hŏng grăp čô, alŭ wăl lehanăn hdră duh mkra – ala ƀuôn ti alŭ wăl, boh nik hŏng mnuih djuê ƀiă. Knŏng 6 mlan akŏ thŭn anei, dŭm să, wăl krah hlăm alŭ wăl kdriêk mkŏ mjing leh 141 gưl mtô mblang kơ hdră bhiăn, mâo 11.000 čô nao hgŭm. Hluê hŏng dŭm mtô mblang hdră bhiăn, mnuih ƀuôn sang djuê ƀiă ti alŭ wăl kdriêk Bình Liêu mâo leh klei bi mlih jăk mơ̆ng klei thâo săng hlŏng truh kơ bruă ngă. Mnuih ƀuôn sang nao hgŭm hlăm hdră bruă ti alŭ wăl, boh nik hdră mkŏ mkra krĭng ƀuôn sang mrâo lehanăn bi hrŏ ƀun hơĭt kjăp. Chíu Thanh Sáng, mnuih ƀuôn sang alŭ Nà Khau, să Đồng Tâm myơr leh lăn mkra êlan, brei thâo: Mâo knuă druh mtô mblang, hmei thâo săng leh klă kơ hdră êlan Knŭk kna lehanăn mnuih ƀuôn sang nao hgŭm. Hmei mâo êlan bêtông găn êrô găl ênưih, čhĭ ana hngô, ana mtŭk mâo ênoh mơh.

Mđing kơ hdră mtô mblang, mjuăt bi hriăm hdră bhiăn ti alŭ wăl, boh nik ti dŭm krĭng taih kbưi, Anôk bruă Djuê ana čar Lào Cai bi hgŭm leh kjăp hŏng dŭm gưl bruă, mâo hdră msir, hdră ngă klă klơ̆ng. Mơ̆ng anăn đru mđĭ klei thâo săng, hluê ngă hdră bhiăn ti krĭng mnuih djuê ƀiă.

Gŏ sang Thền Mây Phấn, Êpul mrô 2 mbĭt hŏng dŭm êtuh gŏ sang mnuih djuê ana Nùng, ti să Nàn Sán, kdriêk Si Ma Cai kreh mâo anôk bruă djŏ tuôm mtô mblang kơ Hdră bhiăn bi kdơ̆ng hŏng matuĭ, Hdră bhiăn Ung mô̆ gŏ sang, hdră mtrŭn msir mghaih lăn dôk, lăn pla mjing kơ mnuih ƀuôn sang djuê ƀiă lehanăn dŭm hdră êlan mtrŭn, mđĭ kyar bruă duh mkra. Hluê hŏng dŭm gru hmô hră duh mkra, klei hdĭp mnuih ƀuôn sang ƀrư̆ hruê ƀrư̆ đĭ kyar, anak čô dưi nao sang hră mơar, mđing kơ klei hriăm hră mơar jăk hĭn.

Klei hdĭp ară anei bi mlih leh mkă hŏng êlâo, anak čô dưi nao sang hră, mâo bruă mă kơh dôk ung mô̆.

Lồ Xuân Chô, Khua adŭ bruă Djuê ana kdriêk Si Ma Cai brei thâo, kyua hluê ngă kjăp dŭm klei kčah mtrŭn mơ̆ng hdră bhiăn, mnuih ƀuôn sang ba yua leh kjăp hdră mtrŭn hlăm klei hdĭp.

Dŭm hdră êlan mtrŭn mơ̆ng Knŭk kna mtrŭn ti să lehanăn krĭng knông lăn, mâo hdră ala čar kñăm mđĭ kyar bruă duh mkra – ala ƀuôn krĭng mnuih djuê ƀiă dưi msir mghaih leh dŭm mta, msĕ si klei kơ êa yua kơ mnuih ƀuôn sang, pŏk mlar êlan klông ba wĭt klei jăk găl kơ hdră mnia mblei.

Bi mklă bruă mtô mblang hdră bhiăn hlăm krĭng mnuih ƀuôn sang djuê ƀiă jing bruă klam phŭn, brei mkŏ mjing nanao, mbĭt hŏng hdră mtô mblang hdră bhiăn hluê dŭm klei bi kƀĭn lehanăn kdrăp hâo hưn, hdră mtô mblang hdră bhiăn hluê dŭm klei bi lông, hdră tui ksiêm kơ hdră bhiăn hlăm krĭng mnuih djuê ƀiă mâo leh Anôk bruă djuê ana čar mkŏ mjing ba wĭt leh boh tŭ dưn klă sĭt, đru kơ mnuih ƀuôn sang thâo săng hĭn kơ hdră bhiăn. Amai Vừ Thị Sung, alŭ Kin Sáng Hồ, să Pa Cheo, kdriêk Bát Xát brei thâo:

Lŏ dơ̆ng hluê ngă hdră mtô mblang, să hmei ba mơĭt truh kơ klei bi lông hruê anei jing tui ksiêm tui hriăm lehanăn hlue ngă hdră bhiăn jing klei dưi lehanăn klei đua klam mơ̆ng grăp čô mnuih ƀuôn sang.

Tĭng truh kơ knhal jih mlan 6, kluôm čar Lào Cai mkŏ mjing êbeh 1.000 klei bi kƀĭn mtô mblang, mjuăt bi hriăm kơ hdră bhiăn, mkăp klei hâo hưn, mkŏ mjing tŭ dưn Klei bi lông tui ksiêm hdră bhiăn kơ mnuih ƀuôn sang djuê ƀiă. Mơ̆ng anăn đru mđĭ klei thâo săng hluê ngă hdră bhiăn hlăm krĭng mnuih ƀuôn sang djuê ƀiă, mkŏ mkra ƀuôn sang hơĭt ênang, đĭ kyar. Hluê si Trần Phùng, Kơiăng khua Dhar bruă djuê ana čar Lào Cai brei thâo:

Hdră mtô mblang lu jơr msĕ snăn hlăm wưng êgao drei dưi thâo sơaĭ, anăn jing klei ngă soh hŏng hdră bhiăn mơ̆ng mnuih ƀuôn sang djuê ƀiă hrŏ lu, ala ƀuôn đĭ kyar jăk siam, dŭm klei hâo hưn djŏ tuôm kơ hdră bhiăn, hdră mtrŭn đru kơ al ƀuôn grăp čô dưi thâo sơaĭ./.