Hluê ngă hdră êlan 214 kơ lăm lui sang dôk êjai, sang tĭ rưč, bruă sang čư̆ êa čả Dak Lak jao kơ kahan ksiêm čar gĭt gai, bi mguôp hŏng knơ̆ng bruă mkŏ mkra, knơ̆ng bruă ngăn prăk, dŭm alŭ wăl leh anăn dŭm anôk bruă djŏ tuôm gĭt gai rŭ mdơ̆ng 4.285 boh sang mđup brei kơ dŭm gŏ sang ƀun, giăm ƀun hlăm alŭ wăl čar hlăm thŭn 2025.

Hlăm ênoh anăn, mâo êbeh 1.650 gŏ sang mnuih djuê ƀiă. Ênoh prăk mdơ̆ng sang jing 342,8 êklai prăk. Ênoh đru kơ grăp boh sang jing 80 êklăk prăk. Dŭm alŭ wăl, dhar bruă ti čar Dak Lak hur har hâo hưn, mtrŭt mjhar yang ƀuôn, bi mkrum mguôp thiăm ênoh prăk, mnơ̆ng yua, hruê ai čiăng rŭ mdơ̆ng dŭm boh sang kjăp hĭn leh anăn rơ̆ng djŏ hdră kčah, đru kơ dŭm gŏ sang dleh dlan hnưm bi hơĭt klei hdĭp.