Huỳnh Đảm, Khua knơ̆ng bruă mặt trận čar kwar gưl dlông Việt Nam êlâo dih hŏng klei mơak yăl dliê kơ klei dưi yan mnga thŭn 1975, kbiă hriê mơ̆ng klei Đảng, mơ̆ng Awa Hồ kiă kriê, kbiă hriê mơ̆ng ai ktang lĭng kahan yang ƀuôn Việt Nam jhŏng ktang, mơ̆ng klei thâo bi mguôp jih jang djuê ana. Hlăk anăn jih jang djuê ana bi mguôp, dưr dhŭng bi mguôp, kdrăn mblah iêo, ƀuôn sang wĭt lač ksŭng drŭng bi nao. Klei anăn mjing leh ai ktang prŏng mơ̆ng jih djuê ana, lehanăn klă mngač hĭn jing mơ̆ng klei thâo bi mguôp lĭng kahan hŏng mnuih ƀuôn sang. Tui si Huỳnh Đảm, klei bi mguôp lĭng kahan lehanăn mnuih ƀuôn sang bi êdah leh klei ktang hlăm kdrăn mblah mâo anăn Hồ Chí Minh:

 “Êjai dŭm êpul kahan prŏng ksŭng pral, mâo sua mă dŭm pôih kđông mơ̆ng Sài Gòn - Gia Định snăn mmông anăn mnuih ƀuôn sang ti Sài Gòn -Gia Định ăt kgŭ sua mă hlăm grăp kdrêč êlan, alŭ anôk, kgŭ sua mă alŭ wăl. Bi kđhĭt hla čhiam gru, boh hră čih drông êpuil kahan mâo klei dưi, lehanăn lŏ wĭt đru bi răng kriê klei êđăp ênang, răng kriê boh mơ̆ng klei dưi mơ̆ng mnĭt mmông tal êlâo leh mâo mă klei dưi”.

Trung tướng, K’iăng nai prŏng - nai prĭn Trần Vi Dân, Khua anôk bruă kreh knhâo, hdră êlan lehanăn hƀuê ênuk kahan ksiêm, Phŭn bruă kahan ksiêm brei thâo, klei mkŏ mjing lehanăn păn kjăp ai tiê mnuih ƀuôn sang, rŭ mdơ̆ng mơ̆ng lam ai tiê mnuih ƀuôn sang hlăm klei bi blah mâo leh Đảng mđing êdi. Đảng gĭt gai pioh mkŏ mjing, ksul mbŭ ai tiê klei kgŭ kdơ̆ng jih jang mnuih ƀuôn sang bi blah kyua klei djŏ anăn jing: “Amâo mâo ôh klei yuôm bhăn hĭn kơ klei êngiê”. Klei djŏ anăn mâo leh hlam ai tiê mnuih ƀuôn sang, mjing leh ai ktang, klei jhŏng hlăm klei bi blah, dưi kdơ̆ng hŏng klei jhat ƀai.

Hlăm klei dưi păn kjăp ai tiê mnuih ƀuôn sang, bi klin jih jan gmnuih ƀuôn sang, Đảng duh mĭn leh pioh kơ klei kiă kriê, gĭt gai mkŏ mjing ai ktang hlăm mnuih ƀuôn sang, hlăm anăn bruă klam yuôm bhăn mơ̆ng lĭng kahan yang ƀuôn lehanăn ti kwar dhŭng mơ̆ng kahan sua wĭt klei êngiê, lehanăn êpul răng mgang klei êđăp ênang kwar dhŭng, Trung tướng Trần Vi Dân lač, klei hriăm kơ “Bruă păn kjăp ai tiê mnuih ƀuôn sang mkŏ mjing klei jih jang mnuih ƀuôn sang bi sa ai, klei anăn amâo mâo mlih ôh” hlăm wưng ênuk mlih mrâo kpưn đĭ ară anei:

 “Hmei ƀuh klei hriá\m kơ klei păn kjăp ai tiê mnuih ƀuôn sang, lehanăn mkŏ mjing ai ktang hlăm mnuih ƀuôn sang jing klei amâo mâo mlih ôh. Ñu lŏ dơ̆ng bi hdơr kơ drei dŭm mgta klei bi mđĭ ai, mtrŭt mnuih ƀuôn sang mâo klei bi sa ai, bi jưh knang, tui tiŏ hdră êlan mơ̆ng Đảng, klei bhiăn knŭk kna. Lehanăn bi klin, tă êlan kơ klei kiă kriê, klei gĭt gai mâo dŭm bruă djŏ guôp pioh mkŏ mjing klei kjăp ai tiê hlăm mnuih ƀuôn sang, pioh rŭ mdơ̆ng lehanăn răng mgang lăn čar hlăm ênuk kpưn đĭ mlih mrâo mơ̆ng djuê ana Việt Nam”.

Thượng tướng Trịnh Văn Quyết, Khua kiă kriê bruă kđi čar hlăm lĭng kahan yang ƀuôn Việt Nam, hlăm klei blŭ hrăm ti anôk trông čhai “Klei blah dưi yan mnga thŭn 1975 hŏng ênuk kpưn đĭ mlih mrâo mơ̆ng djuê ana Việt Nam”, mkŏ mjing aguah hrue 19/4 leh êgao: Klei dưi mơ̆ng klei bi blah yan mnga thŭn 1975 jing leh sa hlăm dŭm klei hing ang jhŏng ktang hĭn hlăm hƀuê ênuk rŭ mdơ̆ng lehanăn răng mgang lăn čar mơ̆ng djuê ana Việt Nam. Anăn jing klei dưi mơ̆ng klei jhŏng, mơ̆ng klei mĭn Việt Nam, jing klei bi klin jih jang klei khăp kơ lăn čar bi mguôp kjăp hŏng ai tiê mhluh lir lăn čar, lehanăn klei êpa mhao kơ klei êđăp ênang, bi klin jih jang ai ktang mơ̆ng kle bi hgŭm mguôp jih jang djuê ana hŏng klei ktang ênuk mrâo lehanăn klei bi mguôp hŏng tač êngao.

Klei dưi prŏng yan mnga 1975 lŏ jing klei dưi mơ̆ng klei sua wĭt klei êngiê kơ djuê ana ênuk gưl tal 20, đru leh yuôm bhăn hlăm klei sua wĭt klei êngiê kơ anak mnuih, kơ klei êđăp ênang, ngă phŭn hlăm klei đĭ kyar yang ƀuôn, mtrŭt dŭm djuê ana dôk lĕ hlăm klei arăng ap gư̆ ktư̆ juă kgŭ kdơ̆ng bi rai jih hdră êlan măk ƀai ênuk mrâo dlông rŏng lăn. Thượng tướng Trịnh Văn Quyết lač:

 “Sa ai mơ̆ng klei iêo mthưr mơ̆ng Đảng lehanăn khua gĭt gai Hồ Chí Minh, jih jang djuê ana Việt Nam bi mguôp leh jing sa êpul kjăp ktang, sa ai hlăm klei thâo săng, sa ai tiê ngă bruă, bi mguôp hlăm Đảng, bi mguôp jih jang mnuih ƀuôn sang, bi mguôp dưr dhŭng, bi mguôp êpul khăp kơ lăn čar lehanăn phung đĭ kyar tar rŏng lăn... Kyuanăn, kluôm Đảng, jih jang lĭng kahan drei hlăm dua kwar dhŭng dưr tuôm găn leh djăp mta klei dleh dlan, săn asei mlei hlăm klei bi blah bi rai jih mnêč jhat mơ̆ng roh Mi lehanăn knŭk kna jơ̆ng kngan ñu”.

Klei dưi prŏng yan mnga thŭn 1975 jing nanao gru kruak knăl hlăm hƀuê ênuk bi blah rŭ mdơ̆ng lăn čar, lehanăn răng kriê lăn čar mơ̆ng djuê ana Việt Nam, lehanăn hƀuê ênuk kơ klei kgŭ krŭ kdơ̆ng mơ̆ng Việt Nam. Dŭm klei tŭ dưn mơ̆ng hƀuê ênuk, dŭm klei hriăm mơ̆ng klei dưi prŏng yang mnga 1975 hlăk lehanăn srăng lŏ dŭm gưl mđĭ hĭn, pioh mprăp kjăp kơ jih djuê ana čhuang kjăp knhuang kpưn đĭ hlăm ênuk mlih mrâo./.