9 klang phung êngiă asei ƀuh, mƀĭn ti să Thanh Thủy, kdriêk Vị Xuyên, čar Hà Giang. Hlăm klei bi blah răng mgang knông lăn nah Dưr, ti Vị Xuyên, dŭm êbâo čô knuă druh, lĭng kahan jhŏng, kjăp ai tiê bi blah. Êbeh 4000 čô knuă druh, lĭng kahan jhŏng săn asei, truh ară adôk êbeh 1000 čô êngiă asei ăt ka ƀuh ôh klang.

Klei blŭ hlăm knăm ba dơr, bi mklă: Bruă đảng, bruă sang čư̆ êa, mnuih ƀuôn sang dŭm djuê ana čar Hà Giang hdơr nanao kơ ai tiê leh anăn klei săn asei jhŏng ktang mơ̆ng ênuk nao êlâo; bi hgŭm, bi tŭ ư, gĭr răng mgang leh anăn mkŏ mjing ƀuôn sang ƀrư̆ mdrŏng sah jăk siam; đru hlue ngă tŭ dưn klei mkŏ mjing leh anăn răng mgang čar kwar.