Mlam hrue 6/4, êbeh 1.500 čô phung bi ala, lehanăn dŭm êbâo čô mnuih ƀuôn sang čar Daklak mâo dlăng klei kdŏ muiñ hŏng akŏ “Klei muiñ kơ klei êđăp ênang”, bi hdơr 50 thŭn hrue kwar dhŭng mâo klei êngiê, mhluh lir lăn čar. Hŏng klei yuôm bhăn mơ̆ng anôk bi knăl kơ klei dưi mâo mă Ƀuôn Ama thuôt, klei dưi pŏk êlan, mjing kơ klei dưi prŏng Yan mnga thŭn 1975, giăm 250 čô mnuih nao mdah klei kdŏ muiñ lač djŏ kơ ai tiê, klei jhŏng ktang bi êdah ai êwa hơ̆k mơak lăn dap kngư mâo klei êngiê, lehanăn hŏng klei pral ksŭng mblah truh kơ Sài Gòn. Nguyễn Thị Thúy Diễm, ti ƀuôn hgŭm Tân An, ƀuôn prŏng Ƀuôn Ama Thuôt lač:

 “Hdră mdah anei kdrăp kơah êdi lehanăn prŏng mơh. Jih sang hmei hơ̆k mơak nao dlăng, ƀuh jing siam, lehanăn jih jang mnuih bŏ hŏng klei mơak .”

Êngao kơ klei tui ksiêm duah klei bi blah mphŭn dô mơ̆ng dŭm klei čih hlăm hră mơar, phung bi ala, lehanăn mnuih nao dlăng lŏ hmư̆ klei yăl dliê hlăm anôk mdah anăn mơ̆ng Trung tướng, Pô jhŏng ktang mơ̆ng êpul lĭng kahan yang ƀuôn Đoàn Sinh Hưởng, jing khua Đại đội 9 êlâo dih, hlăm Trung đoàn êdeh sar 273, pô mgăt êdeh sar 980 mŭt mblah sư đoàn 23 Việt Nam cộng hòa ti Ƀuôn Ama Thuôt, hlăm hrue 10/3/1975. Rup êdeh sar 980, ară anei jing leh dŏ bi knăl ai ktang klei bi blah mphŭn dô, ti knưng klei dưi Ƀuôn Ama Thuôt. Trung tướng Đoàn Sinh Hưởng brei thâo, ñu bŏ hŏng klei myưng mơang kyuadah hƀuê ênuk gưl tal 21 nao hlăm klei bi blah mhluh lir lăn čar, mâo klei mơak êdi kơ klei dưi mâo leh hlăm 50 thŭn êgao:

"Kâo bŏ hŏng klei myưng m’ang kyua mâo nao hlăm klei bi blah yuôm bhăn snăn mbĭt hŏng ƀĭng kahan, lehanăn dưi bi leh bruă čuăn. Êdei kơ 50 thŭn êgao lŏ wĭt kơ anei, ƀuh lăn čar pô bi mlih, boh nik Ƀuôn Ama Thuôt ară anei mdê hĭn leh, anei jing sa klei mơak êdi”.

Ti Sang hră bruă kahan alŭ wăl 7 (kdriêk čar mrô 12, ƀuôn prŏng Hồ Chí Minh) ăt mrâo mkŏ mjing mơh klei kdŏ muiñ bi hdơr 50 thŭn hrue kwar dhŭng mâo klei êngiê, hŏng akŏ: “50 thŭn – yan mnga lăn čar”. Hdră mdah anei jing yuôm bhăn, knar hŏng klei tŭ dưn kơ hƀuê ênuk mơ̆ng hrue kwar dhŭng mâo klei êngiê, mhluh lir lăn čar. Mơ̆ng anăn bi mklă, klei gĭt gai klă mngač mơ̆ng Đảng lehanăn khua gĭt gai Hồ Chí Minh; ai ktang lehanăn klei kut kat bi blah hŏng klei dưi mơ̆ng lĭng kahan lehanăn mnuih ƀuôn sang Việt Nam, klei bi mguôp prŏng mơ̆ng jih jang djuê ana. Lehanăn hdơr knga kơ ai tiê prŏng prĭn mơ̆ng dŭm êpul êya lĭng kahan lehanăn mnuih ƀuôn sang săn leh asei mlei djiê êngiă mâo mjing leh klei dưi prŏng, bi kơrŭ ai tiê thâo khăp kơ lăn čar, myưng mơang êdi mơ̆ng knuă druh, lĭng kahan lehanăn mnuih ƀuôn sang hlăm bruă rŭ mdơ̆ng lăn čar, čhuang nao hlăm ênuk kpưn đĭ mơ̆ng djuê ana. Tô Văn Luận, pô đru bruă mơ̆ng klei mjuăt bi hriăm, mơ̆ng adŭ bruă kăp kčĕ mơ̆ng lĭng kahan alŭ wăl 7 lač:

 “Hrue 30/4 anăp anei jing yuôm bhăn snăn mơ̆ng kluôm đảng, jih jang lĭng kahan, knuă druh lĭng kahan, ktuh êyuh bi hdơr klei mblah dưi. Sang hră bruă lĭng kahan alŭ wăl 7 mâo mkŏ mjing lu bruă ngă, hlăm anăn rơ̆ng kơ ênoh kahan nao hlăm klei ruĕ kahan, ep mjuăt hlăm knăm bi hdơr. Asei mlei kâo pô mbĭt hŏng jih jang phung knuă druh, lĭng kahan, lehanăn phung hđeh gưl mrâo mâo dlăng dŭm mta fim yăl dliê lehanăn dŭm klei mjuăt bi hriăm, jih jang mnuih bŏ hŏng klei myưng m’ang, lehanăn thâo hdơr knga kơ phung aê ama pô nao leh êlâo bi blah tuh êrah mčah klang kyua klei êngiê kơ djuê ana”.

Thượng úy Phạm Duy Hưng, khua Trung đội hlăm Đại đội Công binh kahan ƀuôn prŏng.HCM lač:

 “Mgei ai tiê kyua dơ̆ng truh hrue knăm prŏng mơ̆ng djuê ana kluôm ala lehanăn ti ƀuôn prŏng HCM, klei bi hdơr 50 thŭn hrue kwar dhŭng mâo klei êngiê, mhluh lir lăn čar. Jing ‘Kahan Awa Hô” snăn kâo ƀuh knăm bi hdơr anei hlăm kluôm ala, mâo mkŏ mjing dŭm klei mdah jăk găl, bŏ hŏng klei êđăp ênang, anăn yơh jing bruă čuăn mơ̆ng lĭng kahan răng mgang klei êđăp ênang ti ƀuôn prŏng”.

Klei yăl dliê mơ̆ng Trung tướng Đoàn Sinh Hưởng – pô mgăt êdeh sar mrô  980 ksŭng mblah kđông kahan roh ti ƀuôn Ama thuôt, hlŏng kơ ai tiê mnuih ƀuôn sang, lehanăn lĭng kahan mda asei hrue anei, jih jang hdră mdah klei kdŏ muiñ mjing leh kdrông yuôm bhăn mkŏ boh klei hlăk anăn, hŏng ară anei. Ai tiê lĭng kahan awa Hô amâo mâo djŏ knŏng hdĭp hlăm dŭm klei dưi mơ̆ng klei bi blah mphŭn dô, ƀiădah lŏ lar truh hlăm ai êwa klei thâo khăp kơ lăn čar, mơ̆ng jih jang bruă ngă hlăm klei mđĭ kyar lăn čar hrue anei./.