Êpul ngă bruă mơ̆ng Thượng tướng Phùng Sĩ Tấn, k’iăng khua kčĕ bruă lĭng kahan yang ƀuôn Việt Nam ngă khua êpul mđup brei leh sang klei khăp kơ 5 gŏ sang knŭk kna dlăng ba, grăp boh sang mâo ênoh 80 êklăk prăk, 10 boh sang bi mguôp kơ dŭm gŏ sang ƀun, grăp boh sang mâo ênoh 50 êklăk prăk. Êngao kơnăn, khua phŭn đru kčĕ bruă lŏ mđup brei 50 hnư mnơ̆ng kơ 50 gŏ sang dleh dlan hlăm alŭ wăl čar. Jih jang ênoh ngă hdră gưl anei jing giăm 1,1 êklai prăk.

Hluê si khua gĭt gai Phŭn đru kčĕ bruă, Lăn Dap Kngư mâo nanao Đảng, knŭk kna leh anăn Phŭn bruă lĭng kahan dlăng jing alŭ wăl hdră êlan yuôm bhăn hlăm bruă lĭng kahan, klei êđăp ênang mơ̆ng lăn čar. Tinei, mnuih ƀuôn sang dŭm djuê ana bi lar ai tiê cách mạng, bi mguôp sa ai. Klei anei bi êdah klă hlăm hdră krŭ kdơ̆ng Lăn Dap Kngư, êjai lĭng kahan leh anăn mnuih ƀuôn sang hrăm mbĭt kdơ̆ng mblah, mâo mă klei dưi, sua wĭt klei êngiê kwar Dhŭng, hluh hlir lăn čar.