Mơ̆ng akŏ thŭn truh ară anei, Êpul hgŭm bruă mniê čar Phú Yên bi hgŭm leh hŏng dŭm êpul mđĭ klei mtô mblang, mkŏ mjing lu hdră kñăm hluê ngă tŭ dưn Hdră êlan mrô 8 – hluê ngă klei mtăp mđơr êkei mniê lehanăn msir mghaih dŭm bruă mjêč hŏng phung mniê lehanăn phung hđeh krĭng mnuih djuê ƀiă. Êpul hgŭm bruă mniê čar Phú Yên mkŏ mjing leh knăm hưn mthâo 63 êpul mtô mblang êpul êya. Grăp êpul mâo 10 čô mâo Khua bruă Đảng, khua ƀuôn, Khua êpul bruă mniê, Khua Anôk bruă mặt trận lehanăn dŭm êpul êya ti alŭ wăl.

Grăp mlan, êpul mtô mblang êpul êya mkŏ mjing ƀiă êdi 1 hdră mtô mblang, bi lu jơr hdră hâo hưn, ruah hdră mtô mblang djŏ guôp hŏng grăp čô nao hgŭm. Êpul mtô mblang êpul êya lŏ nao truh ti grăp gŏ sang čiăng tui ksiêm, thâo klă klei čiăng mơ̆ng mnuih ƀuôn sang. Leh kơnăn, bi mguôp hdră mtô mblang hŏng bruă msir mghaih jih klei dleh kpăk mơ̆ng mnuih ƀuôn sang hlăm dŭm klei bi kƀĭn ƀuôn. Êngao kơ bruă mtrŭt mjhar, ktrâo lač kơ mnuih ƀuôn sang mđĭ kyar bruă pla mjing, êpul mtô mblang êpul êya lŏ mđing kơ phung hđeh, bi hrŏ klei čăm biêng hlăm gŏ sang, klei bi dôk ung mô̆ mơ̆ng mda, lăm lui klei bhiăn amâo djŏ mơ̆ng đưm, klei ngă yang, iêu mjâo tơdah ruă duam mbĭt anăn mđĭ hdră mtô mblang kơ mnuih ƀuôn sang brei nao kơ sang êa drao mdrao mgŭn tơdah ruă duam. Hồ Ngọc Kim Linh ti să Sơn Hội (kdriêk Sơn Hòa) brei thâo:

Kâo čiăng nao hgŭm hlăm Êpul mtô mblang anei kñăm mâo klei thâo săng hĭn lehanăn dêč đuê̆ kơ dŭm bruă amâo djŏ. Hgŭm hlăm êpul srăng ba wĭt boh tŭ kơ klei hdĭp lehanăn đru kơ kâo pô mâo klei thâo săng hĭn, thâo ti djŏ ti soh.

Hluê Hà Thị Thìn, Khua Êpul hgŭm bruă mniê să Êa Trol, kdriêk Sông Hinh, hlăm klei gĭr gang mkhư̆ klei bi dôk ung mô̆ mơ̆ng mda, gang mkhư̆ klei bi čăm biêng, ngă jhat hŏng phung hđeh, Êpul bruă mniê să mbĭt hŏng dŭm knơ̆ng, dhar bruă nao truh leh ti grăp alŭ, ƀuôn čiăng mtô mblang, hlăm grăp mlan, grăp gưl.

Leh tŭ mă hră mơar mơ̆ng Gưl dlông lehanăn mơ̆ng čar, kdriêk snăn Êpul hgŭm bruă mniê čih mkra leh hdră kčah. Leh kơnăn pŏk ngă bruă anei ti dŭm ƀuôn dôk hlăm Hdră êlan mrô 8, kñăm mtô mblang ti grăp alŭ, ƀuôn, mkŏ mjing bruă hluê ngă klei mtăp mđơr êkei mniê, mkŏ mjing gru hmô amâo mâo dôk ung mô̆ mơ̆ng mda hluê ngă 5 hơaĭ mguôp hŏng bruă hluê ngă hdră 3 doh. Grăp gưl mâo klei bi mjĕ mjuk phung mniê, pô ăt mđing mtô mblang kơ klei mtăp mđơr êkei mniê mơh.

Nguyễn Thị Phương Liên, Kơiăng khua Êpul bruă mniê čar Phú Yên brei thâo, hlăm wưng êgao, Êpul bruă mniê čar Phú Yên bi hgŭm hŏng Knơ̆ng bruă Mnuih ngă bruă, kahan êka êkeh lehanăn yang ƀuôn mkŏ mjing dŭm adŭ mjuăt bi hriăm mđĭ klei thâo kơ phung knuă druh êpul gưl kdriêk, să hlăm bruă msir mghaih dŭm klei djŏ tuôm kơ bruă ngă jhat hŏng phung mniê, hđeh mniê ti krĭng mnuih djuê ƀiă lehanăn krĭng čư̆ čhiăng.

Êpul bruă mniê čar Phú Yên ăt gĭt gai dŭm gưl bruă mniê mđĭ lar dŭm gru hmô, hdră ngă tŭ dưn, ba yua jăk gru hmô Êpul mtô mblang hlăm êpul êya dôk hlăm Hdră êlan mrô 8.

Hŏng mta kñăm truh thŭn 2025 srăng mkŏ mjing 63 êpul snăn ară anei dưi mkŏ mjing leh 45 êpul hŏng 430 čô hgŭm. Dŭm êpul anei mâo leh Êpul bruă mniê mjuăt bi hriăm klei thâo săng lehanăn hdră mtô mblang kơ mnuih hlăm êpul.

Bruă pŏk ngă hdră êlan mrô 8 jing klei găl čiăng kơ Êpul hgŭm bruă mniê dŭm gưl lehanăn anôk bruă djŏ tuôm, bruă knŭk kna alŭ wăl mđing uêñ kiă kriê phung nmniê lehanăn phung hđeh mnuih djuê ƀiă dôk tlă anăp hŏng klei dleh dlan, jao klei găl diñu kpưn đĭ, mñă klă bruă klam phung mniê, hđeh mniê hlăm hdră mkŏ mkra lehanăn mđĭ kyar êpul êua, đru mkŏ mkra čar Phú Yên đĭ kyar hơĭt kjăp./.