VOV4.Êđê- Êpul gơ̆ng bruă ƀuôn sang čar Lâm Đồng gưl 10 mkŏ mjing leh klei kƀĭn tal 4 kñăm čih yap boh tŭ dưn hlăm bruă mđĭ kyar bruă duh mkra ala ƀuôn leh anăn ksiêm dlăng, bi klă klei hưn mdah, hdră mtrŭn yuôm bhăn. Tui si klei hưn mdah hlăm klei kƀĭn, khădah mâo klei hmăi kyua klei ruă tưp Covid-19, ƀiădah čar Lâm Đồng ăt dôk rơ̆ng hnơ̆ng đĭ kyar bruă duh mkra êbeh 3,1%. Hlăm anăn bruă lŏ hma đĭ 4% leh anăn bruă tuh tia, mkŏ mkra đĭ 5,5%.

Năng mđinh hĭn ênoh ngăn prăk hrui wĭt knŭk kna mâo 10 êbâo 620 êklai prăk, đĭ 12,7% mkă hŏng wưng anei thŭn dih. Ƀiădah čar Lâm Đồng ăt dôk 8 hlăm 18 hnơ̆ng čoh čuăn bruă duh mkra ala ƀuôn ka dưi ngă ôh hluê si hdră êlâo anăn. Bruă mkra mjing, mnia mblei dôk tuôm hŏng lu klei dleh dlan, ăt dôk mâo lu klei bha čhĭ lăn amâo djŏ hdră bhiăn hlăm đa đa alŭ wăl… Hlăm klei kƀĭn anei, čar Lâm Đồng srăng kñăm hlăk mblang, bi trông kơ dŭm boh klei, hluê anăn dưi mâo hdră êlan ƀư̆ mkra leh anăn mgaih msir, mđĭ kyar bruă duh mkra ala ƀuôn leh anăn ngă bi leh dŭm hnơ̆ng čoh čuăn, bruă kñăm hlăm hruê mmông kơ anăp.

Pô mblang: Y-Ƀel Êban